19
Ka pegsapad ni Huwab ki Dabid
1 Ne nahuhuran si Huwab te migsinehew wey miglungku ka Hari tenged ki Absalum.
2 Purisu ka kahale te kapanaluwan te seeye ne aldew, neyimu ne kalange te langun ne etew tenged su nakarineg sikandan te miglungku si Dabid tenged te anak din.
3 Te seeye ne aldew, egmangeles-heles de ka me etew ne egseled te siyudad iling te me etew ne nakapallahuy te giraanan ne egkeyilew ne egseled te siyudad.
4 Imbunbunan te Hari ka ulaula rin wey migpanaman-taman sikandin migsinehew, “Anak ku, Absalum! Absalum, anak ku!”
5 Ne miggendiye si Huwab te baley ni Dabid wey ingkahiyan din sikandin, “Impeyilawan nu te seini ne aldew ka me etew nu ne iyan migluwas te umul nu, te umul te me anak nu, wey te umul te langun ne asawa nu, wey te me duwey nu.
6 Inggeyinawaan nu seeye se egkeepes keykew wey ingkeepes nu seeye se miggeyinawa keykew. Impasabut nu ipaayad-ayad te seini ne aldew, ne ware karuan diye te keykew ka me pangulu te me sundalu nu wey ka me etew ran. Nakamaan-maan a kuntee, ne igkahale nu pad ne neuyag si Absalum wey sikanami langun ka migpatey.
7 Purisu kuntee, lihawang ka wey baggeta nu ka me etew nu, su ke kene, igsaad ku te Magbebaye ne Manama ne ware etew ne egpalunggehaat keykew te seini ne marusilem. Ne subla pad seini ne mareet para keykew du te langun ne karereetan ne nabayaan nu puun te pegkabatei nu taman kuntee.”
8 Ne migsasindeg ka Hari wey miggendiyad e te gumawan te siyudad wey migpinnuu sikandin diye. Ne nanengnengan seini te langun wey migparani e sikandan diye te kandin.
Ka peglibed ni Dabid diye te Hirusalim
Te seini ne timpu, namallahuy e ka me matig-Israil peendiye te me ugpaan dan.
9 Ne migmaap-apuley ka langun ne tribu diye te Israil ne migkahi, “Inluwas ki ni Hari Dabid puun te me kuntere ta wey puun te me Pilistihanen, piru nakapallahuy sikandin puun te nasud ta tenged ki Absalum.
10 Piru namatey e te gira si Absalum, ka in-alam ta ne egpangulu kanta. Mania te kene ki egpamitew te paahi ne egpakalibed ded si Dabid isip Hari?”
11 Ne nekeuma diye ki Hari Dabid ka ingkahi te me Israilita. Sikan naa ka migsuhu sikandin ki Saduk wey ki Abiyatar eyew te peg-inse te me igbuyag diye te Huda, “Mania te namewuriyan kew te pegpalibed keddi diye te palasyu ku?
12 Suled ku ma perem sikaniyu wey amana ku pad iya ne me karumaan. Mania te namewuriyan kew te pegpalibed keddi?”
13 Ne kahii niyu degma si Amasa, “Amana ku pad iya sikeykew ne karumaan. Puun kuntee, eggimuwen ku sikeykew ne pangulu te me sundalu ku subal ki Huwab. Egdusaan a perem te mangune-kune te Manama ke kene ku seini eggimuwen.”
14 Ne nabennalan te inlalag ni Dabid ka langun ne matig-Huda wey nasabeke e sikandan. Ne migpanagtahaan dan e si Dabid te miggenendue, “Libed kad e kayi te kanami duma te langun ne suluhuanen nu.”
15 Purisu miglibed e si Dabid. Te pegginguma rin diye te Weyig ne Hurdan, miggendiyad e te Gilgal ka me matig-Huda eyew egsinug-ung wey egbulig kandin te eglapas te Hurdan.
16 Ne mig-iyal-iyal degma si Simii ne anak ni Gira ne matig-Binhamin ne egpuun te Bahurim eyew egduma te egsinug-ung ki Dabid.
17 Migduma kandin ka sabeka ne libu (1,000) ne etew ne egpuun te me kabuhalan ni Binhamin. Ne migduma degma si Siba ne suluhuanen ni Saul duma te sapulu wey lalimma (15) ne anak din ne me lukes wey daruwa ne pulu (20) ne suluhuanen. Ne mig-iyal-iyal sikandan te pegtupang peendiye te Hurdan eyew egsinug-ung te Hari.
18 Ne miglapas sikandan te weyig eyew te pegbulig te pamilya te Hari te peglapas wey eyew te peggimu te minsan nekey ne igkeupii te Hari.
Ka pegkeyid‑u ni Dabid ki Simii
Te hapit e eglapas si Dabid, mig-usengul e si Simii diye te tangkaan din.
19 Ne migkahi sikandin, “Mahal ne Hari, pasayluwe e re ubag te seyyup ne neyimu ku te timpu ne mig-awe ka te Hirusalim. Kene nud ubag seeye sumsumana wey meupiya perem ke eg-aween nud seeye te suman-suman nu.
20 Nakanengneng a te nakasala a, sikan naa ka sikeddi ka miggun‑a miggendini puun te langun ne me kabuhalan ni Husi eyew egsinug-ung keykew te ahalen ku ne Hari.”
21 Piru migkahi si Abisay ne anak ni Siruya, “Keilangan iya ne eggimatayan si Simii tenged te pegdilus din te in-alam te Magbebaye ne Manama.”
