1 Sabeka ne timpu, migkahiyan ni Ilisyu ka malitan ne matig-Sunam ne in-uyag din se anak, “Awe ka duma te pamilya nu, wey hendiye kew te inged ne igkeupii niyu, tenged su migkahi ka Magbebaye ne Manama te due egginguma ne gutas te seini ne inged seled te pitu ne leg‑un.” 2 Ne migpalintutuu ka malitan ki prupita Ilisyu, wey miggipanew e sikandin duma te pamilya rin wey diye mig-ugpe te inged te me Pilistihanen seled te pitu ne leg‑un.

3 Pegkapenga te pitu ne leg‑un ne gutas, miglibed e ka malitan diye te Israil puun te inged te me Pilistihanen. Ne miggipanew e sikandin peendiye te Hari ka egpeyid‑u-hid‑u ne iglibed ded diye te kandin ka baley rin wey ka tane din. 4 Te seeye ne timpu, migpakiglalag ka Hari ki Gihasi ne suluhuanen ni Ilisyu. Ne migkahi ka Hari, “Guhuri e la te me kein-inuwan ne neyimu ni Ilisyu.” 5 Te sasangan pad ne egpangguhud si Gihasi te Hari meyitenged te bate ne in-uyag ni Ilisyu, sahuhune ne miglepew ka malitan ne iney te bate, wey migpeyid‑u-hid‑u te Hari ne eggawi te baley wey tane din. Kahi ni Gihasi, “Mahal ne Hari, seini iya ka malitan, wey seini ka anak din ne in-uyag ni Ilisyu.” 6 Ne mig-insaan e te Hari ka malitan meyitenged te neyitabu te anak din, wey impangguhuran din e ka Hari. Puun dutu, migsuhu ka Hari te upisyal rin ne iyan eg-atiman te malitan. Migkahi sikandin, “Ilibed nu ka langun ne kandin, minsan ka kentiddad te nenaggaani puun te aldew ne mig-awe sikandin taman kuntee.”

7 Sabeka ne aldew, miggendiye si Ilisyu te Damasku. Te seeye ne timpu migderalu si Hari Bin-Hadad ne Hari te Sirya, wey nakahiyan sikandin te egginguma si Ilisyu. 8 Ne migkahiyan te Hari si Hasail, ka sabeka te me upisyal rin, “Uyan ka te dasag ne ibehey nu ki Ilisyu. Ne peinsei nu naa kandin ka Magbebaye ne Manama ke egkeulian naan pad ka dalu ku.” 9 Purisu miggipanew e si Hasail ka mig-uyan te langun ne kasangkapan wey egkakeen puun te Damasku ne indulan din te hep‑at ne pulu (40) ne kamil. Te nekeume e si Hasail diye te ki Ilisyu, migkahi e sikandin, “Insuhu a te suluhuanen nu ne si Hari Bin-Hadad, ka Hari te Sirya ne egpeinseen keykew ke egkeulian kun naan pad sikandin te dalu rin?”

10 Ne migtabak si Ilisyu, “Hendiye kad e wey kahii nu sikandin te egkeulian ded sikandin, piru impakite e keddiey te Magbebaye ne Manama ne egkapatey red iya sikandin.” 11 Ne migmemetmetan ni Ilisyu si Hasail taman te neyilew e sikandin. Ne sahuhune ne migpandalawit si Ilisyu. 12 Ne mig-insaan ni Hasail si Ilisyu, “Mania te migpandalawit ka, ahalen?”

Ne migtabak si Ilisyu, “Uya su natahaan ku ka makaliyas-liyas ne eggimuwen nu te me kabuhalan ni Israil. Egpanilaban nu ka me kampu ney, wey egpangimatayan nu ka me kanakan ney pinaahi te kampilan, wey egpanulengen nu ka me bate wey egpangebuan nu ka egkengaberes pad.”

