25
Ka peghari ni Amasiyas te Huda
(2 Hari 14:2-6)
1 Daruwa ne pulu wey lalimma (25) ka idad ni Amasiyas te neyimu sikandin ne Hari, wey mighari sikandin diye te Hirusalim te daruwa ne pulu wey siyam (29) ne leg‑un. Si Hihu-Adan ne matig-Hirusalim ka iney rin.
2 Meupiya ka hinimuwan ni Amasiyas diye te tangkaan te Magbebaye ne Manama, piru ware amana nasabeka ka geyinawa rin te peg-ikul te Magbebaye.
3 Te migmaresen e ka peghari din, impeyimatayan din e ka me upisyal rin ne miggimatey te amey rin ne Hari.
4 Piru ware din ilagkes te egpangimatey ka me anak dan. Su nasulat ka suhu te Magbebaye diye te libru ni Muwisis, ne migkahi, “Keilangan ne kene eggimatayan ka amey tenged te sale te anak din, wey keilangan ne kene degma eggimatayan ka anak tenged te sale te amey rin. Egpatey re ka etew tenged te sale din mismu.”
5 Ne inlibulung ni Amasiyas ka keet-etawan te Huda wey Binhamin. Impunduk din sikandan sumale te kabuhalan dan wey impanahuan te me pangulu te pamilya ne egmandu te tigsabeka ne gatus (100) wey tigsabeka ne libu (1,000) ne me sundalu. Ne inseel rin ka me sundalu rin ne daruwa ne pulu (20) se idad wey subla, ne migginguma sikandan te tatelu ne gatus ne libu (300,000). In-alam sikandan ne me sundalu, nenabbasbas ne egpakiggira, wey mangngateu sikandan langun ne eggamit te deldeg wey te kalasag.
6 Ne migsuul pad man‑e sikandin te sabeka ne gatus ne libu (100,000) ne mabbulut ne bahani ne egpuun te Israil. Insuulan din sikandan te tatelu ne libu wey lalimma ne gatus (3, 500) ne kilu te pelata.
7 Piru due sabeka ne prupita te Manama ne miggendiye te kandin wey migkahi, “Mahal ne Hari, kene kad duruma te egsuulan nu ne me sundalu te Israil su kenad egpangabang kandan ka Magbebaye, wey te minsan hentew te me matig-Ipraim.
8 Piru ke egparumeen niyu red sikandan te pegpakiggira, egkatalu kew iya te me kuntere niyu minsan pad mangngateu kew ne egpakiggira su due geem te Manama te pegbulig wey ke pegtalu naa.”
9 Ne mig-inse si Amasiyas te prupita, “Menuwen ku naan e ka tatelu ne libu wey lalimma ne gatus (3, 500) ne kilu te pelata ne imbayad ku te me sundalu te Israil?”
Ne migtabak ka prupita, “Egpakabehey ka Magbebaye te subla pad te imbayad nu.”
10 Ne impeuli e ni Amasiyas ka me sundalu ne matig-Israil. Ne nabelu sikandan te Huda wey mig-uli sikandan ne migpangebel-ebel se langet.
11 Piru migmabulut si Amasiyas wey indumaan din ka keet-etawan din diye te napu ne egngaranan te Asin wey impangimatayan dan ka sapulu ne libu (10,000) ne sundalu ne matig-Siir.
12 Ne nakarakep pad man‑e sikandan te sapulu ne libu (10,000), wey in-uyan dan diye te dalayap wey in-uulug dan e wey nammatey sikandan ne naggepuan te me tul‑an.
13 Ne ka me sundalu te Israil ne impeuli ni Amasiyas, miglusud te me siyudad te Huda puun te Samarya taman te Bit-Hurun. Nekeyimatey sikandan te tatelu ne libu (3,000) ne me etew wey nakaahew te masulug ne me kasangkapan.
Ka pegsimba ni Amasiyas te me diyus-diyus
14 Te peg-uli e ni Amasiyas puun te pegpakiggira te matig-Idum, impanguyan din ka me diyus-diyus te matig-Siir wey inggimu rin ne me diyus-diyus din, insimba rin wey impanubaran.
