1 Te igkararuwa ne pulu wey pitu (27) ne leg‑un te peghari ni Hirubuwam* Igkarangeb seini ne Hirubuwam. te Israil, migbunsud e degma mighari diye te Huda si Usiyas† Te Hibruwanen: Asariyas ne iyan ka lein ne paahi te pegsulat te ngaran ne Usiyas. ne anak ni Amasiyas. 2 Sapulu wey hen‑em (16) ka idad ni Usiyas te neyimu sikandin ne Hari, wey mighari sikandin te Hirusalim te lalimma ne pulu wey daruwa (52) ne leg‑un. Si Hikuliyas ne matig-Hirusalim ka iney rin. 3 Meupiya ka hinimuwan din diye te tangkaan te Magbebaye ne Manama iling te inggimu te amey rin ne si Amasiyas. 4 Piru ware naawe ka me panubaran diye te me bubungan, wey migpabulus ded migmanubad ka me etew wey migmanutung te insinsu diye. 5 Ne impeibungan sikandin te Magbebaye taman te migpatey sikandin. In-awaan e sikandin te katenged din wey impasuwey e sikandin ipeugpe. Purisu si Hutam e ne anak din ka impiyalan din te palasyu rin wey ka migpangulu te keet-etawan te Huda.

6 Ne ka duma ne guhuren meyitenged te peghari ni Usiyas wey te langun ne neyimu rin, nasulat diye te Sulatanan te me Guhuren te me Hari te Huda. 7  ✡ Isa 6:1.Ne migpatey e si Usiyas ne diye sikandin ilebeng te inlebengan te me kaap-apuan din, diye te Siyudad ni Dabid. Ne si Hutam e ne anak din ka migsubal kandin mighari.

8 Te igkatelu ne pulu wey walu (38) ne leg‑un te peghari ni Usiyas diye te Huda, migbunsud e degma mighari si Sakariyas ne anak ni Hirubuwam diye te Israil wey diye te Samarya ka mig-ugpaan din te mighari. Ne hen‑em de ne bulan si Sakariyas ka mighari diye te Samarya. 9 Mareet ka hinimuwan din diye te tangkaan te Magbebaye, iling te me kaap-apuan din, su in-ikul rin ka mareet ne hinimuwan ni Hirubuwam ne anak ni Nibat ne iyan migpuunan ne nakasale ka matig-Israil. 10 Ne due etew ne egngaranan ki Salum ne anak ni Habis ne migsuman-suman te mareet ki Sakariyas. Ne impeyimatayan din si Sakariyas diye te Ibliam wey sikandin e ka migsubal kandin mighari.

11 Ne ka duma ne neyitabu te peghari ni Sakariyas, nasulat diye te Sulatanan te me Guhuren te me Hari te Israil.

12  ✡ 2Har 10:30.Purisu natuman e ka insaad te Magbebaye ki Hihu ne migkahi, “Iyan eghari te Israil ka me kabuhalan nu taman te igkeep‑at ne kabuhalan.”

13 Te igkatelu e ne pulu wey siyam (39) ne leg‑un te peghari ni Usiyas diye te Huda, migbunsud e degma mighari diye te Israil si Salum ne anak ni Habis. Senge-bulan de sikandin ka mighari te Samarya. 14 Ne due etew ne egngaranan ki Minahim ne anak ni Gadi ne miggendiye te Samarya. Ka sika ne etew, migpuun diye te Tirsa. Nataman, miggimatayan din si Salum wey sikandin e ka migsubal kandin mighari. 15 Ka duma ne neyitabu te peghari ni Salum, lagkes ka planu rin te peggimatey ki Sakariyas, nasulat diye te Sulatanan te me Guhuren te me Hari te Israil. 16 Nataman, miggipanew e si Minahim puun te Tirsa wey inlusuran din ka Tapua wey ka me inged ne nakalingut due, su ware sikandan migpeiluk-iluk kandin. Impangimatayan din ka langun ne mahinged diye wey impangebuan din ka egkengabberes.

17 Te igkatelu e ne pulu wey siyam (39) ne leg‑un te peghari ni Usiyas diye te Huda, migbunsud e degma mighari diye te Israil si Minahim ne anak ni Gadi. Ne mighari sikandin seled te sapulu ne leg‑un diye te Samarya. 18 Mareet ka hinimuwan din diye te tangkaan te Magbebaye. Su te intiru ne umul rin, mig-ikul sikandin te mareet ne hinimuwan ni Hirubuwam ne anak ni Nibat, ne iyan egpuunan ne nakasale ka me matig-Israil. 19 Ne inlusuran ni Tiglat-Pilisir ne Hari te Asirya ka Israil. Piru imbayaran sikandin ni Minahim te tatelu ne pulu wey lalimma ne libu (35,000) ne kilu ne pelata eyew egbulihan sikandin ne egpakapabulus ded ka eghari. 20 Naangey seeye ni Minahim diye te me meyaman ne me etew te Israil. Impehes din ka tagse sabeka kandan pabayara te tigliware te kilu ne pelata eyew igbehey diye te Hari te Asirya. Purisu mig-uli e ka Hari te Asirya wey warad migpabulus.

