9
Ka pegpakigkita ni Saul ki Samwil
1 Due sabeka ne etew ne egngaranan ki Kis ne kabuhalan ni Binhamin. Anak sikandin ni Abiyil, ne anak ni Sisur. Ne si Sisur anak ni Bikurat, ne anak ni Apiya ne kabuhalan ni Binhamin. Si Kis amana ne meyaman ne etew.
2 Due anak ni Kis ne egngaranan ki Saul. Mateles sikandin ne kanakan wey ware egpekeiling te kateles din kayi te Israil. Subla sikandin ne malangkew te langun su ka duma, taman man de te pamanayen din.
3 Sabeka ne aldew, nalaag ka me asnu ni Kis, ne amey ni Saul. Sikan naa ka ingkahiyan din ka anak din ne si Saul, “Duruma ka te sabeka te me suluhuanen ne pamitawa niyu naa ka me asnu.”
4 Ne diye migbaye sikandan te me bubungan te Ipraim wey diye te inged te Salisa piru ware dan nakita ka me asnu. Ne miggendiyad e man‑e sikandan te inged te Saalim piru ware dan ded iya man‑e nakita diye. Ne miggendiyad e sikandan te inged te Binhamin piru ware dan nakita ka me asnu.
5 Te pegginguma ran diye te inged te Sup, migkahiyan e ni Saul ka suluhuanen ne migduma kandin, “Eg-uli kid e su kema ke kenad ne asnu ka igkalaggew te amey ku, ke kene, sikante e ka igkalaggew rin.”
6 Piru migkahiyan sikandin te suluhuanen din, “Ke pa ma ahalen! Due etew te Manama te seini ne siyudad ne amana tahura te me etew su egkatuman ma ka langun ne iglalag din. Eggendiye ki pad kandin su kema ke egkapanulu ki nikandin ke hendei ta egkakita ka me asnu.”
7 Ne mig-insaan ni Saul ka suluhuanen din, “Ke eggendiye ki, nekey naa ka eg-uyanen ta diye te kandin? Naamin e ka pegkeen due te saku ta, ne warad igpakadasag ta te etew te Manama. Ne nekey naa ka igpakabehey ta kandin?”
8 Ne migtabak ka suluhuanen, “Due deisek ne pelata kayi te keddi wey igbehey ku seini kandin eyew egnangenan ki nikandin ke hendei ta egkakita ka me asnu.”
9-11 Ne ingkahiyan ni Saul ka suluhuanen din, “Meupiya. Ne egkuwa kid.” Sikan naa ka nangendiyad e sikandan te lungsud ne in-ugpaan te etew te Manama. Te pegtakereg dan e te bubungan peendiye te lungsud, due nasinug-ung dan ne me mengebay ne egmanakeru. Ne mig-insaan dan sikandan, “Duen ded te siyudad ka due egtanud?”
(Diye dengan te Israil, eggenendue ka egpangi-nginse te Manama, “Eggendiye ki te due egtanud, su ka egngaranan kuntee te prupita, egngaranan dengan te due egtanud.”)
12 Ne migtabak ka me mengebay, “Uya, duen ded. Nasinundul niyu re iya sikandin. Iyal kew su sikan pad iya sikandin migginguma diye te siyudad tenged su egpanubad kuntee ka me etew diye te panubaran diye te bubungan.
13 Te pegseled niyu te siyudad, egkakita niyud sikandin te kene pad sikandin egtakereg diye te panubaran diye te bubungan eyew egkeen. Su kene egkeen ka me etew ne ingginggat ke kene pad sikandin egginguma su keilangan ne egpepanalanginan din pad te Manama ka impanubad. Ke egtakereg kew, sahuhune ne egkakita niyu sikandin.”
14 Purisu miggendiyad e sikandan te siyudad. Te pegseled dan te siyudad, nasinug-ung dan e si Samwil ka eggendiyad te panubaran diye te bubungan.
15 Te aldew ne ware pad migginguma si Saul, impanengneng e te Manama si Samwil te miggenendue,
16 “Te iling kayi ne uras kaaselem, due etew ne kabuhalan ni Binhamin ne egpeendiniyen ku te keykew. Itisi nu sikandin te lana eyew egkeyimu ne pangulu te keet-etawan ku ne Israil. Egluwasen din sikandan puun te me matig-Pilistiya su nakita ku ka me peg-antus dan wey narineg ku ka pegpangananey ran.”
17 Te pegkakita ni Samwil ki Saul, ingkahiyan e sikandin te Manama, “Seini ne etew ka innangen ku keykew ne egmandu te keet-etawan ku.”
18 Ne migparani si Saul ki Samwil diye te gumawan te siyudad wey migkahi, “Egkaayun ne egpanuluen a nikeykew te baley te etew ne due egtanud?”
19 Ne migtabak ni Samwil, “Sikeddi iya ka due egtanud. Hun‑a kad keddi diye te panubaran diye te bubungan su lagpu ke pa keen keddi te seini ne aldew. Ne kaaselem te maselem, egnangenan ku sikeykew te langun ne due te suman-suman nu, ne egkataman, egpeyipanawen kud sikeykew.
20 Kene kad kalaggew meyitenged te me asnu ne natateluwan e ne nallaag su nakite e seeye. Hentew bes ka igkeupii te Israil? Kene naa ne sikeykew wey ke intiru naa ne pamilya te amey nu?”
21 Ne migtabak si Saul, “Kabuhalan e re ni Binhamin, ka subla ne deisek ne tribu kayi te Israil. Ne ka pamilya ku kene ne impurtanti te langun ne pamilya te me kabuhalan ni Binhamin. Purisu, mania te ingkahiyan a nikeykew due?”
22 Ne induma ni Samwil si Saul wey ka suluhuanen din diye te maluag ne keenanan wey diye din ipapinnuu te pinnuuwan te me talahuren duma te me tatelu ne pulu (30) ne etew ne impanginggat.
23 Ne ingkahiyan ni Samwil ka talaggilutu, “Uyana nu kayi ka ngalap ne imparapig ku keykew.”
24 Sikan naa ka ingkuwa te talaggilutu ka bubun duma te kalambuan kayi wey diye itahu te tangkaan ni Saul. Ne ingkahiyan ni Samwil si Saul, “Keena nu sika. Te pegpanginggat ku te me etew, intahahe kud sika eyew igpakeen keykew te seini ne sahakeen.”
Purisu migpakiglagpu si Saul duma ki Samwil.
25 Te pegtupang dan puun te panubaran diye te bubungan peendiye te siyudad, duen e in-andam ne hibatanan diye te atep para ki Saul. Ne diye sikandin miglipereng.
Ka peg-itis ni Samwil ki Saul te lana
26 Te maselem-selem, in-umew ni Samwil si Saul, “Enew kad e su egpeyipanawen kud e sikaniyu.” Sikan naa ka mig-enew e si Saul ne migparumeey e sikandan ki Samwil ka miglihawang.
27 Taheed te egpeendiyad e sikandan te katamanan te siyudad, ingkahiyan e ni Samwil si Saul, “Pewun‑aa nud ka suluhuanen nu wey sanggel ke pa dagdahew su egnangenan ku sikeykew te lalag te Manama.” Purisu miggun-e e ka suluhuanen.