Ka hun‑a ne baseen ni
Samwil
Igpewun‑a
Nahuhud te seini ne baseen ka meyitenged te keet-etawan te nasud ne Israil te timpu ne si Samwil pad ka pangulu ran taman te nakasubal e si Saul ne migpangulu kandan. Ne si Saul ka an-anayan ne Hari. Nahuhud degma te seini ne baseen ke nekey ka egpuunan ne naawaan si Saul te katungdanan din isip Hari, wey impasubalan e sikandin te Manama ki Dabid.
Te ware pad Hari dengan te Israil, iyan pad in-isip te me etew ne Hari dan ka Manama. Piru mighangyu sikandan te Manama ne egbehayan te Hari ne egpangulu kandan. Ne igkeupii te Manama ne egparuma-ruma ka Hari wey ka me etew te pegmandu din wey te kandin ne peggukum. Su ka langun ne katenged te etew, meyaman ma wey se egkaayu-ayu, keilangan ne egpekeuyun te Balaud te Manama.
Ka uluwan te seini ne baseen sika se pegkamatinumanen te Manama ne diye egpangkus te kapanaluwan, wey ka pegsupak te igkeupii te Manama ne diye egpangkus te karereetan. Naay-ayaran sika nalalag te Manama diye te kapitulu 2:30 ne miggenendue, “Ka migtahud keddi, egtahuren ku degma wey ka miglemet keddi, eglemetan ku degma.”
Ka nenasulat te seini ne baseen
Ka talaggukum te Israil ne si Samwil 1:1–7:17
Neyimu si Saul ne Hari 8:1–10:27
Ka hun‑a ne leg‑un te peghari ni Saul 11:1–15:35
Si Dabid wey si Saul 16:1–30:31
Ka pegkapatey ni Saul wey te me anak din ne me lukes 31:1-13
1
Si Ilkana wey ka pamilya rin diye te Silu
1 Due sabeka ne etew ne matig-Rama* Te Hibruwanen: Ramataim Supim. ne diye te bubungan te Ipraim.† Te Hibruwanen: Ipratahanen. Ka ngaran din si Ilkana—anak sikandin ni Hiruham ne anak ni Ilihu. Si Ilihu, anak ni Tuhu ne anak ni Sup ne sakup te me kabuhalan ni Ipraim. 2 Si Ilkana due daruwa ne asawa: si Hana wey si Pinina. Due me anak ni Pinina piru ware mule ki Hana.
3 Ne tagse leg‑un, egtakereg ensi Ilkana diye te Silu eyew egsimba wey egpanubad te Amana ne Maresen ne Magbebaye. Ne iyan talagpanubad te Magbebaye ne Manama ka daruwa ne anak ni Ili ne si Hupni wey Pinihas.
4 Te timpu ne egpanubad si Ilkana, egbaaran din ka asawa rin ne si Pinina wey ka me anak dan ne me malitan wey me lukes. 5 Piru egdakelen din mule ka ki Hana tenged su inggeyinawaan din sikandin minsan ware sikandin paanaka te Magbebaye. 6 Ne tenged su kene egpakaanak si Hana, layun de sikandin egdali-dii te duwey rin ne si Pinina. 7 Seini ka egkeyitabu te tagse leg‑un: Egdali-dian ni Pinina si Hana tagse eggendiye sikandin te baley te Magbebaye. Sikan naa ka egpakasinehew naan de sikandin wey kene egkeen. 8 Ne mig-insaan sikandin ni Ilkana, “Hana, mania te egsinehew ka, kene egkeen, wey mania te eglungku ka? Kene e bes pad ne eleg keykew su eg-awes ke pad te sapulu ne anak ne lukes?”
Si Hana wey si Ili
9 Te nekeimpus e sikandan ka egkeen wey eg-inum diye te Silu, migsasindeg si Hana wey mig-awe e dutu. Ne diyad e sikandin migsasindeg te marani te baley te Magbebaye. Ne si Ili ne talagpanubad, diye migpinnuu te marani te sungkaleg te gumawan. 10 Amana ne masakit ka pusung ni Hana, sikan naa ka mig-ampu sikandin te Magbebaye wey migpanaman-taman migpandalawit. 11 ✡ Num 6:5.Ne migsaad sikandin ne migkahi, “He Amana ne Maresen ne Magbebaye, pitawa nu ka peglungku ku te suluhuanen nu, wey tantanuri a nikeykew wey kena a kalingawi. Ke egbehayan a nikeykew te anak ne lukes, igbehey ku red sikandin keykew eyew egpamakey sikandin keykew te intiru ne umul rin, wey kene ku iya egpatempuhan ka bulbul rin.”‡ Ka etew ne kene egtempuhan ka bulbul iyan ilaan te pegpamakey rin te Magbebaye ne Manama taman te egpatey sikandin.
