1 Te seeye ne timpu, miglibulung ka me sundalu te me matig-Pilistiya diye te Suku ne sakup te Huda eyew egpakiggira. Diye sikandan migkekampu te Ipis-Damin ne elat-elat te Suku wey te Asika. 2 Ne miglibulung degma si Saul duma te me matig-Israil wey migkekampu diye te napu te Ila, wey migpangandam sikandan eyew egpakiggira te me matig-Pilistiya. 3 Ne migmanasindeg ne migpatalipahey te bubungan ka me matig-Pilistiya wey ka me matig-Israil. Ne due napu diye te eletanan dan.

4 Ne due sabeka ne etew ne miglihawang puun te kampu te me matig-Pilistiya ne egngaranan ki Gulayat ne matig-Gat. Mangngateu sikandin ne egpakiggira wey me tatelu ne mitrus ka kalayat din. 5 Migsaluub sikandin te hilmit ne burunsi wey due degma burunsi ne inhagpi rin te kumeng din ne me lalimma ne pulu wey pitu (57) ne kilu ka kabehat. 6 Ne insaluuban din degma te burunsi ka me lisen din wey migsel-ey sikandin te kampilan ne burunsi. 7 Mabehat wey makepal ka deldeg din, wey putew se pupul kayi ne due me pitu ne kilu se kabehat. Ne miggun‑a kandin ka talag-uyan te kalasag din. 8 Migsasindeg sikandin wey impanguleyian din ka me matig-Israil, “Mania te seini kew langun ka egpakiggira? Sabeka a ne matig-Pilistiya ne bahani wey sikaniyu me suluhuanen ni Saul. Alam kew te sabeka ne etew eyew egpakigsikdel keddi! 9 Ke egkeelehan a nikandin wey egkeyimatayan a nikandin, egkeyimu key e ne me suluhuanen niyu. Piru ke egkatalu ku sikandin wey egkapatey, egkeyimu kew e ne me suluhuanen ney wey egpamakey kanami.” 10 Ne migkahi si Gulayat, “Me sundalu te Israil, hentew kaniyu ka eg-atu keddiey? Ipeendini niyu ka sabeka ne etew su egpasikdeley key.” 11 Te pegkarineg dutu ni Saul wey te langun ne me matig-Israil, nangelkel e sikandan langun wey nenaaldek amana.

12 Si Dabid, anak te matig-Iprata ne egngaranan ki Hisi ne diye mig-ugpe te Bitlihim ne sakup te Huda. Due walu ne me lukes ne me anak ni Hisi. Te peghari ni Saul, buyag e amana sikandin. 13 Ne migduma ki Saul ka tatelu ne kakey te me anak ni Hisi diye te giraanan. Sikandan si Iliyab ka kinakakayan, si Abinadab ka igkarangeb, wey si Sama ka igkatelu. 14 Ne si Dabid ka kinaariyan. Ne ka tatelu ne kakey rin, egduma-ruma ki Saul te egpakiggira, 15 ne sikandin, eg-uli-uli de mule puun diye ki Saul su egtameng ma sikandin te me karniru te amey rin diye te Bitlihim.

16 Ne inlelalisan ni Gulayat ka me matig-Israil te tagse aldew wey marusilem te hep‑at ne pulu (40) ne aldew.

17 Ne ingkahiyan ni Hisi ka anak din ne si Dabid, “Kua nu seini se me liware te saku ne trigu ne insandag wey sapulu ne timman ne paan wey dagdahawi nu uyana diye te me suled nu diye te kampu. 18 Uyana nu degma diye te pangulu te sundalu seini se sapulu ne timman ne egkakeen ne egngaranan te kisu, wey pangemustaa nu degma ka peg-ugpe te me suled nu. Te peg-uli nu, uyan ka te minsan nekey ne egpamalehet ne meupiya red sikandan. 19 Diye kuntee te napu te Ila si Saul wey ka me suled nu, wey ka langun ne me matig-Israil, ka egpakiggira te me matig-Pilistiya.”

