☰ 1 Samwil 16
16
Ka peg-itis ki Dabid te lana isip Hari
1 Ne mig-inse ka Magbebaye ne Manama ki Samwil, “Ken‑u ka egkataman ka eglungku tenged te pegsamsamili ku ki Saul isip Hari? Hipenua nu te lana ka sungey ne tahuanan te lana wey hendiye ka te Bitlihim diye ki Hisi su in-alam ku ne Hari ka sabeka te me anak din.”
2 Ne migkahi si Samwil, “Egmenuwen ku te eggendiye? Su ke egkanengnengan seini ni Saul, eggimatayan a nikandin!”
Piru migkahiyan sikandin te Magbebaye, “Uyan ka te beyan ne baka ne ware pad anak wey ke eg-insaan ka, kahii nu, ‘Miggendini a eyew te pegpanubad te mananap ne egtutungen para te Magbebaye.’ 3 Ne hinggata nu si Hisi ne egtambung te pegpanubad wey egnangenan ku sikeykew te eggimuwen nu. Itisi nu te lana ka etew ne in-alam ku ne egkeyimu ne Hari.”
4 Intuman ni Samwil seeye se ingkahi te Magbebaye. Te pegginguma rin diye te Bitlihim, ingkelkel ka me igdatu te lungsud te pegsinug-ung kandin wey mig-inse, “Keupianan naa ka innendini nu kanami?”
5 Ne migkahi sikandin, “Uya, miggendini a eyew te pegpanubad te mananap ne egtutungen para te Magbebaye. Matulusa niyu ka pegkeetew niyu wey duma kew keddi te egpanubad.” Ne inlinisan din degma si Hisi wey ka me anak din, wey ingginggat din sikandan ne egduma te egpanubad.
6 Te pegginguma ran, nakita ni Samwil si Iliyab wey migkahi sikandin diye te suman-suman din, “Sikandin en iya ka in-alam te Magbebaye ne egkeyimu ne Hari.” 7 Piru migkahiyan si Samwil te Magbebaye, “Kene ka pitew te ulaula rin wey te kalayat din su insamsamilian ku sikandin. Kene ne iyan ku egpitawen ka egpitawen te etew ne iyan sika se peglelawa, ke kene, iyan ku egpitawen ka pusung te etew.”
8 Ne in-umew ni Hisi ka anak din ne si Abinadab wey diye din ipabaye te tangkaan ni Samwil. Ne migkahi si Samwil, “Kene degma ne sikandin ka in-alam te Magbebaye.” 9 Ne impalihad e man‑e ni Hisi si Sama diye te tangkaan ni Samwil. Ne migkahi red man‑e si Samwil, “Kene ne sikandin ka in-alam te Magbebaye.” 10 Impalihad ni Hisi diye te tangkaan ni Samwil ka pitu te me anak din wey migkahi si Samwil, “Ware kayi te kandan ka in-alam te Magbebaye.” 11 Ne mig-inse si Samwil ki Hisi, “Seini re iya langun ka me anak nu?”
Migtabak si Hisi, “Duen pad kinaariyan piru migtameng sikandin te karniru.”
Ne migkahiyan ni Samwil si Hisi, “Ipaangey nu sikandin su kene ki egpaminnuu eyew egkeen ke kene sikandin egginguma.” 12 Sikan naa ka impaangey e ni Hisi ka kinaariyan. Malalab-lalab sikandin, mateles ka mata rin, wey mateles sikandin ne egpitawen. Ne migkahiyan te Magbebaye si Samwil, “Sasindeg ka. Itisi nu sikandin te lana, su sikandin ka in-alam ku.” 13 Ne ingkuwa ni Samwil ka sungey ne intahuan te lana wey in-itisan din si Dabid diye te tangkaan te me suled din. Ne sahuhune ne miglene ka Panisingan te Magbebaye diye te kandin wey migpalunggehaat seini diye te kandin te seeye ne aldew. Ne mig-uli e si Samwil diye te Rama.
Ka peg-angey ni Saul ki Dabid
14 Te seeye ne timpu, mig-awe e ka Panisingan te Magbebaye ne Manama diye ki Saul wey egginhinaalreken e sikandin te mareet ne panisingan ne impeuyan te Magbebaye. 15 Ne migkahiyan si Saul te me suluhuanen din, “Mahal ne Hari, iyan egginhinaalrek keykew ka sabeka ne mareet ne panisingan ne impeuyan te Magbebaye. 16 Purisu, tuhuti key ne egpamitew te etew ne egkateu ne egpangelit te alpa. Ne emun ke egginaalreken ka te mareet ne panisingan ne impeuyan te Magbebaye, egpangelit e sikandin te alpa wey egmeupiye e ka eggeramen nu.”
17 Purisu migkahi si Saul, “Ne uya, pamitawi a te etew ne amana egkateu ne eg-ealpa wey uyana niyu sikandin kayi.”
18 Ne sabeka te me kanakan ka migkahi, “Nakanengneng a te due sabeka te me lukes ne anak ni Hisi ne matig-Bitlihim ne egkateu ne eg-ealpa. Mabulut sikandin ne bahani, meupiya ne eglalag, mateles ne egpitawen, wey migduma kandin ka Magbebaye.”
19 Purisu migsuhu si Saul te me etew ne egpahuhuren diye ki Hisi eyew te pegkahi, “Ipeendini nu si Dabid ne anak nu, ka talagtameng te me karniru.” 20 Ne migkuwa si Hisi te sabeka ne asnu wey indulanan din seini te paan wey te sabeka ne puntil ne binu, wey sabeka ne nati te kambing. Ne impeuyan din e seini ki Dabid diye ki Saul. 21 Miggendiye si Dabid ki Saul wey migtrabahu diye te kandin. Ingkeupii amana sikandin ni Saul wey inggimu sikandin ne talag-uyan te me panganiban din. 22 Ne impanagtahaan ni Saul si Hisi te seini ne lalag, “Tuhuti nu ne egpalunggehaat pad si Dabid ne egtrabahu kayi te keddi su igkeupii ku sikandin.” 23 Ne eg-ealpa si Dabid tagse egginaalreken si Saul te mareet ne panisingan ne impeuyan te Magbebaye. Sikan naa ka egkaalipaspasan si Saul wey egmeupiya ka eggeramen din. Ne eg-awe e diye te kandin ka mareet ne panisingan.
☰