1  ✡ 2Sam 11:1.Te tingsubul e te me pinamula te seeye ne leg‑un, te timpu ne egpangipanew ka me Hari eyew te pegpakiggira, si Huwab ka migpangulu te me sundalu ne miglusud te me Amunihanen wey inlingutan dan ka Raba. Piru si Dabid diye ded mule te Hirusalim. Ne inlusuran ni Huwab ka Raba wey natalu ran seini. 2 Ne miggendiye si Dabid te Raba wey ingkuwa rin ka kuruna ne diye te ulu ni Milkum ne diyus-diyus te me Amunihanen.* Ka lein ne igpasabut te lalag ne “diyus-diyus te me Amunihanen” iyan se “Hari te me Amunihanen.” Ne me tatelu ne pulu wey lalimma (35) ne kilu ka kabehat dutu wey ingkukuruna rin e seini. Ne masulug ka kasangkapan ne nakuwa ni Dabid te seeye ne siyudad. 3 Ne impandakep din e ka me etew te seeye ne me siyudad wey impamehayan din te me gabas, piku, wey me wasey eyew egpatrabahuwen din. Ne iling ded ka inggimu rin te seeye se me etew ne diye te langun ne bariyu te me Amunihanen. Ne mig-uli e diye te Hirusalim si Dabid wey ka langun ne etew.

4 Nataman, migpahiggireey e man‑e ka me Pilistihanen wey ka me matig-Israil diye te Gisir. Ne neyimatayan ni Sibikay ne matig-Husat si Sipay ne kabuhalan te me eleggasi, wey natalu ka me Pilistihanen.

5  ✡ 1Sam 17:4-7.Ne migpahiggireey e man‑e ka me Pilistihanen wey ka me matig-Israil. Ne neyimatayan ni Ilhanan ne anak ni Hair si Lami ne suled ni Gulayat ne matig-Gat ne mabehat wey makepal se deldeg. 6 Ne migpahiggireey e man‑e ka me Pilistihanen wey ka me matig-Israil diye te Gat. Ne due dakel ne etew diye ne hen‑em se kemel te tagse belad wey iling ded degma ka me paa rin, daruwa ne pulu wey hep‑at langun (24). Ne kabuhalan ded degma sikandin te me eleggasi. 7 Ne imbaley-baley rin ka me matig-Israil, purisu innimatayan sikandin ni Diyunatan ne anak ni Simiya ne suled ni Dabid.

8 Seeye ka me kabuhalan te me eleggasi diye te Gat ne impangimatayan ni Dabid wey te me sundalu rin.