21
Ka nakahule te me etew
(2 Sam. 24:1-25)
1 Ne egkeupian si Meibulan ne eggubuten ka keet-etawan te Israil, purisu ingguluan din si Dabid ne igpasinsus ka me sundalu te Israil.
2 Purisu ingkahiyan ni Dabid si Huwab wey ka me pangulu te me sundalu, “Hipanew kew, sinsusa niyu ka me matig-Israil puun te Birsiba peendiye te Dan. Ne libed kew kayi wey panengnenga a nikaniyu eyew egkanengnengan ku ke pilaa langun sikandan.”
3 Piru migtabak si Huwab, “Meupiya perem ke egpamasuluhen te Magbebaye ne Manama te mahatus (100) ne lupi ka kasuluhan te keet-etawan din! Piru mania ahalen ku ne Hari te igkeupii nu ne eggimuwen seini, te me suluhuanen nu ma sikandan langun? Mania te iglagkes nu te sale ka intiru ne Israil?”
4 Piru impatuman iya ni Dabid ka suhu din, minsan te pegbalabag ni Huwab. Purisu, miggipanew e si Huwab wey impamayaan din ka intiru ne Israil eyew egsinsusen ka keet-etawan. Ne nataman miglibed e sikandin diye te Hirusalim,
5 wey ingguhud din e ka kasuluhan te keet-etawan diye ki Dabid. Ne due 1,100,000 ne me bahani te intiru ne Israil ne egkateu ne eggamit te kampilan, wey 470,000 ka diye te Huda.
6 Piru ware ilagkes ni Huwab te egsinsus ka kabuhalan ni Libi wey ni Binhamin, tenged su ware din ikeupii ka suhu te Hari.
7 Ne warad iya ikeele te Manama ka pegsinsus te me etew, purisu inlegparan din ka Israil tenged dutu.
8 Migkahi si Dabid diye te Manama, “Dakel ka sale ku te pegpasinsus ku. Ne kuntee egpeyid‑u-hid‑u a ubag ne egpasayluwen a nikeykew se suluhuanen nu su keungelan iya ka neyimu ku.”
9 Ne migkahi ka Magbebaye ne Manama ki Gad, ka prupita ni Dabid,
10 “Hendiyei nu si Dabid wey kahii nu, ‘Seini ka ingkahi te Magbebaye ne Manama: egbehayan ku sikeykew te tatelu ne eg-alaman. Alam ka te sabeka kayi, wey eggimuwen ku seini due te keykew.’ ”
11 Purisu miggendiyaan e ni Gad si Dabid wey ingkahiyan, “Seini ka ingkahi te Magbebaye ne Manama, ‘Alam ka ke hendei ka igkeupii nu kayi:
12 tatelu naa ne leg‑un ne bitil wey ke tatelu naa ne bulan ne egpanpanlupuhen ka te me kuntere nu wey egdereetan, wey ke tatelu naa ne aldew ne karereetan ne egpuun te Magbebaye ne Manama—te sika ne timpu egpareraluwen te mangune-kune te panalihan te Magbebaye ne Manama ka keet-etawan te Israil.’ Ne kuntee, suman-suman ke naa ke nekey a ka igtabak ku te migpeuyan keddi.”
13 Ne migtabak si Dabid, “Amana a nalaggew. Piru meupiya pad ke egdusaan ki te Magbebaye ne Manama du te etew ka egdusa kanta su hiid‑uwen ma amana sikandin.”
14 Sikan naa ka impeuyanan te Magbebaye ne Manama te dalu ka Israil, wey pitu ne pulu ne libu (70,000) ka migpatey te intiru ne Israil.
15 Ne migpeuyan ka Magbebaye ne Manama te panalihan din eyew te pegdereet te Hirusalim. Piru te ware pad migbunsud ka panalihan te pegderereet te Hirusalim, nekegsendit ka Magbebaye ne Manama te nakita rin ka peg-antus te me etew. Purisu ingkahiyan din ka panalihan, “Eleg e! Peen-enengi nud e sika se eggimuwen nu.” Te seeye ne timpu, diye migsasindeg ka panalihan te Magbebaye ne Manama te diekanan te trigu ni Arawuna ne Hibusihanen.
