1 Ne migpallahuy e si Dabid puun te Nayut ne sakup te Rama wey miggendiyad e ki Diyunatan wey mig-inse, “Nekey ka neyimu ku ne mareet? Nekey ka sale ku te amey nu? Mania te eggimatayan a nikandin?”

2 Ne migtabak si Diyunatan, “Kene egkeyitabu sika! Kene ka egpatey. Ware minsan nekey ne eggimuwen te amey ku, dakel ma wey se deisek, ne kene igpanengneng keddi. Kene din iya iggeles keddi ka planu rin, purisu kene ne malehet sika se ingkahi nu.”

3 Piru migtabak si Dabid, “Nakanengneng amana ka amey nu te eglapig ka keddi wey migkahi sikandin te suman-suman din, ‘Keilangan ne kene egpakataha si Diyunatan kayi su kema ke eglungku sikandin.’ Egpahunlibet a iya keykew pinaahi te manekal ne Magbebaye ne Manama ne kena ad e egkaluhey.”

4 Ne migkahiyan ni Diyunatan si Dabid, “Eggimuwen ku ka minsan nekey ne igpeyimu nu keddi.”

5  ✡ Num 28:11.Ne ingkahiyan ni Dabid si Diyunatan, “Kaaselem ka pegsahakeen te pegbunsud te Iyam ne Bulan. Egkeen a perem duma te Hari piru tuhuti a ne eggeles diye te kamet taman ikaruwa te marusilem. 6 Emun ke egpamitew ka amey nu keddi, kahii nu sikandin te mighangyu si Dabid ne egdagdahew eg-uli diye te Bitlihim eyew egduma te intiru ne pamilya rin te peghalad te mananap ne egtutungen ne eggimuwen te tagse leg‑un. 7 Ke egkahi sikandin, ‘Meupiya,’ migpasabut naa ne ware mareet ne suman-suman din keddi, piru ke egkabelu sikandin, migpasabut naa ne due mareet ne suman-suman din keddi. 8 Purisu keyid‑u ka keddi tenged te inggimu nu ne kasabutan duma keddi diye te tangkaan te Magbebaye. Piru ke due sale ku, sikeykew e mule mismu ka eggimatey keddi. Mania te eg-uyanen e pad nikeykew diye te amey nu?”

9 Ne migkahi si Diyunatan, “Kene ku egkeyimu sika. Ke nakanengneng e pa ne due suman-suman te amey ku ne egdereet keykew, egnangenan ku iya sikeykew.”

10 Ne migkahiyan ni Dabid si Diyunatan, “Hentew pad ka egpakanangen keddi ke mareet ka tabak te amey nu wey egkabelu keddi?”

11 Ne migkahiyan ni Diyunatan si Dabid, “Kuwa kid. Eggendiye ki te kamet.” Sikan naa ka miggendiyad e sikandan.

12 Ne migkahiyan ni Diyunatan si Dabid, “Egsaad a keykew diye te tangkaan te Magbebaye te Israil ne egnengnengan ku te iling kayi ne uras kaaselem wey ke ikaruwa naa ke nabelu naa ka amey ku keykew. Ne egnangenan ku re sikeykew ke ware sikandin nabelu keykew. 13 Piru ke egkeupian iya ka amey ku ne eggimatayan ka, egdusaan a perem te Magbebaye ke kene ku sikeykew egpanengnengen wey egpepallahuyen. Egdumaan ka te Magbebaye iling te pegduma rin dengan te amey ku. 14 Taheed te manekal e pad, meupiya perem ne egdakelan a nikeykew te geyinawa iling te peggeyinawa te Magbebaye keddiey eyew kena a egkapatey. 15  ✡ 2Sam 9:1.Ipabulus nu ka keupiya nu te pamilya ku taman te ware egtamanan minsan egpangimatayan e te Magbebaye ka langun ne me kuntere nu kayi te ampew te tane.” 16 Ne miggimu si Diyunatan te kasabutan te pamilya ni Dabid ne kene egkalingew kandin ka me kabuhalan ni Dabid wey migpanubadtubad ne egsulian te Magbebaye ne Manama ka me kuntere ni Dabid.

17 Ne impasaad e man‑e ni Diyunatan si Dabid te peggeyinawa kandin su inggeyinawaan din si Dabid iling te pegkeetew rin. 18 Ne migkahiyan ni Diyunatan si Dabid, “Kaaselem ka pegsahakeen te pegbunsud te Iyam ne Bulan, wey egpakasahimanu iya te amey ku ne ware ka tenged su ware ma egpakapinnuu te pinnuuwan nu. 19 Te ikatelu, egkatahaan en iya ne ware ka, sikan naa ka hendiye ka te inged ne innelesan nu dengan wey diye ke pa uugpe te limang te inlimud ne me batu. 20 Ne egpana a te katatelu diye te kakiliran ne hendue ubag te due impane ku. 21 Ne igpakuwa ku te bate ka me tunud te egkahi, ‘Pamitawa nu seeye se me tunud.’ Ke egkahiyan ku ka bate, ‘Pitawa nu ka me tunud due te kakiliran nu. Pangua nu wey uyana nu kayi,’ singkalahan, ligwang ka su igsaad ku keykew pinaahi te manekal ne Magbebaye ne ware eleg ne igkaaldek nu wey ware igkangilam. 22 Piru ke egkahiyan ku ka bate, ‘Pitawa nu ka me tunud seeye te kewun‑aan nu,’ singkalahan, ayun kad su egpepallahuyen ka te Magbebaye. 23 Ne ka meyitenged te sabut ta, ka Magbebaye de ka talagpamalehet ta taman te ware egtamanan.”

