4
Ka me kasangkapan te timplu
(1 Hari 7:23-51)
1 Ne migpeyimu si Sulumun te altar ne burunsi ne siyam ne mitrus ka kalayat wey siyam degma ne mitrus ka kaluag wey hep‑at wey tenge ne mitrus ka katikang.
2 Ne migpeyimu man‑e sikandin te bubuyahen ne pelenggana ne burunsi ne egtahuan te weyig ne egngaranan te Dahat. Subla te hep‑at ne mitrus ka kaluag wey subla te daruwa ne mitrus ka katikang, wey subla te sapulu wey tatelu (13) ne mitrus ka kalibusen.
3 Ne diye te diddiralem te bibig te pelenggana, inlingutan dayan-dayani te daruwa ne dangdang te egpekeiling te me turu ne baka ne impareket. Me daruwa ne pulu (20) ne baka ka impareket te tagse mitrus.
4 Impapinnuu ka bubuyahen ne pelenggana ne burunsi diye te peka te sapulu wey daruwa (12) ne immangimu ne baka ne immeg-inniyug: tatelu ka nakatangke diye te igkakawanan ne balabahan, tatelu ka nakatangke diye te igkahibang ne balabahan, tatelu ka nakatangke diye te iglineb, wey tatelu ka nakatangke diye te igsile.
5 Senge-rangew ka kakepal te bibig te limuranan te weyig ne iling te bibig te ubab ne nekeiling te bulak ne liryu ne migpamukadkad. Egkatahuan seini te me sapulu wey walu ne libu (18,000) ne gelun ne weyig.
6 Ne migpeyimu man‑e si Sulumun te sapulu (10) ne pelenggana ne lu‑luanan te igmanubad ne egtutungen. Impanahu din ka lalimma diye te igkakawanan ne balabahan wey ka lalimma diye te igkahibang ne balabahan. Ne ka weyig diye te bubuyahen ne pelenggana iyan igpanlu‑lu te me talagpanubad.
7 Ne migpeyimu si Sulumun te sapulu (10) ne bulawan ne tahuanan te sulu sumale te implanu. Ne intahu seini diye te timplu: lalimma ka diye te igkakawanan, wey lalimma degma ka diye te igkahibang.
8 Migpeyimu pad man‑e sikandin te sapulu (10) ne lamisa wey intahu seini diye te timplu, lalimma ka diye te igkakawanan ne balabahan wey lalimma degma ka diye te igkahibang ne balabahan. Ne migpeyimu pad man‑e sikandin te sabeka ne gatus (100) ne yahung ne bulawan.
9 Ne inlamaan din ka timplu te maluag para te me talagpanubad wey duen pad man‑e malmaluag ne lama diye te lihawangan. Ne in-alad din ka me lama wey impeyimuwan din te me gumawan ne impamulitan te burunsi.
10 Ne intahu din ka bubuyahen ne pelenggana ne egngaranan te Dahat diye te marani te elat-elat te igkakawanan ne balabahan wey dapit te igsile ne pikungan te timplu.
11 Miggimu degma si Huram-Abi te kuren, me pala, wey me yahung ne eggamiten te pegpabesik.
Neimpusan ded iya ni Huram-Abi ka langun ne impeyimu ni Sulumun te timplu te Manama. Seini ka immangimu rin:
12 ka daruwa ne sungkaleg; ka daruwa ne pupul te me sungkaleg ne egpekeiling te yahung; ka daruwa ne inlubid ne keddina ne indayan-dayan diye te pupul te me sungkaleg;
13 ka hep‑at ne gatus (400) ne me prutas ne egngaranan te granada ne burunsi ne impamitin te daruwa ne dangdang diye te inlubid ne keddina ne intahu diye te pupul te me sungkaleg;
14 ka me peunturan wey ka me pelenggana ne igmapinnuu;
15 ka tahuanan te weyig ne egngaranan te Dahat wey ka sapulu wey daruwa (12) ne larawan te turu ne baka ne egpeunturan kayi;
16 ka me kuren ne inggimu puun te tane, ka me pala, wey ka derakel ne tinidur.
Impasilak ka langun ne kasangkapan ne burunsi ne impeyimu ni Hari Sulumun ki Huram para te timplu te Magbebaye ne Manama.
17 Diye seini ipeyimu te Hari te napu te Hurdan ne himuwanan te kuren ne tane diye te eletanan te Sukut wey Sirida.
18 Masulug amana ka burunsi ne inggamit ni Sulumun, sikan naa ka ware iya nanengnengi ke pila ne kilu ka nahamit langun.
19 Ne migpeyimu man‑e si Sulumun te seini ne me kasangkapan para te timplu te Manama: ka bulawan ne altar ne eg-unturan te egtutungen; ka me lamisa ne eg-unturan te paan ne ighalad diye te tangkaan te Manama;
20 ka me tahuanan te sulu ne neelin ne bulawan wey ka me sulu kayi ne iyan igteng‑ew diye te Amana ne Matulus ne Sinabeng sumale te implanu;
21 ka indayan-dayan ne neelin ne bulawan ne me bulak, me sulu, wey me sipit;
22 ka igmanempug te pebilu te sulu, ka me pelenggana, ka me tahuanan te insinsu, ka me tahuanan te baha ne neelin ne bulawan. Ka me gumawan te Amana ne Matulus ne Sinabeng, wey ka me gumawan diye te lama te timplu ne impamulitan te bulawan.