11
Ka pegsapad ni prupita Simayass ki Rihubuwam
(1 Hari 12:21-24)
1 Pegginguma ni Rihubuwam diye te Hirusalim, inlibulung din e ka me kabuhalan ni Huda wey ni Binhamin. Nakalibulung sikandin te 180,000 ne me bahani eyew egpakiggira te me matig-Israil wey eggawi te migharian din.
2 Piru impanengneng te Magbebaye ne Manama si Simayas ne suluhuanen te Manama,
3 “Kahii nu si Rihubuwam ne anak ni Sulumun, ne Hari te Huda, wey ka langun ne kabuhalan ni Huda wey ni Binhamin,
4 te migkahi a se Magbebaye, ‘Kene kew bubunu te me karumaan niyu wey uli kew e. Neyitabu seini langun su igkeupii ku seini.’ ” Purisu, migpalintutuu sikandan te Magbebaye wey warad miglusud ki Hirubuwam.
Ka peg-alad ni Rihubuwam te me siyudad
5 Diye mig-ugpe si Rihubuwam te Hirusalim wey migpasasindeg sikandin te me siyudad eyew egmalig‑en ka Huda.
6 Impasasindeg din ka Bitlihim, ka Itam, ka Tikuwa,
7 ka Bitsur, ka Suku, ka Adulam,
8 ka Gat, ka Marisa, ka Sip,
9 ka Aduraim, ka Lakis, ka Asika,
10 ka Sura, ka Ayalun, wey ka Hibrun. Sika ka me siyudad te Huda wey te Binhamin ne in-alad te matikang wey makepal ne batu.
11 Inlig‑enan din seeye se alad ne matikang, wey makepal ne batu wey impanahuan din te me kumandir. Ne imbehayan din sikandan te egkeenen, mentika te ulibu, wey binu.
12 Insangkap din degma te me kalasag wey me deldeg ka seini ne me siyudad eyew egmalig‑en pad seini. Purisu, nahen-genan din ka Huda wey ka Binhamin.
Ka peggendiye te Huda te me talagpanubad wey me Libita
13 Ne ka me talagpanubad wey ka me Libita ne mig-ugpe diye te nalein-lein ne inged te Israil miggendiye ki Rihubuwam.
14 In-engkeran te me Libita ka tane dan wey karatuan dan wey miggendiye sikandan te Huda wey te Hirusalim tenged su ingkenaan man e sikandan ni Hirubuwam wey te me anak din ne egpamakey te Magbebaye isip me talagpanubad.
15 Ne mig-alam si Hirubuwam te me talagpanubad din eyew egpamakey diye te me panubaran diye te me bubungan wey egpangulu te pegsimba te kambing ne me diyus-diyus wey te baka ne me diyus-diyus ne impeyimu rin.
16 Ne ka me matig-Israil ne migpuun te duma ne tribu te Israil ne egkeupian ne egpabulus egpamakey te Magbebaye, ka Manama te Israil, migsundul te Libita diye te Hirusalim eyew egpanubad diye te Magbebaye, ka Manama te kaap-apuan dan.
17 Nakalig‑en sikandan te migharian te Huda wey nakabulig te peghari ni Rihubuwam ne anak ni Sulumun te tatelu ne leg‑un su intuman dan ma ka Manama, iling te me timpu te peghari ni Dabid wey ni Sulumun.
Ka pamilya ni Rihubuwam
18 Ne mig-asawa si Rihubuwam ki Mahalat ne anak ni Hirimut. Ka amey ni Hirimut iyan si Dabid wey ka iney rin iyan si Abihail ne anak ni Iliyab ne anak ni Hisi.
19 Ne mig-anak si Mahalat te me lukes ne si Hiyus, si Simariyas wey si Saham.
20 Nataman, mig-asawe e man‑e si Rihubuwam ki Maaka ne anak ni Absalum. Ne nakaanak sikandin ki Abiyas, ki Itay, ki Sisa, wey ki Silumit.
21 Inggeyinawaan ni Rihubuwam si Maaka ne anak ni Absalum du te langun ne me asawa rin. Due sapulu wey walu (18) ne asawa rin wey hen‑em ne pulu (60) ne me duwey rin. Ne daruwa ne pulu wey walu (28) ka anak din ne me lukes wey hen‑em ne pulu (60) ka anak din ne malitan.
22 Ne in-alam ni Rihubuwam si Abiyas ne anak dan ki Maaka isip labew te me anak din su igkeupii rin ne sikandin ka egkeyimu ne Hari.
23 Mig-ay-ayaran ni Rihubuwam te egpamehey te me katungdanan ka me anak din wey intalagtag din sikandan diye te me siyudad te Huda wey te Binhamin ne in-alad te matikang wey makepal ne batu. Impamehayan din sikandan te langun ne ingkeilangan dan, wey impamitawan din sikandan te me malitan ne igmaasawa kandan.