13 Piru migkahi si Hasail, “Ahalen, egmenuwen ku te eggimu te iling due? Suluhuanen e re seini!”

Ne migkahi si Ilisyu, “Impakita keddiey te Magbebaye ne egkeyimu ka ne Hari te Sirya.”

14 Sikan naa ka mig-engkeran din e si Ilisyu wey miglibed e diye te ahalen din. Ne mig-insaan e sikandin, “Nekey‑a ka ingkahi ni Ilisyu?” Ne migtabak sikandin, “Migkahiyan a nikandin te egkeulian ke red.” 15 Piru te seup ne aldew, migkuwa sikandin te makepal ne hinabel, wey insubid din. Ne dutu, imbunbunan din e ka ulaula te Hari taman te migpatey. Sikan naa ka si Hasail e ka nakasubal kandin ne mighari.

16 Ne due anak ni Hihusapat ne si Hihuram ne neyimu ne Hari diye te Huda. Neyitabu seeye te igkalalimme e ne leg‑un te peghari ni Huram ne anak ni Ahab diye te Israil. 17 Tatelu ne pulu wey daruwa (32) ka idad ni Hihuram te neyimu sikandin ne Hari, wey mighari sikandin diye te Hirusalim te walu ne leg‑un. 18 In-ikul rin ka mareet ne me hinimuwan te me Hari te Israil, iling te inggimu te me kabuhalan ni Ahab tenged su nakaasawa ma sikandin te anak ni Ahab. Mareet ka hinimuwan din diye te tangkaan te Magbebaye ne Manama.

19 Piru ware dereeti te Magbebaye ka Huda tenged te kasabutan din ki Dabid ne egpabulus eghari ka me kabuhalan din te ware egtamanan.

20 Te timpu te peghari ni Hihuram diye te Huda, migsupak kandin ka me matig-Idum wey mig-alam e te lein ne Hari dan. 21 Ne miggendiye si Hihuram te Sair duma te langun ne talag-uyan te me karwahi rin. Inlingutan sikandan te me matig-Idum, piru impangimatayan din wey te me sundalu rin ka me matig-Idum te pegkamarusilem, wey nawahey ran iya ka me kuntere ne miglingut kandan. Piru nasi namallahuy ka me sundalu rin wey nanguli e diye te me ugpaan dan. 22 Taman kuntee, migsupak ded te Huda ka me matig-Idum. Te seeye ded ne timpu, migsupak e degma ka siyudad te Libna.

23 Ka duma ne neyitabu te peghari ni Hihuram wey ka langun ne neyimu rin, nasulat diye te Sulatanan te me Guhuren te me Hari te Huda. 24 Ne migpatey e si Hihuram wey diye ded sikandin isabal te siyudad ni Dabid duma te me kaap-apuan din. Ne iyan e migsubal kandin mighari ka anak din ne si Ahasiyas.

25 Te igkasapulu wey daruwa (12) ne leg‑un te peghari ni Huram ne anak ni Ahab diye te Israil, mighari e degma diye te Huda ka anak ni Hihuram ne si Ahasiyas. 26 Daruwa ne pulu wey daruwa (22) ka idad ni Ahasiyas te neyimu sikandin ne Hari, wey mighari sikandin te Hirusalim te sabeka ne leg‑un. Si Ataliya ka iney rin ne apu ni Umbri ne Hari te Israil. 27 Mig-ikul red sikandin te me hinimuwan te pamilya ni Ahab wey mareet ka hinimuwan din diye te tangkaan te Magbebaye ne Manama, su mareet ma ka hinimuwan din iling te hinimuwan ni Ahab ne anuhang din. 28 Ne migduma si Ahasiyas ki Huram ne anak ni Ahab te egpakiggira ki Hasail ne Hari te Sirya. Diye sikandan nekeg-uma te Ramut-Gilyad, ne diye napalii si Huram. 29 Purisu miglibed e si Hari Huram diye te Hisril eyew egpeuli te pali din. Ne miggendiye te Hisril ka Hari te Huda ne si Ahasiyas ne anak ni Hihuram eyew egleuy kandin.