15 Purisu, nabelu ka Magbebaye ki Amasiyas wey migpeuyan sikandin te prupita eyew egpakahiyen, “Mania te migsimba ka te seini ne me diyus-diyus ne ware nakaluwas te keet-etawan din puun keykew?”
16 Te sasangan pad ne eglalag ka prupita, migtabak e ka Hari, “Mania te egtambag ka keddi? Talagtambag ku bes sikeykew? Peeneng-eneng kad ke kene ka egkeupian ne egpatey.”
Piru wey e migpeeneng-eneng ka prupita ke nalalag din pad seini: “Nakanengneng a ne egdereetan ka iya te Manama su migsimba ka te me diyus-diyus, wey ware ka migpammineg te tambag ku.”
17 Ne migpanginginse si Amasiyas ne Hari te Huda te me talagtambag din. Nataman, impanahaan din e si Huwas ne Hari te Israil ne anak ni Huwakas ne anak ni Hihu te migkahi, “Hendini ka su egpahiggireey ki.”
18 Ne migtabak si Huwas ne Hari te Israil pinaahi te seini ne pangguhuren, “Due sapinit diye te Libanun ne migkahi diye te kayu ne sidar, ‘Ipaasawa nu mule ka anak nu ne malitan te anak ku.’ Piru due miglihad ne mahintalunan ne mananap wey indi-diekan din e ka sapinit.
19 Migpaambug kad ubag Amasiyas su natalu nu ma ka me matig-Idum. Uugpe kad mule te baley nu. Mania te egpamitew ka te gubut ne iyan egpakarereet keykew wey te keet-etawan te Huda?”
20 Piru ware migpammineg si Amasiyas ki Huwas ne Hari te Israil su igkeupii te Manama ne egkareetan sikandin te me kuntere din tenged te pegpangananey rin te me diyus-diyus te me matig-Idum.
21 Purisu inlusuran ni Huwas si Amasiyas wey migpahiggireey sikandan diye te Bit-Simis ne sakup te Huda.
22 Ne natalu te Israil ka Huda wey migpamallahuy e ka me sundalu te Huda wey migpanguli e diye te me ugpaan dan.
23 Ne narakep ni Hari Huwas si Hari Amasiyas diye te Bit-Simis wey in-uyan din e diye te Hirusalim. Ne impangguhus e ni Huwas ka matikang wey makepal ne batu ne alad te Hirusalim; puun te Gumawan ni Ipraim taman te Gumawan te Pikungan ne me sabeka ne gatus wey walu ne pulu (180) ne mitrus se kariyuan puun te Gumawan ni Ipraim.
24 Ne impanguwa rin e ka langun ne bulawan, pelata wey me kasangkapan ne nakita rin diye te timplu te Manama ne imbantayan dengan ni Ubid-Idum. Impanguwa rin degma ka me karatuan te Hari ne diye te palasyu lagkes ka nenaddakep ne me etew wey impanguyan din e diye te Samarya.
25 Neuyag pad si Amasiyas ne anak ni Huwas ne Hari te Huda te sapulu wey lalimma (15) ne leg‑un puun te pegpatey ni Hari Huwas ne anak ni Huwakas ne Hari te Israil.
26 Ne ka duma pad ne guhuren meyitenged te peghari ni Amasiyas puun te an-anayan taman te katamanan, nasulat diye te Sulatanan te me Guhuren te me Hari te Huda wey te Israil.
27 Ne puun te peg-inniyug ni Amasiyas te Magbebaye, due me etew te Hirusalim ne migplanu ne eggimatey kandin. Purisu migpallahuy sikandin puun te Hirusalim peendiye te siyudad te Lakis. Piru impatalukunan sikandin te me kuntere din wey impeyimatayan diye.
28 Ne indulan dan e te kudde ka lawa rin wey in-uyan diye te Hirusalim wey inlebeng dan e sikandin diye te inlebengan te me kaap-apuan din diye te Siyudad ni Dabid.