23
1 Te buyag e amana si Dabid wey mahaan e egpatey, inggimu rin ne Hari te Israil ka anak din ne si Sulumun.
Ka me pamilya te me Libita wey ka me himu ran
2 Ne impalibulung ni Dabid ka langun ne pangulu te Israil, ka me talagpanubad, wey ka me Libita.
3 Ne inseel rin ka me Libita ne tatelu ne pulu (30) ka idad peendiye te buyag-buyag e, wey migginguma sikandan te tatelu ne pulu wey walu ne libu (38,000) ne me etew.
4 Ne migkahi si Dabid, “Ka daruwa ne pulu wey hep‑at ne libu (24,000) iyan me talagtameng te me himu diye te timplu te Magbebaye ne Manama, wey ka hen‑em ne libu (6,000) iyan me upisyal wey me talaggukum.
5 Ne ka hep‑at ne libu (4,000) iyan me talagbantey te gumawan, wey ka lein ne hep‑at ne libu (4,000) iyan me talagdeyrey te Magbebaye ne Manama, duma te me instrumintu ne immangimu ku para te pegdayan.”
6 Ne imbaad ni Dabid te tatelu ne punduk ka me Libita sumale te tatelu ne anak ni Libi ne si Hirsun, si Kuhat, wey si Mirari.
7 Si Hirsun due daruwa ne anak ne me lukes ne si Ladan wey si Simii.
8 Si Ladan due tatelu ne anak ne me lukes ne iyan si Hihil ka kinakakayan, wey nasinundulan ni Sitan wey ni Huwil.
9 Si Simii due tatelu ne anak ne me lukes ne iyan si Salumit, si Hasil, wey si Haran. Me pangulu sikandan te me pamilya ni Ladan.
10 Ne si Simii duen pad man‑e hep‑at ne anak ne me lukes ne iyan si Diyahat, si Sina, si Hiyus, wey si Biriyas.
11 Si Diyahat ka kinakakayan ne pangulu te pamilya ran, wey si Sina ka igkarangeb. Ne si Hiyus wey si Biriyas, kene ne masulug se me anak. Sikan naa ka in-isip sikandan ne sabeka re ne kabuhalan.
12 Ne si Kuhat due hep‑at ne anak ne me lukes ne iyan si Amram, si Isar, si Hibrun, wey si Usil.
13 Ne ka me anak ni Amram ne me lukes iyan si Aarun wey si Muwisis. Si Aarun wey ka me kabuhalan din, inteil eyew iyan eghalad te amana ne matulus ne me kasangkapan, egtutung te igpanubad diye te Magbebaye ne Manama, egpamakey te Magbebaye ne Manama, wey eyew egpanalangin te keet-etawan te ngaran te Magbebaye ne Manama. Sika ka katungdanan dan te ware egtamanan.
14 Piru ka me lukes ne anak ni Muwisis, ka etew te Manama, in-isip ne sakup te me kabuhalan ni Libi.
15 Ne si Muwisis due daruwa ne anak ne me lukes ne si Girsum wey si Ilisir.
16 Ka sabeka te me lukes ne anak ni Girsum, iyan si Sibuwil ne pangulu te kabuhalan dan.
17 Ne si Ilisir due ubag sabeka ne anak ne lukes ne iyan si Ribiyas. Piru masulug mule ka me anak ni Ribiyas.
18 Ne si Isar ne igkarangeb ne anak ni Kuhat, due sabeka ne anak ne lukes ne iyan si Salumit, ne pangulu degma te me kabuhalan dan.
19 Ne si Hibrun ne igkatelu ne anak ni Kuhat, due hep‑at ne anak ne me lukes ne iyan si Hiriyas, si Amariyas, si Diyahasil, wey si Hikamiyam.
20 Ne ka igkeep‑at ne anak ni Kuhat ne si Usil, due daruwa ne anak ne me lukes ne si Mika wey si Hisiya.
21 Ne si Mirari due daruwa ne anak ne me lukes ne si Mali wey si Musi. Ne si Mali due degma daruwa ne anak ne me lukes ne si Iliyasar wey si Kis.
22 Ne migpatey si Iliyasar ne ware mule anak ne me lukes, piru due me anak din ne malitan. Ne impangasawa ka anak din ne me malitan te me suled dan ne me anak te anggam dan ne si Kis.
23 Ne si Musi due tatelu ne anak ne me lukes ne iyan si Mali, si Idir, wey si Hirimut.
24 Sika ka me kabuhalan ni Libi ne nenalista se me ngaran diye te tagse pamilya ne nasakupan te tagse sabeka kandan. Ne iyan de immanlista ka daruwa ne pulu (20) se idad wey buyag-buyag e eyew egtrabahu diye te timplu te Magbebaye ne Manama.
25 Su migkahi si Dabid, “Imbehayan ki te Magbebaye ne Manama, ka Manama te Israil te keupianan, wey eg-ugpe sikandin kayi te Hirusalim te ware egtamanan.
26 Purisu kenad keilangan ne eg-uy-uyanen pad te me Libita ka Matulus ne Balungbalung ne In-alad wey ka langun ne kasangkapan ne eggamiten te pegsimba.”
27 Ne ka katammanan ne suhu ni Dabid iyan ka pegseel te me Libita ne daruwa ne pulu (20) se idad wey buyag-buyag e.
28 Ne iyan dan himu ka egbulig te me kabuhalan ni Aarun ne egtrabahu diye te timplu te Magbebaye ne Manama. Sikandan ka talagtanggu te lama te timplu wey te me sinabeng, wey eglinis te langun ne matulus ne kasangkapan wey duma pad ne himu diye te timplu te Manama.
29 Sikandan man‑e ka impiyalan te matulus ne paan ne igtahu diye te lamisa, te harina ne ighalad diye te Magbebaye ne Manama, te paan ne ware igpatulin, te paan ne impiritu wey te duma pad ne halad ne me linuyang. Sikandan degma ka impiyalan ne egtimbang wey egtakes.
30 Katungdanan dan man‑e ka egsasindeg diye te timplu tagse maselem wey maapun eyew egpasalamat wey egdayan te Magbebaye ne Manama,
31 wey te tagse timpu ne egtutung te igpanubad diye te Magbebaye ne Manama te Aldew te Peggimeley, Sahakeen te Iyam ne Bulan, wey te duma pad ne aldew te sahakeen. Ne due eg-ikulen dan ne balaud ke pila ne Libita ka egtrabahu wey ke egmenuwen dan te eggimu ka trabahu ran diye te tangkaan te Magbebaye ne Manama.
32 Sikandan ka talagtanggu te Balungbalung ne Temuwanan wey te Matulus ne Balungbalung, wey ka egbulig te me karumaan dan ne me kabuhalan ni Aarun te egpamakey diye te timplu te Magbebaye ne Manama.