21 Ne ka duma ne neyitabu te peghari ni Minahim wey ka langun ne neyimu rin, nasulat diye Sulatanan te me Guhuren te me Hari te Israil. 22 Ne migpatey sikandin, wey iyan migsubal kandin mighari si Pikahiyas ne anak din.

23 Te igkalalimme e ne pulu (50) ne leg‑un ni Usiyas te mighari diye te Huda, migbunsud e degma mighari si Pikahiyas diye te Israil wey diye te Samarya ka ugpaan din te mighari. Ne daruwa re ne leg‑un sikandin ka mighari diye te Samarya. 24 Mareet ka hinimuwan din diye te tangkaan te Magbebaye. Su mig-ikul sikandin te mareet ne hinimuwan ni Hirubuwam ne anak ni Nibat, ne iyan egpuunan ne nakasale ka matig-Israil. 25 Ne due etew ne egngaranan ki Pika ne anak ni Rimalya ne pangulu te me sundalu ni Pikahiyas. Migpakigsabut sikandin te lalimma ne pulu (50) ne matig-Gilyad eyew te peggimatey ki Pikahiyas. Ne inggimatayan dan iya sikandin lagkes si Argub wey si Aryi diye te inlig‑enan ne inged diye te palasyu te Samarya. Ne si Pika ka migsubal kandin mighari. 26 Ne ka duma ne neyitabu te peghari ni Pikahiyas wey ka langun ne neyimu rin, nasulat diye te Sulatanan te me Guhuren te me Hari te Israil.

27 Te igkalalimme e ne pulu wey daruwa (52) ne leg‑un te peghari ni Usiyas diye te Huda, human pad migbunsud si Pika ka mighari te Israil wey diye te Samarya ka ugpaan din te mighari. Ne daruwa ne pulu (20) ne leg‑un sikandin ka mighari diye te Samarya. 28 Mareet ka hinimuwan din diye te tangkaan te Magbebaye ne Manama. Su mig-ikul ma sikandin te mareet ne hinimuwan ni Hirubuwam ne anak ni Nibat, ne iyan egpuunan ne nakasale ka me matig-Israil.

29 Ne hengkayi te iyan e mighari te Israil si Pika, miglusud e man‑e si Tiglat-Pilisir ne Hari te Asirya. Ne naahew rin ka siyudad te Ayun, te Abil-Bit-Maaka, te Hanuwa, te Kidis, wey te Asur. Naahew rin man‑e ka inged te Gilyad, te Galiliya wey ka langun ne inged te Naptali. Ne impandakep din ka keet-etawan wey impanguyan din e diye te Asirya.

30 Ne due etew ne egngaranan ki Husiyas ne anak ni Ila ne migplanu te pegdereet ki Pika ne anak ni Rimalya. Inggimatayan din si Pika wey migsubal sikandin mighari. Neyitabu seini te igkararuwa ne pulu (20) ne leg‑un te peghari ni Hutam diye te Huda. 31 Ne ka duma ne neyitabu te peghari ni Pika wey ka langun ne neyimu rin, nasulat diye te Sulatanan te me Guhuren te me Hari te Israil.

32 Te igkarangeb ne leg‑un te peghari ni Pika ne anak ni Rimalya diye te Israil, migbunsud e degma mighari diye te Huda si Hutam ne anak ni Usiyas. 33 Daruwa ne pulu wey lalimma (25) ka idad din te neyimu sikandin ne Hari, wey mighari sikandin diye te Hirusalim te sapulu wey hen‑em (16) ne leg‑un. Si Hirusa ne anak ni Saduk ka iney rin. 34 Meupiya ka hinimuwan din diye te tangkaan te Magbebaye iling te hinimuwan te amey rin ne si Usiyas. 35 Piru ware naawe ka me panubaran diye te me bubungan, wey migpabulus ded migmanubad ka me etew wey migmanutung te me insinsu diye. Sikandin man‑e ka miggimu te Gumawan diye te kakiliran te timplu te Magbebaye.

36 Ne ka duma pad ne guhuren meyitenged te peghari ni Hutam wey ka langun ne neyimu rin, nasulat diye te Sulatanan te me Guhuren te me Hari te Huda. 37 Te timpu ne si Hutam ka mighari diye te Huda, impalusuran te Magbebaye ka Huda ki Risin ne Hari te Sirya wey ki Pika ne anak ni Rimalya ne Hari te Israil. 38 Ne nataman migpatey e si Hutam wey diye sikandin isabal te insabalan ded te me kaap-apuan din diye te Siyudad ni Dabid. Ne si Ahas e ne anak din ka migsubal kandin mighari.