33
Ka peghari ni Manasis te Huda
(2 Hari 21:1-9)
1 Sapulu wey daruwa (12) ka idad ni Manasis te neyimu sikandin ne Hari. Ne mighari sikandin diye te Hirusalim te lalimma ne pulu wey lalimma (55) ne leg‑un.
2 Mareet ka hinimuwan din diye te tangkaan te Magbebaye ne Manama iling te hinimuwan te keet-etawan ne impandeldel te Manama te ware pad ka me matig-Israil.
3 Su impasasindeg din iabey ka me panubaran diye te me bubungan ne impandereetan te amey rin ne si Isikiyas. Migpeyimu man‑e sikandin te me altar ne para ki Baal wey te me sungkaleg ne larawan ni Asira. Ne migsimba degma sikandin wey migpamakey te langun ne eglayag diye te langit.
4 Migpasasindeg pad man‑e sikandin te me altar diye te timplu te Magbebaye, ka inged ne migkahi ka Magbebaye, “Kayi re egkabantug te Hirusalim ka ngaran ku te ware egtamanan.”
5 Ne diye te daruwa ne lama te timplu te Magbebaye, migpeyimu sikandin te me altar te langun ne eglayag diye te langit.
6 Ne minsan ka me anak din, intutung din diye te napu te Bin-Hinum isip igpanubad. Migpalintutuu man‑e sikandin te manenagne, tumanuren, tahalambusen, timbusawen, wey te egmahehane. Mareet ne subla ka inggimu rin diye te tangkaan te Magbebaye wey nabelu ka Magbebaye kandin.
7 Ne ka impeyimu rin ne larawan, intahu din diye te timplu te Manama, ka timplu ne diye kahii te Magbebaye si Dabid wey ka anak din ne si Sulumun, “Egbantuhen a te ware egtamanan kayi te seini ne timplu wey te Hirusalim, ka inged ne in-alam ku puun te langun ne inged te Israil.
8 Kene ku egpaaween ka me matig-Israil te seini ne tane ne imbehey ku te me kaap-apuan dan ke egtumanen dan ka langun ne me balaud ku, wey ka me tulumanen wey ka me suhu ne impanengneng ku kandan ki Muwisis.”
9 Piru newuluan ni Manasis ka keet-etawan te Huda wey te Hirusalim ne eggimu te mareet, wey ka mareet ne inggimu ran labew pad ne mareet du te inggimu te me nasud ne indereetan te Magbebaye te ware pad ka me matig-Israil.
10 Insaparan te Magbebaye si Manasis wey ka keet-etawan piru ware sikandan migpammineg kandin.
11 Purisu impalusuran sikandan te Magbebaye te me pangulu te me sundalu te Asirya. Indakep dan si Manasis, insanggat ka irung, imbaku te keddina ne burunsi, wey in-uyan diye te Babilunya.
12 Te timpu ne neyirapan e sikandin, migpeyid‑u-hid‑u sikandin te Magbebaye ne Manama rin wey amana rin ipariralem ka pegkeetew rin diye te Magbebaye te kaap-apuan din.
13 Mig-ampu sikandin wey narineg te Manama ka pegpeyid‑u-hid‑u rin. Purisu, impalibed sikandin te Magbebaye diye te Hirusalim wey te migharian din. Ne nanengnengan din ne ka Magbebaye iyan ka Manama.
14 Puun dutu, impeyimu e man‑e ni Manasis ka matikang wey makepal ne alad ne batu ne diye te lihawangan te Siyudad ni Dabid—puun te iglineb ne baad te napu te Gihun, peendiye te gumawan ne egngaranan te Gumawan te Isda, wey nakalingut te bubungan te Upil ka impeyimuwan din te matmatikang ne alad. Ne impanahuan din te me kumandir ka langun ne me siyudad te Huda ne in-alad te matikang wey makepal ne batu.
15 Impangawe din diye te timplu te Magbebaye ka me diyus-diyus te duma ne nasud wey ka me larawan. Impangawe din man‑e ka impangimu rin ne me altar diye te bubungan ne natahuan te timplu te Magbebaye wey ka diye te Hirusalim, wey imparegpak din diye te lihawangan te siyudad.
16 Impaay-ayaran din ka altar te Magbebaye wey migpanubad sikandin te igpanubad para te keupianan wey te igpanubad te pegpasalamat. Ne imbanasalan din ka me matig-Huda ne egpamakey te Magbebaye ne Manama te Israil.
17 Migpanubad ded ka me etew diye te me panubaran diye te me bubungan, piru iyan dan e impanubaran ka Magbebaye ne Manama ran.
18 Ka duma pad ne guhuren meyitenged te peghari ni Manasis, ka pegpeyid‑u-hid‑u rin te Manama, wey ka immanlalag te me prupita diye te kandin pinaahi te ngaran te Magbebaye, ka Manama te Israil, nasulat diye te Sulatanan te me Guhuren te me Hari te Israil.
19 Ne ka peg-ampu din, ka pegtabak te Manama te pegpeyid‑u-hid‑u rin, ka langun ne sale din, ka pegsupak din te Manama, ka langun inggimu rin ne me panubaran diye te me bubungan ne para te me diyus-diyus, ka me sungkaleg ne larawan ni Asira, wey ka me larawan ne immangimu rin te ware pad sikandin migpariralem te pegkeetew rin diye te Manama, nasulat diye te Sulatanan te me Guhuren te me prupita.
20 Ne migpatey e sikandin wey diye isabal te palasyu rin. Ne si Amun ne anak din ka migsubal kandin mighari.
Ka peghari ni Amun te Huda
(2 Hari 21:19-26)
21 Daruwa ne pulu wey daruwa (22) ka idad ni Amun te neyimu sikandin ne Hari. Ne mighari sikandin diye te Hirusalim te daruwa ne leg‑un.
22 Mareet ka hinimuwan ni Amun diye te tangkaan te Magbebaye iling te hinimuwan te amey rin ne si Manasis. Migpanubad sikandin wey migpamakey te me diyus-diyus ne impeyimu ni Manasis dengan.
23 Piru ware mule sikandin migpariralem te pegkeetew rin diye te Magbebaye iling te amey rin, ke kene, layun nasi sikandin miggimu te mareet.
24 Ne migplanu te mareet ki Amun ka me upisyal rin wey inggimatayan dan sikandin diye te palasyu rin.
25 Piru impangimatayan te keet-etawan te Huda ka langun ne miggimatey ki Hari Amun. Ne si Husiyas e ne anak din ka impasubal ran kandin paharia.