27
Ka peghari ni Hutam te Huda
(2 Hari 15:32-38)
1 Daruwa ne pulu wey lalimma (25) ka idad ni Hutam te neyimu sikandin ne Hari, wey mighari sikandin diye te Hirusalim te sapulu wey hen‑em (16) ne leg‑un. Si Hirusa ne anak ni Saduk ka iney rin.
2 Meupiya ka hinimuwan din diye te tangkaan te Magbebaye ne Manama iling te hinimuwan te amey rin ne si Usiyas. Piru ware mule sikandin mig-uney-uney migseled te timplu. Ne ka keet-etawan migpabulus ded miggimu te mareet.
3 Ne si Hutam ka migpeyimu te Gumawan diye te Igkahibang ne Balabahan te timplu te Magbebaye wey dakel man‑e ka imbalbalawan din ne matikang wey makepal ne alad ne batu diye te labuntud te Upil.
4 Ne migpasasindeg man‑e sikandin te me lungsud diye te me bubungan te Huda, wey malig‑en ne me aputanan wey matikang ne me baley diye te puwalas.
5 Ne migpakiggira si Hutam te me Amunihanen wey natalu rin sikandan. Te seeye ne leg‑un, migbehey ka me Amunihanen te 3,400 ne kilu ne pelata, lalimma ne pulu ne libu (50,000) ne saku ne trigu wey lalimma ne pulu ne libu (50,000) ne saku ne sibada. Inggimu ran seeye te tatelu ne leg‑un.
6 Purisu, migmaresen si Hutam su migmatinumanen ma sikandin layun te Magbebaye, ne Manama rin.
7 Ne ka duma pad ne guhuren meyitenged te peghari ni Hutam lagkes ka pegpakiggira din wey ka langun ne neyimu rin, nasulat diye te Sulatanan te me Guhuren te me Hari te Israil wey te Huda.
8 Daruwa ne pulu wey lalimma (25) ka idad din te neyimu sikandin ne Hari, wey mighari sikandin diye te Hirusalim te sapulu wey hen‑em (16) ne leg‑un.
9 Ne nataman migpatey e si Hutam wey diye sikandin isabal te Siyudad ni Dabid. Ne si Ahas e ne anak din ka migsubal kandin mighari.