35
Ka pegsahakeen te Peglihad te Panalihan
(2 Hari 23:21-23)
1 Ne migpasahakeen si Husiyas te Peglihad te Panalihan para te Magbebaye ne Manama diye te Hirusalim. Ne ka me nati te karniru ne para te sahakeen, inggilang dan e te igkasapulu wey hep‑at (14) ne aldew te an-anayan ne bulan.
2 Ne imbehayan ni Husiyas ka me talagpanubad te eggimuwen dan wey imbagget din sikandan te pegpamakey ran diye te timplu te Magbebaye.
3 Ne ka me Libita ne me talagpanulu te Israil ne inlein din eyew egpamakey te Magbebaye, ingkahiyan din, “Itahu niyud ka matulus ne Tahuanan te Kasabutan diye te timplu ne impasasindeg ni Hari Sulumun ne anak ni Dabid. Kenad keilangan ne egtitiangen niyu pad seini. Ne pamakaya niyu ka Magbebaye wey bulihi niyu ka keet-etawan din ne me matig-Israil.
4 Himuwa niyu ka me himu niyu diye te timplu sumale te me pangulu te kabuhalan niyu. Ikula niyu ke nekey ka nasulat ne me suhu ni Dabid ne Hari te Israil wey te anak din ne si Sulumun.
5 Sasindeg kew diye te timplu sumale te me pangulu te kabuhalan niyu, wey bulihi niyu ka me pamilya ne insalig kaniyu ne egpanubad.
6 Gilanga niyu ka nati te karniru ne para te Sahakeen te Peglihad te Panalihan wey linisi niyu ka pegkeetew niyu, wey pangandam kew te pegbulig te duma niyu ne me matig-Israil sumale te insuhu te Magbebaye kaniyu pinaahi ki Muwisis.”
7 Ne migbehey si Husiyas te me ayam din ne tatelu ne pulu ne libu (30,000) ne me karniru wey kambing, wey tatelu ne libu (3,000) ne me baka eyew igpepanubad te me etew te Sahakeen te Peglihad te Panalihan.
8 Ne migbehey degma ka me upisyal rin diye te me etew, diye te me talagpanubad, wey diye te me Libita. Ne migbehey degma ka immamiyalan te timplu ne si Hilkiyas, si Sakariyas, wey si Hihil diye te duma ran ne me talagpanubad, te daruwa ne libu wey hen‑em ne gatus (2,600) ne me karniru wey me kambing, wey tatelu ne gatus (300) ne me baka eyew igmanubad para te sahakeen.
9 Ne ka me pangulu te me Libita ne si Kunaniyas, wey ka me suled din ne si Simayas, si Natanil, si Hasabiya, si Hiil, wey si Husabad, migbehey degma diye te duma ran ne me Libita te lalimma ne libu (5,000) ne me karniru wey me kambing, wey lalimma ne gatus (500) ne me baka eyew igmanubad para te sahakeen.
10 Ne naandam e ka langun wey diyad e degma te timplu ka me talagpanubad wey me Libita, diye te egpasasindehan kandan sumale te suhu te Hari.
11 Ne inggilang e te me Libita ka immanubad ne me karniru wey ka me kambing. Ne ka langesa te immanggilang, imbehey ran diye te me talagpanubad. Ne insawig te me talagpanubad diye te altar ka langesa taheed ne migluluwit pad ka me Libita te me ayam.
12 Ne in-atul ran ibehey diye te tagse me pangulu te kabuhalan te me etew ka igmanubad ne egtutungen eyew igpanubad diye te Magbebaye, sumale te nasulat te libru ni Muwisis. Seeye ded degma ka inggimu ran te me baka.
13 Ne intuug dan ka me ayam ne para te sahakeen sumale te nasulat te suhu, wey ingge-ge dan ka matulus ne igpanubad diye te me kuren, wey diye te kale. In-atul ran seeye ipamehey diye te me etew.
