9
Ka keupiya ni Dabid ki Mipibusit
1 Sabeka ne aldew, mig-inse si Dabid, “Duen naan pad nasame te pamilya ni Saul? Ke duen pad, eg-upianan ku sikandin tenged ki Diyunatan.”
2 Ne due dengan suluhuanen te pamilya ni Saul ne egngaranan ki Siba. Ne due nakanangen kandin ne egpeendiyeen sikandin ni Dabid. Te pegginguma ni Siba diye, mig-insaan e sikandin ni Dabid, “Sikeykew si Siba?”
Ne migtabak sikandin, “Uya, sikeddi iya seini ahalen.”
3 Ne mig-inse ka Hari, “Duen naan pad nasame te pamilya ni Saul? Ke duen pad, eg-upianan ku sikandin tenged te insaad ku te Manama ne eggimuwen ku.”
Ne migtabak sikandin, “Uya, duen pad sabeka te me anak ni Diyunatan ne nasame. Napungku ka daruwa ne me paa rin.”
4 Ne mig-inse e man‑e ka Hari, “Hendei sikandin?”
Ne migtabak si Siba, “Diye sikandin te siyudad te Lu-Dibar diye te baley ni Makir ne anak ni Amiyil.”
5 Purisu impaangey e sikandin ni Dabid puun diye te Lu-Dibar.
6 Ka ngaran te anak ni Diyunatan, si Mipibusit ne apu ni Saul. Te pegginguma rin diye ki Dabid, mig-usengul e sikandin eyew te pegtahud kandin. Ne mig-inse si Dabid, “Sikeykew si Mipibusit?”
Ne migtabak sikandin, “Uya, sikeddi iya seini ahalen.”
7 Migkahiyan sikandin ni Dabid, “Kene ka kaaldek, su eg-upianan ku sikeykew tenged te amey nu ne si Diyunatan. Ig-uli ku keykew ka langun ne tane te apu nu ne si Saul, wey kayi kad e egkeen layun te baley ku duma keddi.”
8 Ne mig-usengul si Mipibusit ne migkahi, “Iling e re te asu ne napatey ahalen! Mania te igkeyid‑u a nikeykew?”
9 Ne impeumew te Hari ka suluhuanen ni Saul ne si Siba wey ingkahiyan, “Imbehey kud ki Mipibusit ne apu te ahalen nu ka langun ne ki Saul wey te pamilya rin.
10 Sikeykew wey ka anak nu ne me lukes, wey ka me suluhuanen nu ka egbasuk para kandin wey uyana nu diye te kandin ka eg-uma eyew due egkakeen din. Piru eglagpu key e layun ki Mipibusit ka egkeen kayi te baley ku.” Ne si Siba due sapulu wey lalimma (15) ne anak ne lukes wey daruwa ne pulu (20) ne suluhuanen.
11 Ne migkahiyan ni Siba ka Hari, “Uya ahalen ne Hari, eggimuwen ku ka langun ne insuhu nu keddi.”
Puun dutu, eglagpu e layun si Mipibusit ki Hari Dabid te egkeen iling te sabeka te me anak te Hari.
12 Due anak ni Mipibusit ne lukes-lukes ne egngaranan ki Mika. Ne neyimu ne suluhuanen ni Mipibusit ka langun ne mig-ugpe te baley ni Siba.
13 Ne si Mipibusit ne napungku se paa diyad mig-ugpe te Hirusalim tenged su layun ma sikandin eglagpu ki Hari Dabid te egkeen.