16 Ne migleng‑ag si Dabid wey nakita rin ka panalihan te Magbebaye ne Manama ne migsasindeg diye te elat-elat te langit wey tane ne miggen-gen te kampilan, wey ingkayew rin diye te ampew te Hirusalim. Purisu si Dabid wey ka me igbuyag, migsaluub te saku ne kumbale te pegpapitew te peglungku, wey migmanlangkeb diye te tane.
17 Ne migkahi si Dabid diye te Manama, “Sikeddiey ka migpaseel! Sikeddiey ka nakasale wey nekeyimu te mareet! Piru ka seini ne me etew ware nekeyimu te mareet! He Magbebaye ne Manama, tuhuti nu ka panalihan nu ne eglegpad keddi wey te keddi ne pamilya, piru kene nu dereeti ka keet-etawan nu.”
18 Ne migsuhu ka panalihan te Magbebaye ne Manama ki Gad eyew te pegnangen ki Dabid te egpeendiyeen te diekanan ni Arawuna ne Hibusihanen wey egpeyimuwen te altar ne egtutungan te igpanubad para te Magbebaye.
19 Purisu miggendiye si Dabid eyew te pegtuman te insuhu te Magbebaye ne Manama kandin pinaahi ki Gad.
20 Te seeye ne timpu, migdiriek te trigu si Arawuna wey ka hep‑at ne anak din ne me lukes. Te peglingi ni Arawuna, nakita rin ka panalihan te Magbebaye ne Manama. Sikan naa ka miggeles ka hep‑at ne anak din.
21 Te pegkakita ni Arawuna te egpalinggumaan e si Dabid, mig-awe e sikandin diye te diekanan din wey mig-usengul diye te tangkaan ni Dabid isip pegtahud kandin.
22 Ne migkahi si Dabid ki Arawuna, “Kaayun ne egbeliyen ku ka diekanan nu te dakel ne kentiddad? Egpasasindehan ku te altar ne egtutungan te igpanubad para te Magbebaye ne Manama eyew igpeeneng-eneng din e ka karereetan.”
23 Ne migtabak si Arawuna ki Dabid, “Ne kua nud iya, ahalen ku ne Hari! Egpekeyimu ka te minsan nekey ne igkeupii nu. Igbehey ku keykew ka me baka eyew igpanubad, ka kayu ne kasangkapan te pegdiriek eyew igtemeg, wey ka trigu eyew ighalad. Igbehey ku keykew ka langun.”
24 Piru ingkahiyan ni Hari Dabid si Arawuna, “Kene, egbeliyen ku seini te dakel ne kentiddad. Kena a eghalad diye te Magbebaye ne Manama te minsan nekey ne keykew, wey ke egpanubad naa te ware ku nabayari.”
25 Purisu imbayaran ni Dabid ka tane ni Arawuna te hen‑em ne gatus (600) ne buuk ne bulawan.
26 Ne miggimu si Dabid te altar diye ne tutunganan te igpanubad diye te Magbebaye ne Manama wey migpanubad e sikandin te igpanubad ne egtutungen wey te igmanubad para te keupianan. Ne mig-ampu si Dabid wey migtabak ka Magbebaye ne Manama pinaahi te pegpeuyan te hapuy ne egpuun te langit ne migtutung te igmanubad diye te altar.
27 Ne impalipi te Magbebaye ne Manama te panalihan ka kampilan din.
28 Te seeye ne aldew, te nakita ni Dabid ne intabak sikandin te Magbebaye ne Manama diye te diekanan ni Arawuna ne Hibusihanen, migpanubad pad man‑e sikandin diye.
29 Te seeye ne timpu, diye te bubungan te Gibyun ka Matulus ne Balungbalung ne In-alad ne inggimu ni Muwisis diye te disirtu wey ka altar ne tutunganan te igpanubad.
30 Piru ware nekeendiye si Dabid eyew te egpanginginse te Manama, su naaldek ma sikandin te kampilan te panalihan te Magbebaye ne Manama.