1 Ne impeumew ni Hari Husiyas ka langun ne igbuyag te Huda wey te Hirusalim. 2 Ne miggendiye sikandan te timplu te Magbebaye duma te langun ne keet-etawan te Huda wey te Hirusalim, mabantug ma wey se lerew lagkes ka me talagpanubad wey ka me prupita. Ne diye te timplu, imbasa ni Husiyas diye te tangkaan dan ka langun ne nasulat te baseen te kasabutan te Manama ne nakita diye te timplu te Magbebaye. 3 Ne migsasindeg si Hari Husiyas diye te lenged te sungkaleg eyew egpakakita kandin ka langun wey migpahunlibet sikandin ne egtumanen din te intiru ne pusung din wey te gimukud din ka me suhu te Magbebaye, me tulumanen, wey me balaud ne nasulat diye te baseen. Te iling kayi ne paahi, inlig‑en te Manama ka paahi diye te kasabutan ne nasulat te seini ne baseen. Migsaad degma ka me etew ne egtuman te kasabutan te Manama.

4 Nataman, insuhu te Hari si Hilkiyas ka labew ne talagpanubad duma te me talagpanubad ne sinalihan din, wey seeye se me talagtameng te gumawan te timplu ne igpalihawang ka langun ne inggamit te pegsimba ki Baal, ki Asira ne diyus-diyus, wey te langun ne bituen diye te aw-awangan. Ne intutung din langun seini diye te lihawangan te Hirusalim, diye te marani te napu te Kidrun wey impeuyan din ka igmuk diye te Bitil. 5 Ne impaawe din degma ka me talagpanubad te me diyus-diyus. In-alam sikandan dengan te me Hari te Huda eyew egtutung te insinsu diye te me panubaran diye te me bubungan diye te me lungsud te Huda wey palingut te Hirusalim. Sikandan ka migtutung te me insinsu ne ighalad ki Baal, diye te aldew, te bulan, wey te langun ne me bituen wey te me punduk kayi. 6 Ne impalihawang din ka sungkaleg ne larawan ni Asira diye te timplu te Magbebaye, wey in-uyan diye te lihawangan te siyudad te Hirusalim, diye te napu te Kidrun. Ne diye dan silabi seini taman te neigmuk e, ne in-uyan dan e ka igmuk diye te lebenganan te kene ne me inila ne me etew wey diye dan e isawed. 7 Ne impangguhus din pad man‑e ka me ugpaanan te me lukes ne egpamelegye te lawa ran ne diye te timplu te Magbebaye. Ne diye egmangimu ka me malitan te me kumbale ne para te diyus-diyus ne si Asira. 8 Ne impaawe ni Husiyas ka langun ne me talagpanubad diye te Huda wey impeendiye din e te Hirusalim. Ne impahuhus din ka me panubaran diye te me bubungan ne egtutungan te me talagpanubad te me insinsu, puun te Giba peendiye te Birsiba. Impangguhus din man‑e ka me panubaran ne diye te gumawan ne impangimu ni gubirnadur Huswi. Ka sika ne gumawan, egkakita dapit te igkahibang ke egseled ki te siyudad. 9 Ne ware tuhuti ne egpamakey diye te altar te Magbebaye ne diye te Hirusalim ka me talagpanubad ne migpamakey te me panubaran diye te me bubungan. Piru intuhutan ded sikandan ne egkeen te paan ne ware patulin duma te me duma ran ne me talagpanubad.