22 Ne migtabak si Dabid, “Sikaniyu se me anak ni Siruya, nekey se labet niyu keddi? Iling kew te me kuntere ku te seini ne aldew. Sikeddiey e kuntee ka Hari te Israil wey ware etew ne eggimatayan te seini ne aldew.”
23 Ne migsaaran te Hari si Simii ne kene din eggimatayan sikandin.
Ka pegkeyid‑u ni Dabid ki Mipibusit
24 Ne migtupang degma si Mipibusit ne apu ni Saul diye te Hurdan eyew te pegsinug-ung ki Dabid. Diye sikandin migpuun te Hirusalim. Ware sikandin nakapanlu‑lu te paa rin, ware nakapanumpe, wey ware degma sikandin nakapami‑pi te kumbale din bunsud te peg-awe ni Dabid diye te Hirusalim taman te peglibed din ne ware namenu.
25 Te pegginguma rin diye, mig-insaan e sikandin ni Dabid, “Mipibusit, mania te ware ka migduma keddi?”
26 Ne migtabak sikandin, “Mahal ne Hari, sumale te nanengnengan nu, ne pungku e ma iya. Ingkahiyan ku ka suluhuanen ku ne si Siba te egpasakangan ku ka asnu ku su eyew egpekeuntud a wey egpakaruma keykew. Piru in-akalan a nikandin.
27 Mig-uubat sikandin keykew te kene e kun egduma keykew. Piru egpekeiling ka te panalihan te Manama, Mahal ne Hari, sikan naa ka himuwa nu kayi te keddi ke nekey ka eleg te keykew ne suman-suman.
28 Su eleg ne eggimatayan nu, ahalen ku ne Hari ka intiru ne kabuhalan te apu ku, piru intuhutan a nikeykew ne eglagpu keykew egkeen diye te baley nu. Nekey naan pad ka egbuyuen ku keykew, Hari?”
29 Ne ingkahiyan sikandin te Hari, “Eleg e sika. Nasabeke e ka suman-suman ku ne sikeykew wey si Siba ka egpabaarey te tane.”
30 Piru migkahiyan ni Mipibusit ka Hari, “Mahal ne Hari, ibehey nud e ki Siba ka langun su eleg e keddi ne nekeuli ka diye te baley nu ne ware namenu.”
31 Ne migtupang degma si Barsilay ne matig-Gilyad puun te Ruhilim, eyew egbulig te Hari te eglapas te Weyig ne Hurdan.
32 Buyag e amana si Barsilay—walu e ne pulu (80) ka idad din. Meyaman amana sikandin wey sikandin ka migbehey te pegkeen ni Dabid te diye pad sikandin mig-ugpe te Mahanaim.
33 Ne ingkahiyan te Hari si Barsilay, “Duma ka keddi diye te Hirusalim wey egtangguwen ku sikeykew diye.”
34 Piru migtabak si Barsilay, “Pila bu naan de ne me aldew ka nasame te umul ku, ne mania te egdume e pad keykew diye te Hirusalim, Mahal ne Hari?
35 Walu e ne pulu (80) ka idad ku kuntee. Kena ad e egpekeila ke nekey ka mateles wey mareet. Kene kud e degma egkaneem-neem ka nanam te egkeenen ku wey ke eg-inumen naa. Kena ad e degma egpakarineg te me lukes wey me malitan ne egmangulahing, purisu egpakapabehat e re ke egduma a keykew, Mahal ne Hari.
36 Egdumaan ku re sikeykew te eglapas te Hurdan. Ne kene ne likes ne egdasahan a nikeykew te iling due.
37 Tuhuti a ubag nikeykew ne eg-uli su eyew diya a egpatey te siyudad ku ne marani te insabalan te amey wey iney ku. Piru due suluhuanen nu seini ne si Kimham ne anak ku. Tuhuti nu sikandin ne egduma keykew wey himuwa nu diye te kandin ke nekey ka insuman-suman nu ne meupiya.”
38 Ne migkahi ka Hari, “Egdumeen ku sikandin wey eggimuwen ku diye te kandin ka minsan nekey ne igkahale nu. Ne eggimuwen ku para keykew ka minsan nekey ne igkeupii nu.”
39 Ne miglapas e te Hurdan si Dabid duma te me etew rin. Te nakalapas e sikandan, inggarekan e ni Dabid si Barsilay wey impanalanginan din e sikandin. Ne mig-uli e si Barsilay diye te ugpaan din.
Ka pegpaapuley te me etew te Huda wey te Israil
40 Te nakalapas e ka Hari te Hurdan, miggendiyad e sikandin te Gilgal duma ki Kimham wey te langun ne matig-Huda wey te katenge te me matig-Israil ne migduma kandan te miglapas te Hurdan.
41 Ne miggendiye te Hari ka langun ne me matig-Israil wey ingkahiyan dan sikandin, “Mahal ne Hari, mania te miggeles-heles de ka me suled ney ne matig-Huda te pegbulig keykew, te pamilya nu, wey te langun ne etew nu te peglapas te Hurdan?”
42 Ne migtabak ka langun ne matig-Huda, “Uya su amana ney pad iya ne karumaan ka Hari. Mania te igkabelu niyu seini te ware ma miggastu sikandin te pegkeen para kanami, wey ware degma minsan nekey ne dasag ne imbehey rin kanami?”
43 Ne migtabak ka matig-Israil, “Kene kew suman-suman ne kaniyu re ne Hari si Dabid. Sabeka niyu re ne tribu piru sapulu key mule ne tribu kayi te Israil. Ne mania te inleig-leig key nikaniyu? Kene niyu kalingawi ne sikanami ka nekewun‑a ne migkahi ne igpalibed ded ka Hari.”
Piru masumpit ne eg-apul ka me matig-Huda wey mallangit du te me matig-Israil.