24 Purisu, miggeles e si Dabid diye te kamet. Te pegginguma te sahakeen te pegbunsud te Iyam ne Bulan, migpinnuu e si Hari Saul eyew egkeen. 25 Ne diye sikandin migpinnuu te egpinpinnuuwan din lenged te alabat wey diye si Diyunatan te katangkaan din wey si Abnir ka andang ni Saul. Piru ware migpinnuu diye te pinnuuwan ni Dabid.

26 Ne ware lalahan ni Saul te seeye ne aldew su migsuman-suman sikandin ne due neyimu ni Dabid ne nakalindit kandin, sikan naa ka kene sikandin ne likes ne egtambung te sahakeen. 27 Te igkarangeb ne aldew te pegsahakeen te pegbunsud te Iyam ne Bulan, ware ded man‑e si Dabid. Ne dutu, mig-insaan e ni Saul si Diyunatan ne anak din, “Mania te ware miggendini gabii wey kuntee ka anak ni Hisi ne si Dabid eyew te pegtambung te sahakeen?”

28 Ne migtabak si Diyunatan, “Mighangyu sikandin keddi ne eggendiye te Bitlihim. 29 Migkahi sikandin, ‘Ipeendiye e pa te pamilya ku su egpanubad sikandan te mananap ne egtutungen diye te lungsud, wey egpatambungen a te me suled ku. Purisu ke egkaayun ubag keykew ne peyipanawe e pa eyew egpakigkita te me suled ku.’ Sika ka egpuunan ne ware sikandin nekeendini.”

30 Ne nabelu amana si Saul ki Diyunatan wey migkahi, “Masinupaken ka wey ungel ne anak!* Te Hibruwanen: Anak ka te mareet wey masinupaken ne malitan! Nakanengneng a ne migpangabangan nu si Dabid! Impeyilawan nu ka pegkeetew nu wey ka iney nu! 31 Su taheed te neuyag pad ka anak ni Hisi kayi te ampew te tane, kene ka iya egkeyimu ne Hari te nasud. Sikan naa, ipaangey nu sikandin wey ipeuyan nu kayi su keilangan ne eggimatayan sikandin!”

32 Ne mig-inse si Diyunatan ki Saul, “Mania te keilangan iya sikandin ne eggimatayan? Nekey bes ka neyimu rin?”

33 Piru impilak ni Saul si Diyunatan te deldeg eyew eggimatayan perem. Purisu, nanengnengan ni Diyunatan ne eggimatayan iya te amey rin si Dabid. 34 Ne migsasindeg si Diyunatan puun te lamisa ne nabelu-belu wey ware migkeen te seeye ne aldew te sahakeen te pegbunsud te Iyam ne Bulan tenged su miglungku sikandin ki Dabid, su mekeyilew-hilew ka inggimu te amey rin ki Dabid. 35 Te pegkamaselem, miggendiye si Diyunatan te kamet duma te bate eyew egpakigkita ki Dabid sumale te kasabutan dan. 36 Ne migkahiyan din ka bate, “Pallahuy ka wey pamitawa nu ka tunud ne igpane ku.” Te pegpallahuy e te bate, impane din e ka tunud diye te kewun‑aan te bate. 37 Te peggingume e te bate diye te nalenaan te tunud, impanguleyian e ni Diyunatan ka bate, “Seeye pad te kewun‑aan nu ka tunud!” 38 Ne in-umew rin e ka bate, “Iyal ka! Kene ka lamu-lamu rue!” Purisu ingkuwe e te bate ka tunud wey miglibed e diye te ahalen din. 39 Piru ware kalintahaan te bate te seini se langun. Si Diyunatan de wey si Dabid ka nakataha te igpasabut te seeye ne me lalag. 40 Ne impeuyan ni Diyunatan te bate ka me panganiban din wey ingkahiyan, “Uli kad wey uyana nu seini diye te siyudad.”

41 Te warad e ka bate, migsasindeg e degma si Dabid diye te limang te inlimud ne me batu. Nataman, migpanimbuel e sikandin wey mig-usengul te katatelu diye te tane. Ne migpakepkepey† Te Hibruwanen: migpaarekey. si Dabid wey si Diyunatan wey migpasinehawey piru subla ne migsinehew si Dabid. 42 Ne ingkahiyan ni Diyunatan si Dabid, “Hipanew kad e ne kene kema kabantali. Egbulihan ki te Magbebaye ne Manama te saad ta kandin ne egpaalukuyey ki wey sikandin ka talagpamalehet ta taman te me kabuhalan ta te ware egtamanan.” Ne miggipanew e si Dabid wey mig-uli e degma si Diyunatan diye te siyudad.