21
Ka peggendiye ni Dabid te Nub
1 Ne miggendiye si Dabid ki Ahimilik ne talagpanubad diye te Nub. Ne ingkelkel si Ahimilik te pegkakita rin ki Dabid wey mig-inse, “Mania te migsabsabeka ke re? Mania te ware duma nu?”
2 Ne migtabak si Dabid, “Impeendini a te Hari su due igpeyimu keddi wey impanpanayan a nikandin ne kene egpepanugtulen te minsan hentew meyitenged te insuhu din keddi. Insabutan ku ka me sakup ku ne egmegtemuwey key diye te sabeka ne inged.
3 Na, duen ded egkakeen due te keykew? Behayi a te lalimma ne timman ne paan wey ke minsan nekey ne egkakeen due.”
4 Ne migtabak ka talagpanubad, “Te! Ware paan ku kayi ne ware pad ikahalad te Magbebaye ne Manama su sikan naan de se ingkapanubad e. Igbehey ku seini ke sikeykew wey ka me sakup nu, ke ware kew nekewulid te malitan te iyam.”
5 Ne migtabak si Dabid, “Te malehet, igpariyu kanami ka me malitan ke due hipanew ney. Minsan pad kalanganan de ne hipanew keilangan iya ne egmalinis key, wey naan pa iya te seini ne aldew.”
6 Purisu imbehayan sikandin te talagpanubad te paan ne inhalad te Magbebaye su warad man e lein ne paan, ke kene, seeye naan de. Ingkuwa seeye ne paan puun diye te tangkaan te Magbebaye wey inliwanan te meinit ne paan te seeye ded ne aldew.
7 (Te seeye ne aldew, nakasalengan degma ne diye ka sabeka ne suluhuanen ni Saul eyew te pegtuman te sabeka ne tulumanen diye te tangkaan te Magbebaye. Si Duig ka ngaran din ne matig-Idum wey pangulu sikandin te me talagtameng te ayam ni Saul.)
8 Ne mig-insaan ni Dabid si Ahimilik, “Duen naa deldeg nu wey ke kampilan naa? Wara a nekeuyan te kampilan ku wey ke minsan nekey ne panganiban su indalusung a suhua te Hari.”
9 Ne migtabak ka talagpanubad, “Kayi red ka kampilan ni Gulayat, ka matig-Pilistiya ne inggimatayan nu diye te napu te Ila. Imbukusan seini te manggad due te liyu te ipud. Kua nu ke egkeupian ka rue, sikan de iya ka kampilan kayi.”
Ne migtabak si Dabid, “Warad egpekeiling due ne kampilan. Ibehey nud sika keddi.”
Ka peggendiye ni Dabid te Gat
10 Te seeye ne aldew, migpabulus e si Dabid ka egpallahuy ki Saul wey miggendiye ki Hari Akis diye te Gat.
11 Ne migkahi ka me suluhuanen ni Akis, “Si Dabid ma mule sika ne Hari te Israil! Sikandin ka in-ulahingan te me malitan taheed te egsesayew sikandan ne miggenendue, ‘Eglibu-libu ka neyimatayan ni Saul, piru egsapulu ne libu mule ka neyimatayan ni Dabid.’ ”
12 Ne impalemlem ni Dabid ka seeye ne lalag wey naaldek amana sikandin ki Akis ne Hari te Gat.
13 Purisu imbalbalawan ni Dabid ka pegweil-weil rin te egpipitawen sikandin te me etew wey miglilibat sikandin ne egbusawen taheed te diye sikandin te tangkaan dan. Impanulisan din ka me lekeb te gumawan te siyudad wey imbalahad din ka ngingi rin ne egtulayas diye te sumpe din.
14 Ne ingkahiyan ni Akis ka me upisyalis din, “Pitawa niyu sika se etew—egbusawen sikandin! Mania te in-uyan niyu sikandin kayi te keddi?
15 Masulug e ka egbusawen kayi, ne mania te in-uyan niyu pad sika kayi? Kene egkaayun ne egpepamaneyiken ku sikandin te baley ku.”