5
Ka pegkeyimu ni Dabid ne Hari te langun ne Israilita
(1 Kru. 11:1-9; 14:1-7)
1 Ne miggendiye ki Dabid diye te Hibrun ka langun ne tribu te Israil wey migkahi, “Amana key pad iya nikeykew ne karumaan.
2 Puun pad dengan, te si Saul pad ka Hari ney, sikeykew e ka migpangulu te me Israilita te pegpakiggira. Ne migkahiyan ka te Magbebaye ne Manama, ‘Sikeykew ka egtanggu te keet-etawan ku ne me Israilita wey egkeyimu ka ne pangulu ran.’ ”
3 Purisu te seeye ne timpu, miggimu e si Dabid te kasabutan te langun ne me igdatu te Israil diye te tangkaan te Magbebaye ne Manama. Ne in-itisan e te me igbuyag te lana ka ulu ni Dabid isip Hari te Israil.
4 Tatelu e ne pulu (30) ka idad ni Dabid te timpu ne neyimu sikandin ne Hari te Israil wey mighari sikandin te hep‑at ne pulu (40) ne leg‑un.
5 Ne mighari sikandin diye te Huda te pitu ne leg‑un wey hen‑em ne bulan te timpu ne diye sikandin mig-ugpe te Hibrun. Nataman, mighari e sikandin diye te Israil wey Huda te tatelu ne pulu wey tatelu (33) ne leg‑un te timpu te diye sikandin mig-ugpe te Hirusalim. Purisu, mighari sikandin te hep‑at ne pulu (40) ne leg‑un langun.
Ka pegkaahew ni Dabid te Hirusalim
6 Sabeka ne aldew, miggendiye si Dabid wey ka me etew rin te Hirusalim eyew te peglusud te me kabuhalan ni Hibus ne mig-ugpe diye. Ne migkahiyan si Dabid te me Hibusihanen, “Kene kew iya egpakaseled kayi te Hirusalim. Iyan niyu re eleg se egbalabahan te me butud wey me piang.” Ne kahiyen dan ne kene iya egpakaseled ensi Dabid.
7 Piru minsan pad due, naahew red enni Dabid ka malig‑en ne inged ne iyan ka Hirusalim, ne nataman ingngaranan e te Siyudad ni Dabid.
8 Te sika ne aldew migkahiyan ni Dabid ka me etew rin, “Minsan hentew seeye se eglusud te me Hibusihanen, diye sikandin egbaye te impabayaan te weyig eyew te pegpangimatey te sika se me butud wey me lepu ne me kuntere ku!” Sikan naa ka due lalag ne miggenendue, “Kene egpakaseled ka me butud wey me lepu diye te timplu.”
9 Te naahew e ni Dabid ka malig‑en ne inged te Hirusalim, diyad e sikandin mig-ugpe wey ingngaranan din e seini te Siyudad ni Dabid. Ne impeyiluahan din pad ka siyudad puun te Milu peendiye te palasyu.
10 Ne nanasnasian pad ka karesen ni Dabid su migduma ma kandin ka Amana ne Maresen ne Magbebaye.
11 Ne migsuhu ka Hari te Tiru ne si Hiram te me suluhuanen din peendiye ki Dabid duma te me talagbebaley wey talagperi te me batu. Ne mig-uyan sikandan te me terusu ne kayu ne sidar eyew eggimuwan si Dabid te palasyu.
12 Ne nanengnengan ni Dabid ne ka Magbebaye ne Manama ka miggimu kandin ne Hari te Israil wey ka amana migpanalangin te migharian din para te keupianan te keet-etawan din ne me matig-Israil.
13 Te nakaalin e si Dabid diye te Hirusalim puun te Hibrun, migduruwey pad sikandin wey migpangasawa pad te masalig ne me malitan ne matig-Hirusalim. Ne migmasalig pad ka me lukes wey me malitan ne me anak din.
14 Seini ka me ngaran te me lukes ne anak din ne neetew diye te Hirusalim: si Samwa, si Subab, si Natan, si Sulumun,
15 si Ibhar, si Ilisuwa, si Nipig, si Hapiya,
16 si Ilisama, si Ilyada, wey si Ilipilit.
Natalu ni Dabid ka me Pilistihanen
(1 Kru. 14:8-17)
17 Te pegkanengnengi te me Pilistihanen ne si Dabid ka in-alam ne Hari te Israil, nanakereg e sikandan langun eyew te pegdakep ki Dabid. Piru nanengnengan seeye ni Dabid, sikan naa ka miggendiyad e sikandin te aputanan ne inged.
18 Ne miggingume e ka me Pilistihanen wey migtalagtag e diye te napu te Ripaim.
19 Purisu mig-inse si Dabid te Magbebaye ne Manama, “Eglusuran ku naa ka me Pilistihanen? Igpareeg nu naa sikandan keddi?”
Ne migtabak ka Magbebaye ne Manama, “Uya, hipanew kad su igpareeg ku iya sikandan keykew.”
20 Purisu miggendiyad ensi Dabid te Baal-Pirasim wey nareeg dan ka me Pilistihanen diye. Ne migkahi si Dabid, “Imparereetan keddi te Magbebaye ne Manama ka me kuntere ku iling te nabusaye ne weyig.” Sikan naa ka ingngaranan ka sika ne inged te Baal-Pirasim.
21 Ne neengkeran e te me Palistihanen ka me diyus-diyus dan diye, wey in-uyan e seeye enni Dabid wey te me etew rin.
22 Ne nataman, nanlibed e man‑e ka me Pilistihanen diye te napu te Ripaim wey migtalagtag e man‑e sikandan diye.
23 Sikan naa ka mig-inse e man‑e si Dabid te Magbebaye ne Manama. Ne migtabak ka Magbebaye ne miggenendue, “Kene kew baye diye te egkatangkaan dan ka eglusud, ke kene, alingkus kew diye te egkeinniyuhan dan wey diye kew naa pangandam ka eglusud kandan te talipag ne marani te me kayu ne balsamu.
24 Emun ke egkarineg niyu ka egwekes-wekes diye te uud te me kayu ne balsamu, lusud kew naan e su sika ka ilaan ne miggun‑a a kaniyu te eglusud te me Pilistihanen.”
25 Purisu inggimu ni Dabid ka insuhu te Magbebaye ne Manama kandin wey impangimatayan dan ka me Pilistihanen puun te Giba taman te Gisir.