20 Purisu te seup ne aldew, migselem-selem mig-enew si Dabid wey inggaat din ka me karniru diye te sabeka ne talagtameng, wey miggipanew e sikandin ne in-uyan din ka egkakeen sumale te insuhu ni Hisi kandin. Te pegginguma rin diye te kampu te me matig-Israil, egligwang e ka me sundalu ne migmanguleyi eyew egpakiggira. 21 Ne migpatangkeey e ka me matig-Israil wey ka me matig-Pilistiya ne andam e ne egpahiggireey. 22 Ne inggaat ni Dabid ka inuyanan din diye te talagtameng te me kasangkapan wey migpallahuy diye te migluyud ne me sundalu eyew te pegpangemusta te me suled din. 23 Taheed te migpakiglalag pad sikandin kandan, mig-awe e mule puun te punduk te me sundalu si Gulayat, ka Pilistihanen ne matig-Gat ne mangngateu ne egpakiggira wey inlelalisan din e man‑e ka me matig-Israil, wey narineg seeye ni Dabid. 24 Te pegkakita te me matig-Israil ki Gulayat, amana sikandan nenaaldek wey namallahuy e. 25 Ne migmalalahey sikandan ne miggenendue, “Nakita niyu sika se etew ne egpatakereg? Migtakereg iya sikandin eyew te peglelalis te me matig-Israil. Ne egbehayan te Hari te dakel ne karatuan ka seeye se egpakapatey kandin wey igpaasawa rin pad kandin ka anak din ne malitan. Ne kene pad iya man‑e egpabayaren te buhis te Israil ka pamilya te amey rin.”

26 Ne mig-inse si Dabid te etew ne diye te marani rin, “Nekey‑a ka igdasag te seeye se etew ne egpakapatey te sika ne matig-Pilistiya wey egpakaluwas te Israil puun te pegkeyilew? Hentew‑a sika se matig-Pilistiya ne ware migpalintutuu te Manama* Te Hibruwanen: luep. ne miglelalis te me sundalu te manekal ne Manama?” 27 Ne innangenan sikandin te me etew meyitenged te dasag ne egkarawat te seeye se etew ne egpakapatey ki Gulayat.

28 Ne nabelu amana si Iliyab, ka kinakakayan ne suled ni Dabid te pegkarineg te migpakiglalag sikandin te me etew. Ne migkahiyan din si Dabid, “Mania te miggendini ka? Hentew‑a ka inggaatan nu te pila-pila ne karniru ta diye te disirtu? Nakanengneng a te pegkaambug nu, wey te kareet te suman-suman nu. Miggendini ke re eyew te pegpitew te gira.”

29 Migkahi si Dabid, “Nekey‑a ka neyimu ku ne mareet? Mig-inse e man de!” 30 Mig-inniyug si Dabid wey mig-inse e man‑e sikandin diye te lein ne me etew te sikan ded ne inse wey iling ded te hun‑a ne tabak ka intabak te me etew kandin.

31 Te pegkarineg te me etew te ingkahi ni Dabid, innangen dan e seini ki Saul wey impakuwe e ni Saul si Dabid. 32 Ingkahiyan ni Dabid si Saul, “Ware sabeka kanta ne eleg ne egkaliyasan te sika ne matig-Pilistiya. Sikeddi se suluhuanen nu, egpakig-ehet kandin.”

33 Ne migtabak si Saul, “Kene ke pad ne eleg ne egpakig-ehet te sika ne matig-Pilistiya su egkankanakan ke pad wey bahani e mule sikandin bunsud pad te pegkabate din.”

34 Piru migtabak si Dabid, “Nakapaney a ne talagtameng te me karniru te amey ku. Ke due liyun wey ke usu naa ne egdawi te nati te karniru puun te punduk, 35 eglupuhen ku seeye wey eglampesan, wey eg-ahawen ku ka karniru ne migbange din. Ke egbaliyung seini keddi, eggen-genan ku ka sumpe din, eglampesan, wey eggimatayan ku. 36 Nakapatey a te liyun wey te usu, ne sika se matig-Pilistiya ne ware migpalintutu te Manama† Te Hibruwanen: luep. egpekeiling te seeye se nangimatayan ku tenged su inhanggat din ma ka me sundalu te manekal ne Manama.” 37 Ne migpabulus si Dabid ka miglalag, “Inluwas a te Magbebaye puun te liyun wey te usu, purisu egluwasen e red degma nikandin puun te sika ne matig-Pilistiya.”

Ne ingkahiyan ni Saul si Dabid, “Ne ayun kad iya ka egpakig-ehet kandin wey egdumaan ka te Magbebaye!” 38 Ne impakukumbale ni Saul si Dabid te kumbale din te egpakiggira wey impasaluub din sikandin te hilmit ne burunsi, wey impaagpiyan din te burunsi ka kumeng din. 39 Insiniket ni Dabid ka kampilan ni Saul wey mig-eleg-eleg miggipanew piru egkewuyut sikandin tenged su ware sikandin nalayam kayi, sikan naa ka ingkahiyan din si Saul, “Egkewuyut a ke egsaluub a kayi su wara a nalayam.” Purisu inluung ni Dabid seeye. 40 Ne ingkuwa rin ka tuked din wey mig-alam sikandin te lalimma ne batu ne mallurung diye te bangalug wey intahu din diye te puyungut din te egtameng te karniru. Ne migparani si Dabid ki Gulayat ne mig-uyan te lambuyug.

