30
Ka peggule ni Dabid te me Amalikanen
1 Peglihad te tatelu ne aldew, miggingume e si Dabid wey ka me etew rin diye te Siklag wey nanengnengan dan ne inlusuran bes te me Amalikanen ka inged te Nigib wey ka Siklag. Ne natalu ran ka me matig-Siklag wey insilaban dan ka lungsud dan.
2 Ne impandakep dan ka me malitan wey ka tagse sabeka diye, buyag ma wey se bate piru ware minsan sabeka ne innimatayan dan.
3 Te pegginguma ni Dabid duma te me etew rin, nakita ran ne nasilaban e ka inged dan wey impandakep e ka me asawa ran wey me anak dan ne me lukes wey me malitan.
4 Purisu migpataman-taman sikandan migpandalawit taman te warad keseg dan.
5 Ne impandakep degma ka daruwa ne duwey ni Dabid ne si Ahinuwam ne matig-Hisril wey si Abigil ne balu ni Nabal ne matig-Karmil.
6 Ne amana nalaggew si Dabid tenged su migmalalahey ka me etew ne egbebatuwen sikandin tenged te kalaggew ran te pegkarakep te me kabatbataan. Piru inlig‑en si Dabid te Magbebaye ne Manama rin.
7 Ne ingkahiyan ni Dabid ka talagpanubad ne si Abiyatar ne anak ni Ahimilik, “Ne kun la, uyana nu kayi ka ipud.” Sikan naa ka in-uyan e ni Abiyatar seini diye ki Dabid.
8 Ne mig-inse e si Dabid te Magbebaye ne Manama, “Eglupuhen ney naa ka me etew ne miglusud kanami? Egkalupug ney naa sikandan?”
Ne migtabak ka Magbebaye, “Uya, lupuha niyu sikandan su egkeumaan niyu iya sikandan wey egkaluwas ka naddakep.”
9 Purisu inlupug e sikandan ni Dabid duma te hen‑em ne gatus (600) ne me etew taman te nekeuma sikandan diye te bangalug te Bisur. Te pegginguma ran diye, migpalunggehaat de dutu
10 ka daruwa ne gatus (200) ne etew tenged su nabeley-beley e sikandan wey kenad egpakalapas te bangalug. Piru migpabulus mule miglupug si Dabid wey ka hep‑at ne gatus (400) ne me etew.
11 Ne due matig-Ihiptu ne nakita te me etew ni Dabid diye te kamet wey in-uuyan dan e sikandin diye ki Dabid. Imbehayan dan sikandin te weyig wey te egkakeen
12 ne inggimu puun te behas te iggira wey daruwa ne timman ne egkakeen ne hinimu puun te behas te paras tenged su warad iya sikandin nakakeen wey nekeinum te tatelu ne aldew wey marusilem. Te nekeimpus e sikandin ka egkeen, migmanekal e sikandin.
13 Ne mig-insaan sikandin ni Dabid, “Hentew‑a ka ahalen nu wey hendei ka ne mahinged?”
Ne migtabak sikandin, “Sabeka a ne Ihiptuhanen wey suluhuanen te Amalikanen. Tatelu e ne aldew ka miglihad te mig-engkeran a te ahalen ku tenged su migderalu a.
14 Inlusuran ney ka inged te Nigib ne sakup te Huda ne in-ugpaan te me Kiritihanen, wey ka inged ne in-ugpaan te kabuhalan ni Kalib. Ne insilaban ney ka Siklag.”
15 Ne mig-insaan e man‑e sikandin ni Dabid, “Egkaayun naa ne egdumaan key nikeykew diye te ingkekampuwan dan?”
Ne migtabak sikandin, “Pahunlibet ke pa keddi pinaahi te Manama ne kena a nikeykew eggimatayan wey ke igbehey naa diye te ahalen ku, ne egkataman, egdumaan kud e sikaniyu diye te kandan.”
16 Sikan naa, indumaan din e ensi Dabid diye te ingkekampuwan te migpanlusud ne me Amalikanen.
Ne diye, neumaan dan sikandan ne migtalagtag ne migmangekeen, migmangiinum, wey miggale-gale tenged su masalig ka naahew ran puun te me matig-Pilistiya wey puun diye te Huda.
17 Te pegkaliwaswas, migbunsud e migpahiggireey ensi Dabid taman te marusilem. Ne ware minsan sabeka te Amalikanen ne nakapallahuy angin e te seeye se hep‑at ne gatus (400) ne lukes-lukes ne migmanguntud te me kamil.
18 Ne naawi ded ni Dabid ka langun ne naahew te me Amalikanen, lagkes ka daruwa ne duwey rin.
19 Warad iya sikandan nasalini minsan sabeka, bate ma wey ke buyag, lukes ma wey ke malitan, wey te minsan nekey ne naahew te me Amalikanen.
20 Naawi ded degma ni Dabid ka langun ne karniru wey me baka. Ne in-alew pewun‑a te me etew ni Dabid ka me ayam wey migkahi sikandan, “Unag seini ki Dabid.”
21 Te nekeume e ensi Dabid diye bangalug te Bisur, insinug-ung e sikandan te seeye se daruwa ne gatus (200) ne etew rin ne migpalunggehaat de tenged su nabeley-beley e sikandan, wey in-elit-elit sikandan enni Dabid.
22 Piru migkahi ka maddeet wey talaggimu te samuk ne me etew ne migduma ki Dabid, “Kene ta sikandan egbaaran te naahew ta te me Amalikanen tenged su ware ma sikandan migduma kanta. Iyan te re igbehey kandan ka me asawa ran wey me anak dan. Ne egpeyipanawen tad sikandan.”
23 Ne migkahi si Dabid, “Me suled, kene niyu sika himuwa su imbehey sika te Magbebaye kanta. Impangabangan ki nikandin wey impepanalu te migpanlusud kanta.
24 Ware iya eg-uyun te sika se ingkahi niyu. Ka baad te seeye se migpalunggehaat ne migbantey te me kasangkapan ta, iling ded te baad te seeye se migduma diye te giraanan. Egpekeg-iling ka baad ne igbehey te langun.”
25 Puun te seeye ne timpu, inggimu e seini ni Dabid ne balaud wey tulumanen para te me matig-Israil taman kuntee.
Ka pegdasag ni Dabid te me alukuy rin
26 Te pegginguma ni Dabid diye te Siklag, impeuyanan din e te baad te naahew ran ka me igdatu diye te Huda ne me alukuy rin duma te seini ne lalag, “Igdasag ku seini kaniyu puun te naahew ney te me kuntere te Magbebaye ne Manama.”
27 Impeuyanan din degma seeye se me etew ne diye te lungsud te Bitil, Ramut-Nigib, Hatir,
28 Aruwir, Sipmut, Istimuwa,
29 Rakal, wey diye te me lungsud te me Hiramilhanen, diye te me lungsud te me Kinihanen,
30 diye te Hurma, diye te Bur-Asan, diye te Atak,
31 diye te Hibrun, wey diye te langun ne inged ne inleleuhan ni Dabid wey te me etew rin.