1  ✡ Hir 3:6.Walu pad ka idad ni Husiyas te migbunsud sikandin mighari. Ne mighari sikandin te Hirusalim te tatelu ne pulu wey sabeka (31) ne leg‑un. 2 Meupiya ka hinimuwan din diye te tangkaan te Magbebaye ne Manama, wey mig-ikul sikandin te inggimu te kaapuan din ne si Dabid, wey eleg layun ka eggimuwen din.

3 Te igkawalu e ne leg‑un te peghari din, migbunsud e sikandin migpangananey te Manama te kaapuan din ne si Dabid minsan ke bate pad sikandin. Ne te igkasapulu wey daruwa (12) ne leg‑un te peghari din, migbunsud e sikandin ka migdereet te me panubaran diye te me bubungan, te me sungkaleg ne larawan ni Asira, te me diyus-diyus, wey te me larawan diye te Huda wey te Hirusalim. 4  ✡ 2Har 21:3; 2Kru 33:3.Ne imparereetan din man‑e ka me altar ni Baal wey ka me altar ne tutunganan te insinsu ne in-ampew dutu. Impalupet din ka me sungkaleg ne larawan ni Asira, ka me diyus-diyus, wey ka me larawan, wey insawed din seini diye te insabalan te me etew ne migpanubad kandan. 5  ✡ 1Har 13:2.Impanutung din degma ka me tul‑an te me talagpanubad ne migpamakey te me diyus-diyus diye te me altar dan. Seini ne paahi ka peglinis din te Huda wey te Hirusalim. 6 Inggimu rin degma ka iling kayi diye te me lungsud te Manasis, te Ipraim, te Simyun taman te Naptali, wey te nallundus ne me lungsud ne nakalingut kayi. 7 Impandereetan din ka me altar diye te intiru ne Huda, lagkes ka me sungkaleg ne larawan ni Asira, wey impanlupet din ka me diyus-diyus wey ka langun ne me altar ne tutunganan te insinsu. Pegkeimpus dutu, miglibed e sikandin diye te Hirusalim.

8 Te igkasapulu wey walu (18) ne leg‑un te peghari ni Husiyas, te naawe din e ka me diyus-diyus wey nalinisan din e ka timplu, insuhu din si Sapan ne anak ni Asaliya, si Maasiyas ne gubirnadur, wey si Huwas ne anak ni Huwakas ne sikritari eyew eg-ayad-ayad te timplu te Magbebaye ne Manama rin. 9 Nangendiye sikandan ki Hilkiyas ka Labew ne Talagpanubad eyew igdulung ka seleppi ne in-uyan te me etew diye te timplu te Manama. Nalimud te me Libita ne talagbantey te gumawan te timplu ka seini ne seleppi, puun te me matig-Manasis, me matig-Ipraim, me matig-Huda, me matig-Binhamin, me matig-Hirusalim, wey puun te langun ne nasame ne me etew te Israil. 10 Ne imbehey ran ka seleppi diye te me etew ne impiyalan ne egpangulu te eg-ayad-ayad te timplu te Magbebaye. Ne imbayad dan e seeye te me trabahanti ne mig-ayad-ayad wey migbalew-balew te timplu. 11 Imbehey ran degma ka duma ne seleppi diye te me panday wey diye te me talagbebaley eyew igbeli te impansapsapan ne me batu wey kayu ne eggamiten te peg-ayad-ayad te timplu ne nahuhus ne imbahalad de te me Hari te Huda ne nekewun‑a ki Husiyas. 12-13 Mig-ayad-ayad ka me trabahanti te trabahu ran. Imbantayan sikandan ni Hahat wey ni Ubadiyas ne me kabuhalan ni Mirari, ni Sakariyas wey Misulam ne me kabuhalan ni Kuhat. Ne iyan migbantey te me trabahanti ne miggimu te nalein-lein ne trabahu ka me Libita ne meupiya ne egparahing te me instrumintu. Ne ka ingkabulig te duma iyan ka pegsikritari, pegmandu, wey ka pegtameng te gumawan te timplu.

14 Te sasangan sikandan ne egpalihawang te seleppi diye te tinesanan te timplu, nakita ni Hilkiyas ne talagpanubad ka baseen te Balaud ne imbehey te Magbebaye pinaahi ki Muwisis. 15 Ne ingguhuran din e si Sapan ne sikritari te Hari te migkahi, “Nakita ku ka baseen te Balaud diye te timplu te Magbebaye.” Ne imbehey rin e seeye diye ki Sapan. 16 Ne in-uyan e degma ni Sapan diye te Hari ka baseen te Balaud wey ingguhuran din e ka Hari te migkahi, “Inggimu ney ka langun ne insuhu nu kanami. 17 Impalihawang ney ka langun ne seleppi diye te timplu te Magbebaye wey imbehey ney diye te me etew ne impiyalan ne egpangulu te peg-ayad-ayad te timplu wey te me trabahanti.” 18 Ne migpabulus migpangguhud si Sapan ne miggenendue, “Due baseen ne imbehey keddi ni Hilkiyas ne talagpanubad.” Ne imbasa ni Sapan ka baseen diye te tangkaan te Hari.