10 Ne migsuhu si Husiyas ne igpahuhus ka me altar te Tupit ne diye te inged ne Bin-Hinum, eyew warad e egpakatutung te anak dan isip igpanubad ki Muluk. 11 Ne impaawe din man‑e ka me larawan te me kudde ne inhalad te me Hari te Huda isip pegsimba te aldew, wey impasilaban din ka me karwahi ne inhalad ded iya man‑e. Diye nakatetahu sika langun te lama te timplu ne marani te ugpaan ni Natan-Milik ne ahalen ne upisyal te palasyu. 12 Ne impahuhus din degma ka me altar diye te atep, diye te ampew ne sinabeng ni Ahas ne impeyimu dengan te me Hari te Huda. Minsan ka daruwa ne altar ne diye te lama te timplu te Magbebaye ne impeyimu ni Manasis, impalupet din seini wey indegpak diye te napu te Kidrun. 13 Ne impahuhus ni Hari Husiyas ka me panubaran diye te me bubungan ne diye te igsile te Hirusalim, wey ka diye te igkakawanan ne balabahan te Bubungan te Ulibu ne inggimu ni Hari Sulumun, eyew te pegsimba te diyus-diyus te me matig-Sidun ne si Astarti, wey te diyus-diyus te me matig-Muwab ne si Kamus, wey te diyus-diyus te me matig-Amun ne si Muluk. 14 Ne impalupet din degma ka me matulus kun ne sungkaleg ne me batu wey sungkaleg ne larawan ni Asira, wey impepanahuan din e te me tul‑an te me etew ka immasasindehan kayi.

15 Ne kene ne sikan de, impahebe degma ni Husiyas ka altar ne panubaran ne impeyimu ni Hirubuwam ne anak ni Nibat diye te bubungan te Bitil, ne iyan egpuunan ne nakasale ka keet-etawan te Israil. Insilaban din seeye ne altar wey inlupet din e. Insilaban din degma ka sungkaleg ne larawan ni Asira. 16 Te pegpanlangu-langu ni Husiyas, nakita rin ka me lebeng diye te bubungan, ne impakuwa rin ka me tul‑an wey intutung din diye te halaran. Te iling due ne paahi, natuman ka impalalag te Magbebaye te prupita ne egguhusen din ka altar te timpu te migsasindeg si Hirubuwam diye te altar te timpu te pista. Te pegpanlangu-langu ni Hari Husiyas, nakita rin ka lebeng te prupita ne migtagne kayi. 17 Ne mig-inse si Husiyas, “Hentew‑a lebeng te sika?”

Ne migtabak ka me etew ne matig-siyudad te Bitil, “Lebeng sika te prupita te Magbebaye ne matig-Huda. Sikandin ka migpanagne te seini se inggimu nu kuntee ne pegdereet te me altar kayi te Bitil.” 18 Ne migkahi si Husiyas, “Kene niyu hilabeti ka lebeng din!”

Purisu ware dan e hilabeti ka me tul‑an din wey ka me tul‑an te duma rin ne prupita ne matig-Samarya. 19 Ne impahuhus din pad man‑e ka me panubaran diye te me bubungan diye te me siyudad te Samarya ne inggimu te me Hari dengan te Israil ne iyan egpuunan ne nabelu ka Magbebaye. Ne iling ded ka inggimu ni Husiyas te sika ne siyudad te inggimu rin diye te Bitil. 20 Ne migpangimatayan din diye te panubaran diye te me bubungan ka langun ne me talagpanubad te me diyus-diyus, wey impanutung din diye ka me tul‑an te me etew. Nataman, mig-uli e sikandin diye te Hirusalim.

21 Ne ingkahiyan ni Hari Husiyas ka langun ne etew, “Egsahakeen ki te Peglihad te Panalihan te Magbebaye ne Manama ta, sumale te nasulat diye te libru ne insulatan te kasabutan te Manama.” 22 Puun te timpu ne iyan pad migmandu te Israil ka me talewukum, taman te timpu e te me Hari te Israil wey Huda, ware de due iling dutu ne Sahakeen te Peglihad te Panalihan. 23 Piru neyimu seeye se Sahakeen te Peglihad te Panalihan te Manama diye te Hirusalim te igkasapulu wey walu (18) ne leg‑un te peghari ni Husiyas.

