15
Ka peggamba ni Absalum ki Dabid
1 Te neimpusan e seeye, nakakuwa si Absalum te me karwahi wey me kudde, wey lalimma ne pulu (50) ne me suluhuanen ne eggun‑a egpallahuy kandin.
2 Te seeye ne timpu, imbatasan ni Absalum ne egselem-selem eg-enew wey diye egsesasindeg te ilis te dalan peendiye te gumawan te siyudad. Ke due etew ne eglihad ne due kasu ne igpewusey te Hari, eg-umawen din ka etew wey eg-insaan, “Hendei ka egpuun?” Ne egtabak ka etew, “Diya a egpuun te inged ne in-ugpaan te sabeka te me tribu te Israil.”
3 Ne egkahiyan sikandin ni Absalum, “Due katarengan nu te kasu nu. Piru ware sabeka ne imbehayan te Hari te katenged ne egdatu-datu keykew.”
4 Ne egkahi pad iya man‑e si Absalum, “Emun ke egkeyimu e pa iya perem ne talaggusey kayi ne inged, egpakaparani keddi ka tagse sabeka ne due me sumbung wey ke kasu naa, wey egbehayan ku iya sikandan te eleg ne peggukum.”
5 Ne ke due egparani ki Absalum ne eg-usengul diye te tangkaan din, egtinaween din sikandin wey eggen-genan, wey eggarekan.
6 Inggimu seini ni Absalum diye te langun ne matig-Israil ne eggendiye te Hari eyew egpewusey. Te ware naluhey, ingkeupii e te me etew si Absalum wey kenad ne si Dabid.
7 Peglihad te hep‑at ne leg‑un, ingkahiyan ni Absalum si Dabid, “Tuhuti a nikeykew ne eggendiye te Hibrun eyew te pegtuman te saad ku te Magbebaye ne Manama.
8 Taheed te diye e pad te Gisur diye te Aram, migsesaad a te Magbebaye ne Manama ne emun ke egpaliberen a nikandin kayi te Hirusalim, egsimba a kandin diye te Hibrun.”
9 Ne ingkahiyan sikandin te Hari, “Na, up-upiya ka te peggipanew nu!” Purisu miggendiyad si Absalum te Hibrun.
10 Piru miggeles-heles migsuhu si Absalum te me etew peendiye te langun ne tribu te Israil eyew egkahiyan ka me etew, “Te pegkarineg niyu te dahing te trumpita, panguleyi kew naa ne eggenendue, ‘Mighari e si Absalum wey diye sikandin mig-ugpe te Hibrun!’ ”
11 Ne migduma ki Absalum ka daruwa ne gatus (200) ne etew ne matig-Hirusalim ne impanginggat din piru ware kalintahaan dan te planu ni Absalum.
12 Ne taheed te migpanubad si Absalum te me mananap ne egtutungen, impaangey rin e si Ahitupil ne talagtambag ki Dabid puun diye te siyudad te Gilu ne ugpaan din. Te ware naluhey, migmasalig e ka me etew ne eglapig ki Absalum. Purisu migmalig‑en pad iya ka planu rin ne eggamba ki Dabid.
Ka pegpallahuy ni Dabid
13 Due migginguma ne insuhu ne egpahuhuren ki Dabid, “Diyad e miglapig ki Absalum ka me matig-Israil.”
14 Purisu ingkahiyan ni Dabid ka langun ne upisyal rin ne duma rin diye te Hirusalim, “Kuwa kid. Egpamallahuy ki su ke kene, egkarakep ki iya ni Absalum. Eg-iyal-iyal ki su ke kene, egkasapenan ki wey egpangimatayan ki nikandin, lagkes ka langun ne mahinged kayi te siyudad.”
15 Ne migkahiyan si Dabid te me upisyal rin, “Mahal ne Hari, andam key seini se me suluhuanen nu ne eggimu te minsan nekey ne igpeyimu nu kanami.”
16 Purisu miggipanew si Dabid duma te intiru ne pamilya rin. Ne inggaat din de ka sapulu te me duwey rin eyew te pegtanggu te palasyu.
17 Ne miggipanew e si Dabid wey ka me etew rin, wey migsanggel sikandan diye te katamanan ne baley te Hirusalim.
18 Ne impewun‑a ni Dabid ka me upisyal rin lagkes ka me talagbantey kandin ne me Kiritihanen wey me Pilitihanen, wey ka hen‑em ne gatus (600) ne me Gitihanen ne migduma kandin puun te Gat.
19 Ne ingkahiyan ni Dabid si Itay ne pangulu te me Gitihanen, “Mania te migduma ka degma kanami? Libed kad wey duma ka te iyam ne Hari ne si Absalum su lapu ke re wey mig-engkeran nu ka ugpaan nu.