41 Ne migsinug-ung degma ki Dabid si Gulayat ne miggun‑a kandin ka talag-uyan te me kalasag din. 42 Te namelmelehan e ni Gulayat si Dabid, inlemetan din e sikandin tenged su egkankanakan mem pad sikandin wey malalab-lalab ka beneng, wey mateles sikandin ne egpitawen. 43 Ne ingkahiyan din si Dabid, “Mania, asu a su eg-uyan ke re te tuked ka egparani keddi?” Ne indilus din e si Dabid pinaahi te me manama rin. 44 Migkahi sikandin, “Dani ka keddi su igpakeen ku te me manuk-manuk wey te me mahintalunan ka sapu nu.”

45 Ne ingkahiyan ni Dabid si Gulayat, “Migdani ka keddi ne mig-uyan te kampilan, deldeg, wey pungyal piru migdani a keykew pinaahi te ngaran te Amana ne Maresen ne Magbebaye, ne iyan ka Manama te me sundalu te Israil ne inlemetan nu. 46 Te seini ne aldew igbehey ka te Magbebaye keddi. Eggimatayan ku sikeykew wey egtempuhen ku ka lieg nu. Igpakeen ku te me manuk-manuk wey te me mahintalunan ne mananap ka nammatey ne me sundalu ne matig-Pilistiya eyew egkanengnengan te intiru ne kalibutan ne due Manama te Israil. 47 Ne egpakanengneng ka langun ne miglibulung kayi te egpangabang ka Magbebaye te me etew rin; kene ne pinaahi te kampilan wey te deldeg, su iyan egpakig-ehet ka Manama wey igpareeg kew nikandin kanami.”

48 Taheed te egparani e si Gulayat ki Dabid eyew eggimatey kandin, migsinug-ung e degma si Dabid peendiye ki Gulayat eyew te peggimatey degma kandin. 49 Migsikep si Dabid te batu diye te puyungut din wey imbala rin e te lambuyug din, ne intileng din e seini, wey impatummawan din ka buked ni Gulayat. Ne nakalebeng ka batu diye te buked din wey napeled e sikandin ne nakalangkeb diye te tane. 50  ✡ 2Sam 21:19.Purisu, natalu ni Dabid si Gulayat pinaahi re te lambuyug wey te batu. Napatey ni Dabid si Gulayat minsan ware kampilan din. 51  ✡ 2Sam 21:19.Ne migpallahuy si Dabid peendiye ki Gulayat wey migsasindeg diye te andang din. Ne inggulabut din e ka kampilan ni Gulayat wey innimatayan din e sikandin, wey intempug e ka ulu.

Te pegkakita te me matig-Pilistiya te namatey e ka mangngateu ran ne egpakiggira, namallahuy e sikandan. 52 Ne migmanguleyi ka me matig-Israil wey Huda, wey inlupug dan ka me matig-Pilistiya puun te Gat taman te kasunguwan te Ikrun. Natalagtag ka migpatey ne me matig-Pilistiya puun te dalan peendiye te Saraim taman te Gat wey Ikrun. 53 Te nekeimpus e sikandan ka eglupug te me matig-Pilistiya, migmanlibed e sikandan wey impanguwa ran e ka me kasangkapan te me matig-Pilistiya ne neneengkeran diye te kampu. 54 Ne ingkuwa ni Dabid ka ulu ni Gulayat wey in-uyan din seini diye te Hirusalim, piru diye din itahu te balungbalung din ka kasangkapan ni Gulayat.

55 Te pegkakita ni Saul ki Dabid te migparani ki Gulayat, in-insaan din e si Abnir, ka pangulu te me sundalu te miggenendue, “Abnir, hentew‑a anak te sika ne kanakan?”

Ne migtabak si Abnir, “Mahal ne Hari, egpahunlibet a te umul nu, wara a nakanengneng.”

56 Ne migkahi ka Hari, “Nengnengi nu ke hentew anak te sika ne kanakan.”

57 Te nekeuli e si Dabid puun te peggimatey ki Gulayat, indume e sikandin ni Abnir diye ki Saul. Ne in-uyan-uyan de due ni Dabid ka ulu ni Gulayat. 58 Ne mig-insaan sikandin ni Saul, “Tatu, hentew‑a ka amey nu?”

Ne migtabak si Dabid, “Anak a te suluhuanen nu ne si Hisi ne matig-Bitlihim.”