24 Ne kene ne sikan de, impaawe e man‑e ni Husiyas seeye se egpakiglalag te me gimukud, ka me manenagne, wey impandegpak din ka me diyus-diyus ne diye te me baley, wey ka duma pad ne me diyus-diyus, wey ka langun ne mallindit ne insimba te me etew. Impangawe din ka langun ne iling due diye te Hirusalim wey ka duma pad diye te Huda. Inggimu sika ni Husiyas eyew te pegtuman te me balaud ne nasulat diye te libru ne nakita ni Hilkiyas ne talagpanubad diye te timplu te Magbebaye. 25 Ne warad Hari ne egpekeiling kandin ne migpamakey te Magbebaye te intiru ne pusung din, te gimukud din, wey te langun ne keseg din. Intuman din ka langun ne balaud ni Muwisis, wey warad lein ne Hari ne nekewun‑a wey ke nakasinundul naa ne nekeiling kandin.

26 Piru minsan pad due, nabelu-belu ded iya ka Magbebaye te Huda puun te hinimuwan ni Manasis ne nakapabelu kandin. 27 Purisu migkahi ka Magbebaye, “Eg-engkeran kud ka Huda iling te peg-engked ku te Israil. Eg-engkeran kud degma ka in-alam ku ne siyudad ne Hirusalim wey ka timplu ne egkahiyen ku ne, ‘diya a egsayaa.’ ”

28 Ne ka duma ne neyitabu te peghari ni Husiyas wey ka langun ne neyimu rin, nasulat diye te Sulatanan te me Guhuren te me Hari te Huda. 29 Taheed te si Husiyas pad ka Hari te Huda, miggendiye te weyig ne Iyupratis si Paraun Niku ne Hari te Ihiptu, eyew egbulig te Hari te Asirya. Ne miggendiye si Hari Husiyas duma te me sundalu rin eyew te pegpakiggira ki Paraun Niku. Piru neyimatayan sikandin ni Paraun Niku te nekeglambag sikandan diye te Migidu. 30 Ne in-uyan e te me sundalu rin ka lawa rin ne impeuntud te karwahi peendiye te Hirusalim wey insabal ran e sikandin diye te sabalanan ne in-andam din. Ne si Huwakas* Ikarangeb seini ne Huwakas. e ne anak din ka in-alam te me etew ne Hari subal kandin.

31 Daruwa ne pulu wey tatelu (23) ka idad ni Huwakas te neyimu sikandin ne Hari, wey mighari sikandin diye te Hirusalim te tatelu re ne bulan. Si Hamutal ne anak ni Hirimiyas ne matig-Libna ka iney rin. 32 Mareet ka hinimuwan din diye te tangkaan te Magbebaye, iling te hinimuwan te kaap-apuan din. 33 Ne indakep sikandin ni Paraun Niku ne Hari te Ihiptu wey imprisu diye te Ribla ne sakup te nasud te Hamat, eyew kene sikandin egpakahari diye te Hirusalim. Ne immultaan ni Paraun Niku ka me matig-Huda te tatelu ne libu wey hep‑at ne gatus (3,400) ne kilu ne pelata, wey tatelu ne pulu wey hep‑at (34) ne kilu ne bulawan. 34 Ne inggimu ni Paraun Niku ne Hari si Ilyakim diye te Huda subal te amey rin ne si Husiyas. Ne inliwanan din ka ngaran ni Ilyakim te Huwakim. Te peglibed din diye te Ihiptu, induma rin si Huwakas wey diyad e sikandin migpatey. 35 Ne imbehey ni Huwakim ka me pelata wey bulawan diye ki Paraun Niku ne Hari te Ihiptu. Piru impabayad ni Hari Huwakim ka me etew te buhis sumale te kaluag te tane dan wey karakel te karatuan dan, eyew egpakabayad sikandin te buhis ne imbuyu ni Paraun Niku.

36 Daruwa ne pulu wey lalimma (25) ka idad ni Huwakim te neyimu sikandin ne Hari, wey mighari sikandin diye te Hirusalim te sapulu wey sabeka (11) ne leg‑un. Si Sibida ne anak ni Pidayas ne matig-Ruma ka iney rin. 37 Mareet ka hinimuwan din diye te tangkaan te Magbebaye su mig-ikul sikandin te hinimuwan te me kaap-apuan din.