19
Ka mareet ne planu ni Saul ki Dabid
1 Ne ingkahiyan ni Saul ka anak din ne si Diyunatan wey ka langun ne me suluhuanen din te egpeyimatayan si Dabid. Piru indakelan ni Diyunatan te geyinawa si Dabid.
2 Purisu ingkahiyan din si Dabid, “Migplanu ka amey ku ne eggimatayan ka, purisu, bantey ke naa kaaselem te maselem, wey heles ka diye te inged ne ware nakataha.
3 Eggendiya a te kamet ne innelesan nu duma te amey ku wey egpakiglalag a kandin meyitenged keykew. Egpanengnengen ku re sikeykew ke nekey ka egkatahaan ku.”
4 Ne in-ay-ayaran ni Diyunatan te eglalag si Saul meyitenged ki Dabid te migkahi, “Ahalen, kene nu ubag dereeti ka suluhuanen nu ne si Dabid tenged su ware sikandin nakasale keykew, wey meupiya ka pegtrabahu rin kayi te keykew.
5 Ware din sumsumana ka egsahapan din te timpu ne migpasikdeley sikandan ki Gulayat wey neyimatayan din iya si Gulayat, wey impepanalu te Magbebaye ne Manama ka Israil. Nakita nu seini wey nahale ka, purisu mania te eggimatayan nu sikandin te ware ma sale din keykew?”
6 Ne migpalintutuu si Saul ki Diyunatan, sikan naa ka migsaad sikandin te manekal ne Magbebaye ne kene din e eggimatayan si Dabid.
7 Nataman, in-umew e ni Diyunatan si Dabid wey innangenan din te langun, wey induma rin e sikandin diye ki Saul. Ne diyad e man‑e si Dabid mig-ugpe ki Saul iling dengan.
8 Ne duen e man‑e gubut. Ne miggipanew si Dabid wey migpakiggire e te me matig-Pilistiya wey masalig ka napatey rin, purisu, namallahuy e ka duma ne me matig-Pilistiya.
9 Sabeka ne timpu, in-umaan si Saul te mareet ne panisingan ne impeuyan te Magbebaye. Te seeye ne timpu, migpinpinnuu sikandin diye te baley rin ne miggehen-gen te deldeg din taheed te mig-ealpa si Dabid.
10 Ne igpakpak e perem sikandin ni Saul diye te alabat pinaahi te pegpilak kandin, piru nakalikay si Dabid wey nakapakpak ka deldeg diye te alabat. Ne migpallahuy e si Dabid wey migpariyu e.
11 Te seini ne karusileman, migsuhu te me etew si Saul peendiye te baley ni Dabid te pegbantey kandin eyew egkeyimatayan e sikandin te pegkamaselem. Piru migkahiyan sikandin te asawa rin ne si Mikal, “Emun ke kene ka egpallahuy te seini ne marusilem, eggimatayan kad kaaselem te maselem.”
12 Sikan naa ka intuntun e ni Mikal si Dabid diye te bintana wey migpallahuy e sikandin wey migpariyu e.
13 Ne migkuwa si Mikal te larawan te diyus-diyus wey impeyibat din diye te hibatanan, wey intahuan din te bulbul te kambing ka ulu kayi, wey in-ulesenan din seini.
14 Te pegginguma te seeye se me insuhu ni Saul eyew te pegdakep ki Dabid, ingkahiyan e sikandan ni Mikal, “Migderalu si Dabid.”
15 Te ingkahiyan dan e si Saul meyitenged kayi, impalibed e sikandan ni Saul te miggenendue, “Uyana niyu si Dabid kayi ne miggibat diye te hibatanan su eggimatayan ku.”
16 Piru te pegseled te seeye se me insuhu ni Saul, nakita ran ne larawan bes te diyus-diyus ka diye te hibatanan wey intahuan te bulbul te kambing ka ulu kayi.
17 Ne mig-insaan ni Saul si Mikal, “Mania te in-akalan a nikeykew wey mania te impepallahuy nu ka kuntere ku?”
Ne migtabak si Mikal, “Migkahiyan a nikandin, ‘Pepallahuya a nikeykew, su ke kene, eggimatayan ku sikeykew!’ ”
18 Ne migpallahuy e wey migpariyu e si Dabid, wey miggendiyad e ki Samwil diye te Rama, ne innangenan din sikandin te langun ne inggimu ni Saul kandin. Ne miggendiyad si Samwil wey si Dabid te Nayut wey diyad mig-ugpe.
19 Ne due nakahuhud ki Saul ne miggenendue, “Diye si Dabid te Nayut ne sakup te Rama.”
20 Purisu migsuhu si Saul te me etew eyew te pegdakep ki Dabid. Te pegginguma ran diye, due nakita ran ne punduk te me prupita ne migpanagne ne impanguluwan ni Samwil. Ne miglene ka Panisingan te Manama diye te me etew ne sinuhu ni Saul, ne dutu, migpanagne e degma sikandan.
21 Te nahuhuran si Saul meyitenged kayi, migsuhu e man‑e sikandin te lein ne me etew, piru migpanagne ded degma sikandan. Te igkatelu ne pegsuhu din te me etew, migpanagne ded man‑e sikandan.
22 Ne mig-uney-uney e si Saul miggendiye te Rama. Te pegginguma rin diye te dakel ne belun diye te Siku, mig-inse e sikandin, “Hendei si Samwil wey si Dabid?” Ne due migtabak, “Diye sikandan te Nayut ne sakup te Rama.”
23 Purisu miggendiyad e sikandin te Nayut ne sakup te Rama. Piru miglenaan ded degma sikandin te Panisingan te Manama wey migpanagne e ka miggipanew taman te nekeuma sikandin diye te Nayut.
24 Ne inluung din ka kumbale din wey migpanagne diye te tangkaan ni Samwil. Ne miggibat sikandin ne migpalawas te intiru ne aldew wey marusilem. Seini ka egpuunan te egkahiyen te me etew ne, “Neyimu bes e degma ne prupita si Saul?”