1 Daruwa ne pulu (20) ka idad ni Ahas te neyimu sikandin ne Hari, wey mighari sikandin te Hirusalim te sapulu wey hen‑em (16) ne leg‑un. Mareet ka hinimuwan din diye te tangkaan te Magbebaye ne Manama, kene ne iling te hinimuwan te kaapuan din ne si Dabid. 2 Mig-ikul sikandin te maddeet ne hinimuwan te me Hari te Israil wey miggimu sikandin te me larawan ni Baal. 3 Migtutung sikandin te insinsu diye te napu te Bin-Hinum wey intutung din ka anak din isip igpanubad. In-ikul rin ka maddeet ne hinimuwan te keet-etawan ne impandeldel te Magbebaye te ware pad ka me matig-Israil. 4 Ne migpanubad sikandin wey migtutung te insinsu diye te me panubaran diye te me bubungan, wey diye te me labuntud wey diye te me lebut te kayu ne malapung.

5  ✡ 2Har 16:5; Isa 7:1.Purisu, impatalu te Magbebaye sikandin te Hari te Sirya* Te Hibruwanen: Aram. wey narakep ka masulug ne keet-etawan din diye te Damasku. Ne impatalu man‑e sikandin te me sundalu te Hari te Israil ne nakahule te keet-etawan din. 6 Su si Pika ne Hari te Israil ne anak ni Rimala, nakapatey te sabeka ne gatus wey daruwa ne pulu ne libu (120,000) ne mabbulut ne sundalu te matig-Huda te sabeka re ne aldew. Neyitabu te me matig-Huda seeye su in-engkeran dan ma ka Magbebaye, ka Manama te me kabuybuhayan dan. 7 Ne si Sikri ne bahani te Israil, nakapatey ki Maasiyas ne anak ni Hari Ahas, ki Askiram ne impiyalan te palasyu, wey ki Ilkana ne talagbulig te Hari. 8 Nakarakep ka me matig-Israil te daruwa ne gatus ne libu (200,000) ne karumaan dan pad iya ne me malitan wey me bate. Masulug man‑e ka naahew ran wey impanguyan dan diye te Samarya.

9 Piru due prupita te Magbebaye ne egngaranan ki Ubid ne diye mig-ugpe te siyudad te Samarya. Insinug-ung din ka me sundalu te Samarya wey migkahiyan din, “Imbehey kaniyu te Magbebaye, ne Manama niyu ka Huda tenged te nabelu sikandin kandan. Piru impangimatayan niyu sikandan te ware pegkeyid‑u, wey nanengnengan sika te Manama diye te langit. 10 Ne kuntee, igkeupii niyu pad ne eg-uripenen niyu ka me lukes wey me malitan ne egpuun te Huda wey te Hirusalim? Kahiyen niyu buwa ne ware kew nakasale te Magbebaye? 11 Ne pammineg kew keddi! Ilibed niyu ka karumaan niyu ne indakep niyu su mig-ebel-ebel e ka langet te Magbebaye kaniyu.”

12 Ne due me pangulu te Israil ne si Asariyas ne anak ni Diyuhanan, si Birikiyas ne anak ni Misilimut, si Hihiskiya ne anak ni Salum wey si Amasa ne anak ni Hadlay ne migsapad degma te seeye se migmambubunu. 13 Ne migkahi sikandan, “Kene niyu uyana ka nandakep niyu kayi! Igkeupii niyu buwa ne egkatimulan ka sale ta diye te Magbebaye? Dakel e amana ka sale ta wey mig-ebel-ebel e ka langet te Magbebaye te Israil.” 14 Purisu, in-engkeran e te me sundalu ne naatul te me panganiban ka nandakep dan wey ka naahew ran diye te tangkaan te me pangulu wey te langun ne keet-etawan. 15 Ne migparani seeye se hep‑at ne pangulu diye te impandakep wey impamehayan dan te igsaluub seeye se migpalawas puun te kasangkapan dan ne naahew te me sundalu. Imbehayan dan sikandan te igsaluub, sandal, egkakeen, egkeinum, wey imbawian dan ka me pali dan. Impeuntud dan te me asnu ka me mahuye wey impalibed diye te me lungsud dan diye te Hiriku, ka siyudad te me kayu ne palmira. Ne miglibed e seeye se me pangulu diye te Samarya.

16-17 Te seeye ne timpu, migpepangabang si Hari Ahas te Hari te Asirya su inlusuran e man‑e te me matig-Idum ka Huda wey natalu iya ka Huda, wey impandakep ka duma ne mahinged diye. 18 Te seeye ded ne timpu, inlusuran degma te me Pilistihanen ka me lungsud ne diye te lenlen te me bubungan te Huda† Te Hibruwanen: Sipila. wey ka diye te igkakawanan ne balabahan. Naahew ran ka Bit-Simis, Ayalun, Gidirut, Suku, Timna wey Gimsu lagkes ka me bariyu ne nakalingut diye. 19 Impatalu te Magbebaye ka Huda su intuhutan ma ni Hari Ahas ka keet-etawan din ne eggimu te sale wey warad iya migtuman te Magbebaye. 20 Purisu te pegginguma ni Tiglatpilisir ne Hari te Asirya, nasi din mule baybayari si Ahas. 21 Seeye naa ka migpanguwa si Ahas te me karatuan ne diye te timplu te Magbebaye, diye te palasyu, wey diye te me baley te me upisyal wey imbehey rin seini diye te Hari te Asirya. Piru ware seini nakabulig kandin.

22 Ne neulat de iya ne ware migmatinumanen si Ahas te Magbebaye te neyirapan e sikandin. 23 Migpanubad sikandin diye te me diyus-diyus te Damasku ne nakatalu kandin. Su migkahi sikandin, “Migbulihan te seini ne me manama ka Hari te Sirya. Purisu, egpanubad a te seini ne me manama eyew egbulihan a nikandan.” Piru seeye ka nakarereet kandin wey te Israil. 24 Ne impanguwa ni Ahas ka me kasangkapan te timplu te Manama wey impanlupet din seini. Inlekeban din ka timplu wey migpasasindeg sikandin te me altar diye te tagse pikungan diye te Hirusalim. 25 Ne migpasasindeg man‑e sikandin te me panubaran diye te me bubungan te langun ne lungsud te Huda eyew diye egpanubad te me diyus-diyus. Purisu nalangetan kandin ka Magbebaye, ka Manama te me kaap-apuan dan.

26 Ne ka duma pad ne guhuren meyitenged te peghari ni Ahas wey te me hinimuwan din puun te an-anayan taman te katamanan, nasulat diye te Sulatanan te me Guhuren te me Hari te Huda wey Israil. 27  ✡ Isa 14:28.Ne migpatey si Ahas wey diye sikandin isabal te siyudad te Hirusalim, piru kene ne diye te sulung ne sabalanan te me Hari te Israil. Ne si Isikiyas e ne anak din ka migsubal kandin mighari.