14 Nataman, in-andam e te me Libita ka pegkeen dan wey ka para te me talagpanubad, tenged su ka me talagpanubad ne kabuhalan ni Aarun narusileman ma ne migmanubad te egtutungen wey te me tabe te ayam.
15 Ne ka me talagparahing te instrumintu ne me kabuhalan ni Asap diyad e te egpasasindehan kandan diye te timplu, sumale te me balaud ne imbehey kandan ni Dabid, ni Asap, ni Himan, wey ni Hidutun ne prupita te Hari. Warad mig-awe ka me talagbantey te gumawan te timplu su in-andaman man e sikandan te egkakeen te me karumaan dan ne me Libita.
16 Purisu, neimpusan te seeye ne aldew ka pegsahakeen te Peglihad te Panalihan wey ka pegpanubad te egtutungen diye te altar te Magbebaye sumale te suhu ni Hari Husiyas.
17 Ne miggale-gale ka me matig-Israil ne migtambung te Sahakeen te Peglihad te Panalihan wey te Sahakeen te Paan ne Ware Patulin te pitu ne aldew.
18 Puun te timpu ni prupita Samwil ware de due iling dutu ne Sahakeen te Peglihad te Panalihan. Ware de due sabeka ne Hari te Israil ne nekeyimu te inggimu ni Hari Husiyas wey te me talagpanubad, te me Libita, te langun ne nangugpe te Hirusalim, wey te keet-etawan te Huda wey te Israil.
19 Piru neyimu seeye se Sahakeen te Peglihad te Panalihan te igkasapulu wey walu (18) ne leg‑un te peghari ni Husiyas.
Ka katamanan ne peghari ni Husiyas
(2 Hari 23:28-30)
20 Te neimpusan e ni Husiyas te egbalew-balew ka timplu, inlusuran e ni Niku ne Hari te Ihiptu ka Karkimis ne diye te Weyig ne Iyupratis. Ne miggendiye si Hari Husiyas duma te me sundalu rin eyew te pegpakiggira ki Niku.
21 Piru migsuhu si Niku te suluhuanen diye ki Husiyas ne migkahi, “Kene ka ambag-ambag pakig-ehet keddi Hari te Huda. Kene ne sikeykew ka kuntere ku, ke kene ka nasud ne migpakig-ehet keddi. Egparagdahawen a te Manama te egpakiggira. Migduma sikandin keddi, purisu kene niyu sikandin supaka su kema ke eggimatayan kew nikandin.”
22 Piru ware miglibed si Husiyas wey nasi migsaluub te lein ne kumbale eyew ware egpekeila kandin. Ware sikandin migpammineg te lalag te Manama ne impalalag ki Niku su nasi miggendiye sikandin te napu te Migidu eyew egpakiggira.
23 Ne napane si Hari Husiyas wey migkahi sikandin te me suluhuanen din, “Ipariyu a nikaniyu su dakel ka pali ku.”
24 Purisu, impepamaneug dan sikandin diye te karwahi rin wey impeuntud te sabeka ne karwahi wey in-uyan diye te Hirusalim. Ne migpatey sikandin diye wey insabal diye te sulung ne insbalan ded te me kaap-apuan din. Miglungku ka langun ne keet-etawan te Huda wey te Hirusalim te pegpatey rin.
25 Ne migsulat si prupita Hirimiyas te ulahingen te peglungku para ki Husiyas, wey eg-ulahingen pad seini te langun ne mangngulahing ne lukes wey malitan taman kuntee te pegsuman-suman kandin. Ka seeye ne ulahingen te peglungku, neyimu e ne tulumanen te Israil wey nasulat diye te Baseen te Peglungku.
26 Ka duma pad ne me guhuren meyitenged te peghari ni Husiyas wey ka pegkamatinumanen din te peggimu te langun ne nasulat te Balaud te Magbebaye,
27 puun te an-anayan taman te katamanan, nasulat diye te Baseen te me Hari te Israil wey te Huda.