15
Ka lalag ni Asariyas
1 Ne miglene ka Panisingan te Manama ki Asariyas ne anak ni Udid.
2 Ne miggendiye sikandin ki Hari Asa eyew egtemu kandin wey migkahi, “Pammineg ka Hari Asa wey sikaniyu se langun ne matig-Huda wey matig-Binhamin. Ke eg-ugpe kew duma te Magbebaye ne Manama, eg-ugpe degma sikandin duma kaniyu. Ke egpangananey kew kandin, egbulihan kew nikandin. Piru ke eg-engkeran niyu sikandin, eg-engkeran kew degma nikandin.
3 Naluhey ne timpu ne ware migpamakey te malehet ne Manama ka me matig-Israil, ware talagpanubad ne egpanulu kandan, wey ware balaud ne eg-ikulen dan.
4 Piru te nasumpitan e sikandan, miglibed e sikandan te Magbebaye ne Manama te Israil. Migpangananey sikandan kandin wey narineg din sikandan.
5 Te seeye ne timpu, kene ne meupiya ne eggiphipanew, su due kasamuk te keet-etawan ne nangugpe te nakalingut ne me inged.
6 Egmeeg-ehetey ka me nasud wey ka me siyudad tenged su insamuk ma sikandan te Manama pinaahi te langun-langun de iya ne kalised.
7 Piru bulut-bulut kew wey nekal-nekal kew su eg-unahan kew te egpangimuwen niyu.”
8 Te pegkarineg ni Asa te seeye ne me lalag wey te pegpanagne ni Asariyas ne anak ni Udid, nabagget sikandin. Impangawe din ka makaalat-halat ne me diyus-diyus te intiru ne tane te Huda wey te Binhamin, wey lagkes ka diye te me lungsud ne naahew rin puun te bubungan te Ipraim. In-ay-ayaran din ka altar te Magbebaye ne egkatangkaan te likansu te timplu te Magbebaye.
9 Impalibulung din ka langun ne me matig-Huda wey ka me matig-Binhamin wey ka me matig-Ipraim, me matig-Manasis, wey me matig-Simyun ne miglemung kandan. Su masulug ma ka me matig-Israil ne migpangalaglag diye te Huda te nakita ran ne migduma kandin ka Magbebaye ne Manama rin.
10 Miglibulung sikandan diye te Hirusalim te igkatatelu ne bulan te igkasapulu wey lalimma (15) ne leg‑un te peghari ni Asa.
11 Te seeye ne aldew migpanubad sikandan diye te Magbebaye te pitu ne gatus (700) ne baka wey pitu ne libu (7,000) ne karniru puun te naahew ran te pegpakiggira.
12 Ne miggimu sikandan te kasabutan ne egpangananey te Magbebaye, ne Manama te me kaap-apuan dan te intiru ne pusung dan wey te gimukud dan.
13 Ne migpahunlibet pad man‑e sikandan ne eggimatayan ka langun ne kene egpangananey te Magbebaye, ka Manama te Israil, bate ma wey se buyag, lukes ma wey se malitan.
14 Migpahunlibet sikandan diye te Magbebaye duma te pegpanagyawan, pegkuleyi, pegparahing te me trumpita, wey te me sungey te karniru.
15 Nahale ka langun ne matig-Huda te pegpahunlibet dan su puun ma te pusung dan ka pegpahunlibet dan. Migpangananey sikandan te Magbebaye te intiru ne pusung dan, wey narineg din sikandan. Ne ware ipasamuk sikandan te Magbebaye te me kuntere dan ne nakalingut kandan.
16 Ne impaawe ni Hari Asa ka apu din mismu ne si Maaka te pegkarayna, su migpasasindeg ma sikandin te me diyus-diyus ne sungkaleg ne si Asira. Impepameled ni Asa, impepangguley ka me diyus-diyus ne sungkaleg, wey impasilaban din e seini diye te Napu te Kidrun.
17 Minsan ke ware naamin naawe ka me panubaran diye te me bubungan te Israil, matinumanen amana si Asa te Magbebaye te intiru ne umul rin.
18 Ne in-uyan din ka matulus ne kasangkapan ne inggimu rin wey te amey rin diye te timplu te Manama lagkes ka me pelata, bulawan, wey duma pad ne kasangkapan.
19 Ne ware gubut ne neyitabu taman te igkatatelu ne pulu wey lalimma (35) ne leg‑un te peghari ni Asa.