20 Gabii ke pad iya migginguma. Kene egkaayun ne egduma kad man‑e kanami kuntee te egkalaag-laag. Ware ku pad nanengnengi ke hendei key egpabaye, purisu, uli kad wey dumaa nu ka me etew nu. Igpapitew te Magbebaye ne Manama ka geyinawa rin ne kene egkabalbalawan wey ka pegkamatinumanen din kaniyu.”
21 Piru intabak ni Itay ka Hari, “Egpahunlibet a te manekal ne Magbebaye ne Manama wey keykew Mahal ne Hari, ne egduma a iya keykew minsan hendei ka egpabulus, minsan kamatayen pad ka egpangkusan.”
22 Ne ingkahiyan ni Dabid si Itay, “Ne uya, ke iling ma rue ne duma kad iya kanami.” Purisu migdume e si Itay wey ka me etew rin duma te me pamilya ran.
23 Ne migpandalawit ka me etew te Hirusalim taheed te egmanlihad ka me etew ni Dabid. Ne miglihad sikandin duma te langun ne etew rin diye te napu te Kidrun wey migpeendiyad sikandan te disirtu.
24 Ne diye iya degma si Abiyatar wey si Saduk ne me talagpanubad ne migdumaan te langun ne Libita ne migyeyayung te Tahuanan te Kasabutan te Manama. Ne insabuk dan seini diye te tane wey migpanubad si Abiyatar taman te nakalihad e ka langun ne etew ne egpuun te siyudad.
25 Ne migkahiyan ni Dabid si Saduk, “Ilibed niyu red ka Tahuanan te Kasabutan diye te siyudad. Ke igkahale e red te Magbebaye ne Manama, ne igpalibed e red nikandin diye wey egkakita ku red seini, wey ka intahuan kayi.
26 Piru ke ware sikandin nahale keddi ne sikandin e ka balahad ke nekey ka igkeupii rin ne eggimuwen keddi.”
27 Ne ingkahiyan pad man‑e ni Dabid si Saduk ne talagpanubad, “Egpakataha ke naa ke nekey ka egkeyitabu? Libed ka diye te siyudad duma ki Abiyatar wey te anak nu ne si Ahimaas, wey te anak ni Abiyatar ne si Diyunatan. Ne kene kew naa gulub-gulub.
28 Egtetahad a diye te weyig ne lapasanan peendiye te disirtu taman te egpakarawat a te guhuren ne egpuun kaniyu.”
29 Purisu in-uyan e ni Saduk wey ni Abiyatar ka Tahuanan te Kasabutan te miglibed diye te Hirusalim wey migpalunggehaat e sikandan diye.
30 Ne migtakereg si Dabid diye te Bubungan te me Ulibu ne ware migsesandal. Ne imbunbunan din ka ulu rin isip ilaan te peglungku taheed te migsinehew sikandin. Ne imbunbunan degma te langun ne etew ne migduma kandin ka me ulu ran wey migsinehew taheed te migtakereg sikandan.
31 Ne due nakakahi ki Dabid, “Miglapig e si Ahitupil ki Absalum te eggamba keykew.” Sikan naa ka mig-ampu si Dabid, “He Magbebaye ne Manama, himuwa nu ne ware karuan ka me tambag ni Ahitupil.”
32 Te pegginguma ni Dabid diye te puntul te bubungan, ke hendei egsimbaa ka Manama, insinug-ung e sikandin ni Husay ne Arkihanen. Nahisi ka malayat wey mateles ne kumbale din wey due tane diye te ulu rin.
33 Ne ingkahiyan sikandin ni Dabid, “Egpakabanggew ke re keddi, ke egpabulus ka ne egduma.
34 Piru ke eglibed ka diye te siyudad wey egkahiyan nu si Absalum, ‘Himuwa ad ne suluhuanen nu, Mahal ne Hari. Suluhuanen a dengan te amey nu, ne kuntee, egkeyimu ad ne suluhuanen nu,’ ne egkabulihan a nikeykew pinaahi te pegbalabag nu te tambag ni Ahitupil ki Absalum.
35 Diye si Saduk wey si Abiyatar, ka me talagpanubad. Inangen nu kandan ka minsan nekey ne egkarineg nu puun diye te palasyu te Hari.
36 Duma ran diye si Ahimaas ne anak ni Saduk wey si Diyunatan ne anak ni Abiyatar. Ne ipeendini nu naa sikandan keddi eyew te pegpangguhud te langun ne egkarineg nu.”
37 Purisu miglibed e si Husay ne alukuy ni Dabid diye te siyudad. Nakasalengan seeye te pegseled ni Absalum diye te Hirusalim.