12 Ne taheed te migpabulus sikandin ka mig-ampu te Magbebaye, intetengtengan ni Ili ka bibig din. 13 Indiralem de ni Hana te eg-ampu wey bibig din de ka egkaweil-weil wey kene egkarineg ka laheng din. Sikan naa ka migsuman-suman si Ili ne newubug sikandin. 14 Ne migkahiyan din sikandin, “Ken‑u ke pad egpeeneng-eneng ka eg-inum? Kene kad e inum!”
15 Ne migtabak si Hana, “Ahalen, wara a newubug. Wara a mig-inum te binu wey ke inumen naa ne egpekewubug, ke kene, due ingkalaggew ku amana wey impalihawang ku re seeye diye te Magbebaye. 16 Kene ka suman-suman ne mareet a ne malitan. Mig-ampu a kayi tenged su amana ne masakit ka pusung ku wey miglungku a amana.”
17 Ne migtabak si Ili, “Ew! Na, hipanew kad ne malinawen wey egbehayan ka te Manama te Israil te imbuyu nu kandin.” 18 Ne migkahi si Hana, “Ahalen, salamat de te keupiya nu keddi.” Ne miggipanew e sikandin wey migkeen e, wey warad sikandin miglungku.
Ka peglesut ni Samwil wey peghalad kandin
19 Te seup e ne aldew, migselem-selem mig-enew si Ilkana duma te pamilya rin ne migsimba te Magbebaye. Te nekeimpus e sikandan, nanguli e sikandan diye te baley ran diye te Rama. Ne migguliran ni Ilkana si Hana wey intabak te Magbebaye ka peg-ampu din. 20 Te pegginguma te eleg ne timpu, naberes e si Hana wey mig-anak te lukes ne bate. Ingngaranan din sikandin ki Samwil§ Ka igpasabut te Samwil, ngaran te Manama. te migkahi, “Imbuyu ku sikandin te Magbebaye.”
21 Te seup ne leg‑un, migtakereg e man‑e si Ilkana duma te intiru ne pamilya rin diye te Silu eyew te pegpanubad diye te Magbebaye te tagse leg‑un, wey te pegtuman te saad din. 22 Piru ware migduma si Hana kandan. Migkahiyan din de ka iglukes din, “Eyra, wey ad eggendiye ke egkalutas e ka bate. Eg-uyanen ku sikandin diye te baley te Magbebaye eyew ighalad wey diyad e sikandin eg-ugpe taman te egpatey sikandin.” 23 Migtabak si Ilkana, “Uya, himuwa nu ka insuman-suman nu ne meupiya, ugpe ke pa iya kayi taman te egkalutas e ka bate. Ne egbulihan ka perem te Magbebaye te pegtuman te saad nu kandin.”* Igpes-ek perem te Magbebaye ne Manama ka lalag din. Sikan naa ka migpalunggehaat de si Hana diye te baley wey intanggu rin ka bate taman te nalutas e.
24 Te nalutas e ka bate, in-uyan e sikandin ni Hana wey ni Ilkana diye te baley te Magbebaye diye te Silu. Ne mig-uyan degma sikandan te turu ne baka ne tatelu ne leg‑un se kabuyahi wey senge-saku ne harina, wey sabeka ne puntil ne laplap te mananap ne intahuan te binu. Ne bate pad iya si Samwil te seeye ne timpu. 25 Te nahilang dan e ka baka, in-uyan dan e ka bate diye ki Ili. 26 Ne migkahiyan ni Hana si Ili, “Ahalen, sikeddi seeye se malitan ne nakita nu dengan kayi ne mig-ampu te Magbebaye. Mengeyibet pad te pegkeetew nu. 27 Seini ne bate ka in-ampu ku te Magbebaye. Indineg din ka seeye ne peg-ampu ku. 28 Sikan naa ka igbehey ku red degma sikandin te Magbebaye eyew egpamakey sikandin te intiru ne umul rin.”
Ne insimba ran† Te Hibruwanen: rin. ka Magbebaye diye.
*1:1 Te Hibruwanen: Ramataim Supim.
†1:1 Te Hibruwanen: Ipratahanen.
‡1:11 Ka etew ne kene egtempuhan ka bulbul iyan ilaan te pegpamakey rin te Magbebaye ne Manama taman te egpatey sikandin.
§1:20 Ka igpasabut te Samwil, ngaran te Manama.
*1:23 Igpes-ek perem te Magbebaye ne Manama ka lalag din.
†1:28 Te Hibruwanen: rin.