1 Te seeye ne timpu, migpamakey te Magbebaye ne Manama si Samwil pinaahi te peg-ikul te me suhu ni Ili. Te seeye ne timpu, salimbeka naan de egpeuyan te lalag ka Magbebaye wey salimbeka naan de ka igmakita rin.

2 Te seeye ne timpu, kenad amana egpakameleg-meleg si Ili. Sabeka ne marusilem, miglipereng e sikandin diye te eggibhibatan din. 3 Ne si Samwil, diye miglipereng te timplu te Magbebaye ne intahuan te Tahuanan te Kasabutan. Te kene pad egkapawe, te migsiha pad ka sulu te Manama, 4 in-umew te Magbebaye si Samwil te migkahi, “Samwil! Samwil!” Ne mig-inse sikandin, “Nekey‑a ahalen?” 5 Ne migpallahuy e sikandin peendiye ki Ili ne mig-inse, “Mania te in-umew a nikeykew ahalen?”

Piru migtabak si Ili, “Ware ku umawa sikeykew. Libed kad lipereng.” Purisu miglibed e sikandin wey miggibat e.

6 Piru mig-abey e man‑e mig-umew ka Magbebaye ne migkahi, “Samwil!” Ne mig-enew si Samwil wey miggendiye ki Ili wey migkahi, “Mania te in-umew ad e man‑e nikeykew ahalen?”

Piru migkahi si Ili, “Tatu, ware ku umawa sikeykew. Libed kad lipereng.”

7 Te seini ne timpu, ware pad nekeila si Samwil te Magbebaye tenged su ware pad migpakiglalag kandin ka Magbebaye. 8 Te igkatelu e ne peg-umew te Magbebaye ki Samwil, mig-enew sikandin wey miggendiye ki Ili wey migkahi, “Mania te in-umew ad man‑e nikeykew ahalen?”

Ne dutu, nasabut e ni Ili ne ka Magbebaye bes ka mig-umew te bate. 9 Sikan naa ka ingkahiyan din e si Samwil, “Libed kad hibat wey emun ke eg-abayan ka eg-umawa, tabaka nu sikandin te eggenendue, ‘Lalag ka, Magbebaye ne Manama, su egpammineg a se suluhuanen nu.’ ” Sikan naa ka miggendiyad e sikandin te sinabeng din wey miggibat e mig-abey.

10 Migpakita ka Manama wey migsasindeg diye te lenged ni Samwil, ne migpangumew iling te hun‑a, “Samwil! Samwil!”

Ne migtabak si Samwil, “Lalag ka, Magbebaye, su egpammineg a se suluhuanen nu.”

11 Ne migkahiyan te Magbebaye si Samwil, “Mahaan kud e eggimuwa ka eggimuwen ku kayi te Israil. Ne egkaaldek iya ka langun ne egpakarineg kayi. 12 Te sika ne aldew, eggimuwen kud e diye ki Ili ka langun ne ingkahi ku meyitenged te pamilya rin. 13 Ne ingkahiyan kud e sikandin te mahaan kud e egduseyi te ware egtamanan ka pamilya rin tenged te sale te me anak din ne me lukes ne iyan ka pegbaley-baley ran keddi. Natahaan din seeye piru ware din sikandan sapari. 14 Sikan naa ka migpahunlibet a diye te pamilya ni Ili ne kene iya egkaawe ka me sale dan te ware egtamanan pinaahi te pegpanubad wey ke halad naa.”

15 Ne miglipereng si Samwil taman te maselem. Te mig-enew e sikandin, inlukatan din ka me gumawan te baley te Magbebaye. Naaldek si Samwil ne egnangen ki Ili te impakita te Magbebaye kandin. 16 Piru in-umew sikandin ni Ili ne migkahi, “Tatu, Samwil.”

Ne migtabak si Samwil, “Nekey ahalen?”

17 Ne mig-inse si Ili, “Nekey‑a ka inlalag te Magbebaye keykew? Kene nu seini iheles keddi. Egdusaan ka te Magbebaye te mangune-kune ke kene nu ignangen keddi ka langun ne inlalag din keykew.” 18 Sikan naa ka innangenan e sikandin ni Samwil wey warad iya inneles din kandin. Ne migkahi si Ili, “Magbebaye seeye, wey igpeyimu kandin ke nekey ka meupiya diye te kandin.”

19 Migtulin si Samwil ne migdumaan te Magbebaye wey natuman iya ka langun ne inlalag din. 20 Ne nakataha ka langun ne me matig-Israil puun te Dan peendiye te Birsiba ne malehet si Samwil ne prupita te Magbebaye. 21 Ne migpabulus migpakita ka Magbebaye wey migpanengneng ki Samwil diye te Silu pinaahi te pegpakiglalag kandin.