1 Te igkatatelu ne pulu wey hen‑em (36) ne leg‑un te peghari ni Asa, inlusuran ni Baasa ne Hari te Israil ka Huda. In-alad ni Baasa te matikang wey makepal ne batu ka siyudad te Rama eyew ware minsan hentew ne egpakalihawang wey egpakaseled diye te inged ni Asa ne Hari te Huda. 2 Seeye naa ka ingkuwa ni Asa ka me pelata wey ka me bulawan puun te sinabeng ne tinesanan te timplu te Magbebaye ne Manama wey te palasyu rin, wey impeuyan din seini diye ki Bin-Hadad ne Hari te Sirya ne diye mig-ugpe te Damasku. Impanahaan din si Bin-Hadad te migkahi, 3 “Eggimu ki te kasabutan ne egpalapihey ki, iling te inggimu te me amey ta. Ne kua nu naa ka impeuyan ku keykew ne pelata wey bulawan. Ne tempuha nud naa ka peglapig nu ki Baasa ne Hari te Israil eyew eg-awe e sikandin te tane ku.”

4 Ne mig-uyun si Bin-Hadad ki Hari Asa, wey migpeuyan sikandin te me pangulu te sundalu rin ne eglusud te me siyudad te Israil, wey naahew ran ka Iyun, ka Dan, ka Abil-Mayim, wey ka langun ne me siyudad ne tinesanan diye te Naptali. 5 Te pegkarineg dutu ni Baasa, migsanggel e sikandin ka eg-alad te Rama wey in-engkeran din e ka himu. 6 Ne insuhu ni Hari Asa ka me lukes te Huda ne egpanguen ka me batu wey me geed ne inggamit ni Baasa diye te Rama. Ne inggamit e degma seeye ni Asa eyew eggimuwen ne matikang, wey makepal ne alad te Giba wey Mispa.

7 Te seeye ne timpu miggendiye si prupita Hanani ki Hari Asa diye te Huda wey ingkahiyan din sikandin, “Tenged te migsuladlad ka te Hari te Sirya wey ware diye te Magbebaye nu, egpakapallahuy e nasi puun keykew ka me sundalu te Hari te Sirya.* ‘egpakapallahuy e nasi puun keykew ka me sundalu te Hari te Sirya’ iyan igpasabut se ‘kene nud e egkatalu pad ka me sundalu te Hari te Sirya.’ 8 Ware ke bes nakasuman-suman ke nekey ka natamanan te me matig-Itiyupiya wey matig-Libya ne susuluhi ne me sundalu, me karwahi wey te migmangudde? Tenged te pegsuladlad nu te Magbebaye, impatalu rin sikandan kaniyu. 9 Egpipitew ka Magbebaye te intiru ne kalibutan eyew egbehey te keseg te seeye se mapahetpet ne egsalig kandin. Keungelan ka inggimu nu, puun kuntee masulug e ka eglusud keykew.” 10 Ne nabelu-belu si Asa te prupita, tenged dutu impaprisu rin sikandin. Te seeye ded ne timpu, imbaybayaran din patamtamani ka duma ne keet-etawan din.

11 Ne ka neneyimu ni Asa puun te an-anayan taman te katamanan, nasulat diye te Sulatanan te me Guhuren te me Hari te Huda wey te Israil. 12 Ne te igkatatelu ne pulu wey siyam (39) ne leg‑un te peghari ni Asa, duen e dalu te paa rin, wey miglahetlet seini. Piru minsan ke duen e dalu rin, ware ded iya man‑e sikandin migpangananey te Manama su diye mule te me talagbawi. 13 Ne migpatey† Te Hibruwanen: miggibat sikandin duma te me amey rin. si Asa te igkeep‑at ne pulu wey sabeka (41) ne leg‑un te peghari din. 14 Diye sikandin isabal te sulung ne sabalanan ne impeyimu rin mismu eyew egsabalan kandin diye te Siyudad ni Dabid. Diye isabal sikandin te neempet te me peemut wey migduruluk ka me etew eyew egbantug kandin.