10
Ka pegluwas te Huda wey Israil
1 Buyu kew te uran diye te Magbebaye ne Manama te timpu te pegtubu te me pinamula,
su sikandin ma ka migpakikibel wey migpalugsu te uran diye te me etew,
wey te me pinamula diye te me kamet.
2 Migpanginginse ka me etew diye te me diyus-diyus wey te egmahehane.
Piru ware iya karuan te egkahiyen te me diyus-diyus
wey kene ne mallehet ka igguhud te egmahehane.
Kene ne mallehet ka igguhud dan ne me taheinep,
wey ware karuan te pegbagget dan te me etew.
Sika ka egpuunan ne egmanlewuk-lewuk e ka me etew wey egkengabaybayaran e,
iling te me karniru ne nenatarin, wey ware talagtameng.
3 Ne migkahi ka Magbebaye ne Manama,
“Amana a nabelu te me lapu ne iyan migmandu te keet-etawan ku,
wey eglegparan ku iya sikandan.
Sikeddiey ka Amana ne Maresen ne Magbebaye,
wey egleuyen ku ka keet-etawan te Huda,
wey eggimuwen ku sikandan ne mannekal iling te me kudde diye te giraanan.
4 Ne diye te kandan egpuun ka me pangulu ne egpekeiling te pabunsuran ne batu;
seeye se egpekeiling te pes-ek te balungbalung, wey piet te pegpakiggira
wey seeye se langun ne pangulu.
5 Ne egpekeiling sikandan te mannekal ne me sundalu,
wey egmandiekan dan ka me kuntere dan iling te basak diye te deralanen.
Ne egdumaan ku sikandan ka egpakiggira,
wey egkatalu ran ka langun ne kuntere dan, minsan ka migmangudde.
6 “Ne eglig‑enen ku ka keet-etawan te Huda
wey egluwasen ku ka keet-etawan te Israil.
Igmalibed ku sikandan diye te me ugpaan dan,
tenged su neyimenawan ad e kandan.
Sikeddiey ka Magbebaye ne Manama ran,
wey egtabaken ku red ka me peg-ampu dan
iling ded te ware ku sikandan balahara.
7 Ne egpekeiling te mannekal ne me bahani ka keet-etawan te Ipraim.
Egkengahale sikandan iling te me etew ne nangiinum te binu.
Ne ka me anak dan egmakakita dutu
wey egkengahale sikandan tenged te neyimu ku.
8 “Egpangumawen ku ka keet-etawan ku
wey eglibulungen ku sikandan.
Egluwasen ku iya sikandan,
wey egkabuhal-buhal pad sikandan amana iling te dengan.
9 Minsan impegsuwey-suwey ku sikandan diye te duma ne me nasud,
piru egkatanuran e red iya nikandan.
Egkengeuyag ded sikandan,
wey egmekeuli ded duma te me anak dan.
10 Igpalibed ku sikandan puun te Ihiptu
wey eglibulungen ku sikandan puun te Asirya.
Igpeugpe ku sikandan diye te Gilyad wey Libanun,
wey egmasulug sikandan taman te kenad e eg-eleg langun diye.
11 “Egmanlapas sikandan te dahat ne derakel se me bunlud
piru eg-engked ka me bunlud.
Ne minsan ka Weyig ne Nilu, egkeetiyan ke egmanlapas sikandan.
Ne egkaayu-ayu e ka mapegpeggasal ne Asirya
wey egkaawe e ka karesen te Ihiptu.
12 Eglig‑enen ku sikandan su keet-etawan ku ma sikandan,
wey eg-ikul sikandan keddiey.”
Sika ka lalag te Magbebaye ne Manama.