19 Te narineg ni Hari Husiyas ka nasulat te Balaud, imbindas din ka insaluub din. 20 Ne imbanasalan te Hari si Hilkiyas, si Ahikam ne anak ni Sapan, si Abdun ne anak ni Mikayas, si Sapan ne sikritari, wey si Asayas ne suluhuanen din te migkahi, 21 “Hipanew kew wey panginginse kew te Magbebaye para keddi wey te nenasame ne keet-etawan te Israil wey Huda meyitenged te me lalag ne nasulat te baseen ne nakita niyu. Nabelu-belu ka Magbebaye kanta su ware tumana te me kaap-apuan ta ka me lalag din; ware dan himuwa ka langun ne nasulat te seini ne baseen.”

22 Purisu miggendiye si Hilkiyas wey ka me duma rin te ki Hulda, ka malitan ne prupita ne mig-ugpe diye te igkarangeb ne distritu te Hirusalim. Si Hulda asawa ni Salum ne anak ni Tukhat ne anak ni Hasra. Si Salum ka talagbantey dengan te me manggad diye te timplu wey ke me manggad naa te Hari. Ne ingguhuran dan e si Hulda te tuyu dan. 23-24 Ne ingkahiyan sikandan ni Hulda, “Guhuri niyu ka etew ne migpeendini kaniyu te seini ka ingkahi te Magbebaye, ka Manama te Israil, ‘Egdereetan ku ka seini ne inged wey ka nangugpe kayi. Igpaneem-neem ku kandan ka langun ne dilus ne nasulat diye te baseen ne imbasa diye te tangkaan te Hari te Huda. 25 Su in-engkeran e ma nikandan wey migpanubad e sikandan diye te me diyus-diyus. Nalangetan a tenged te immangimu ran. Purisu igpaneem-neem ku te seini ne inged ka langet ku ne mangune-kune wey ware egpakabalabag keddi.’ 26 Piru pangguhuri niyu ka Hari te Huda ne migpeendini kaniyu eyew te pegpanginginse te Magbebaye te seini ka inlalag te Magbebaye, ka Manama te Israil meyitenged te me lalag ne narineg din: 27 ‘Puun su nekegsendit ke ma wey migpariralem ka te pegkeetew nu kayi te tangkaan ku te pegkarineg nu te pegbebantak ku te seini ne inged wey te nangugpe kayi, wey inggisi nu ka insaluub nu tenged te pegkalaggew nu, wey migsinehew ka kayi te tangkaan ku, egpamminehen ku ka peg-ampu nu. 28 Purisu, taheed te neuyag ke pad, kene ku igpeyinguma ka mareet ne ingkahi ku meyitenged te seini ne inged; kene nu egkakita ka karereetan ne igpeuyan ku te seini ne inged, wey egpatey ka ne malinawen duma te me kaap-apuan nu.’ ” Ne ingguhuran dan e ka Hari te tabak ni Hulda.

29 Ne impeumew ni Hari Husiyas ka langun ne igbuyag te Huda wey te Hirusalim. 30 Ne miggendiye sikandan te timplu te Magbebaye duma te langun ne keet-etawan te Huda wey te Hirusalim, mabantug ma wey se lerew lagkes ka me talagpanubad wey ka me Libita. Ne diye te timplu, imbasa ni Husiyas diye te tangkaan dan ka langun ne nasulat te baseen te kasabutan te Manama ne nakita diye te timplu te Magbebaye. 31 Ne migsasindeg si Hari Husiyas diye te sasindehanan te Hari, wey migpahunlibet sikandin ne egtumanen din te intiru ne pusung din wey gimukud din ka me suhu te Magbebaye, me tulumanen, wey me balaud din ne nasulat diye te baseen. 32 Impepahunlibet din degma ka keet-etawan te Hirusalim wey te Binhamin ne egtumanen dan ka kasabutan te Manama. Purisu, intuman dan ka kasabutan te Manama, ka Manama te me kaap-apuan dan. 33 Ne impaawe ni Husiyas ka langun ne mallindit ne me diyus-diyus te intiru ne Israil, wey impepamakey ka me etew te Magbebaye ne Manama ran. Ne taman te katammanan te umul rin, in-ikul te keet-etawan ka Magbebaye, ka Manama te me kaap-apuan dan.