1 Ne due etew ne matig-Hisril ne egngaranan ki Nabut. Due parasan din diye te Hisril lenged te palasyu ni Ahab ne Hari te Samarya. 2 Sabeka ne aldew, ingkahiyan sikandin ni Ahab, “Ibehey nud keddi ka parasan nu eyew egpamulaan ku te me gulay su marani man de seini te baley ku. Egliwanan ku re sikeykew te meupiya pad ne parasan, wey ke egkeupian ka, egbayaran ku sikeykew te eleg ne bali.”

3 Piru ingkahiyan ni Nabut si Ahab, “Kene igpabehey te Manama diye te duma ka tane ne napanunud ku te me kaap-apuan ku.”

4 Ne mig-uli e si Ahab ka nasuhey wey nalangetan te inlalag ni Nabut kandin. Miggibat sikandin ka migtangke te alabat wey ware sikandin migkeen. 5 Ne miggendiyaan si Ahab te asawa rin ne si Hisibil wey mig-insaan sikandin, “Mania te nasuhey-suhey ka? Mania te kene ka egkeen?”

6 Ne migtabak si Ahab, “Uya su ingkahiyan ku si Nabut te egbeliyen kud ka parasan din, wey ke egliwanan ku re sikandin te parasan man‑e, piru migbalibad sikandin.”

7 Ne ingkahiyan e sikandin ni Hisibil, “Eg-iling kad e mule te kene ne Hari te Israil! Enew kad wey keen kad e. Kene kad lungku su igbehey ku keykew ka parasan ni Nabut!”

8 Ne impeuyanan e ni Hisibil te me sulat ka me igbuyag wey me upisyal te siyudad ne in-ugpaan ni Nabut pinaahi te ngaran ni Ahab wey impamalehetan din seini te silyu ni Ahab. 9 Ne seini ka insulat din kandan, “Libulunga niyu ka me etew wey puasa kew. Kua niyu naa si Nabut wey papinnuuwa niyu sikandin diye te tangkaan te me etew. 10 Ne kuwa kew naa te daruwa ne me etew ne talaggimu te samuk ne egbayung ki Nabut, wey papinnuuwa niyu diye te tangkaan din. Ne pabayungi niyu kandan si Nabut ne indilus din kun ka Magbebaye ne Manama wey ka Hari ta. Pegkapenga due, uyana niyud sikandin diye te lihawangan te siyudad wey bebatuwa niyu taman te egpatey.”

11 Ne intuman en iya te me igbuyag wey me upisyal te siyudad ka insuhu ni Hisibil kandan diye te sulat. 12 Migpuasa sikandan wey ingkuwa ran si Nabut wey impapinnuu ran sikandin diye te tangkaan te me etew. 13 Ne miggingume e ka daruwa ne etew ne lalung wey migpinnuu e diye te egkatangkaan ni Nabut. Ne imbayungan dan e si Nabut diye te tangkaan te me etew ne miggenendue, “Indilus ni Nabut ka Magbebaye ne Manama wey ka Hari ta.” Ne in-uyan dan e sikandin diye te lihawangan te siyudad wey imbebatu ran e sikandin wey migpatey e. 14 Ne impanengneng dan e si Hisibil ne napatey e si Nabut ka inderegpak dan te batu.

15 Te pegkanengnengi ni Hisibil ne napatey e si Nabut, ingkahiyan din e si Ahab, “Migpatey e si Nabut. Hendiye kad, subali nud ka parasan ne kene din igbelegye keykew.” 16 Ne miggendiyad en iya si Ahab eyew egsubalan din e ka parasan ni Nabut.

17 Ne impanengneng te Magbebaye ne Manama si Ilyas, ka prupita ne matig-Tisbi, 18 “Hendiye ka ki Ahab ne Hari te Israil ne diye mig-ugpe te Samarya. Diye sikandin te parasan ni Nabut kuntee eyew egsubalan din e seini. 19 Kahii nu sikandin, ‘Migkahi ka Magbebaye ne Manama te inggimatayan nud ka etew wey in-ahew nu pad ka tane din. Tenged te inggimu nu, ke hendei pandilei te me asu ka langesa ni Nabut, diye dan ded degma egpandilei ka langesa nu.’ ”

20 Ne ingkahiyan ni Ahab si Ilyas te nekegkite e sikandan, “Te, nasapenan ad bes iya nikeykew te kuntere ku!”

Ne migtabak si Ilyas, “Uya, nasapenan kud iya sikeykew su mareet naan de iya ka inggimu nu diye te Magbebaye ne Manama. 21 Ne seini ka inlalag din keykew: ‘Igpasalerep ku sikeykew te karereetan—egpangimatayan ku ka langun ne lukes ne kabuhalan nu kayi te Israil, uripen ma wey se kene. 22 Egdereetan ku ka me kabuhalan nu iling te pegdereet ku te me kabuhalan ni Hari Hirubuwam ne anak ni Nibat, wey te me kabuhalan ni Hari Baasa ne anak ni Ahiyas. Impasagkilan e red iya nikeykew ne egkabelu, wey sikeykew ka egpuunan ne nakasale ka me Israilita.’ 23  ✡ 2Har 9:36.Ne meyitenged degma ki Hisibil, migkahi ka Magbebaye ne Manama, ‘Egkeenen si Hisibil te me asu diye te siyudad te Hisril.’ 24 Ne egpatey ka langun ne me kabuhalan nu diye te siyudad, wey egpangeenen ded degma sikandan te me asu, wey egpangeenen te me manuk-manuk ka egpamatey diye te unayan.”

25 Warad iya egpekeiling te mareet naan de iya ne inggimu ni Ahab diye te Magbebaye ne Manama, tenged te asawa rin ne si Hisibil ne layun egbanasal kandin te mareet. 26 Malindit naan de iya ka hinimuwan din su migsimba ma sikandin te me diyus-diyus, iling te inggimu te me Amurihanen ne imparelrel te Magbebaye ne Manama te me Israilita puun te tane dan su eyew egpekeugpe kayi ka me Israilita.

27 Te narineg e seini ni Ahab, inggisi din e ka kumbale din wey migsaluub e sikandin te saku, wey migpuasa. Ne miglipereng sikandin ne saku re se kumbale wey malungasuy naan de iya sikandin.

28 Ne impanengneng e man‑e te Magbebaye ne Manama si Ilyas, 29 “Nakita nu ka pegpariralem ni Ahab te pegkeetew rin keddiey? Puun su inggimu rin ma seini, kene kud igpasalerep ka me kabuhalan din taman te egpatey sikandin. Piru iyan e egpakasalerep ka me kabuhalan din ke iyan e eghari ka anak din.”