1 Purisu te igkasapulu (10) ne aldew te igkasapulu (10) ne bulan te igkasiyam ne leg‑un te peghari ni Sidikiyas, inlusuran e ni Nibukadnisar ne Hari te Babilunya ka Hirusalim. Migkekampu sikandan diye te lihawangan te siyudad, wey inlingutan dan tamunduwi te tane ka matikang wey makepal ne batu ne alad te Hirusalim eyew egpakaseled sikandan. 2 Inlingutan dan ka siyudad taman te igkasapulu wey sabeka (11) ne leg‑un te peghari ni Sidikiyas. 3 Te igkasiyam ne aldew te igkeep‑at ne bulan te seeye ded ne leg‑un, nakasalerep e te bitil ka me etew te Hirusalim. 4 Ne nataman nahebe e te me sundalu te me matig-Babilunya ka matikang wey makepal ne batu ne alad te siyudad. Purisu migpallahuy e si Sidikiyas duma te langun ne sundalu rin te timpu te marusilem minsan inlingutan e te me matig-Babilunya ka siyudad. Diye sikandan migbaye te gumawan ne elat-elat te daruwa ne alad te siyudad, marani te pinamulaan te Hari, wey miggendiyad e sikandan te Araba. 5 Piru inlupug sikandan te me sundalu te Babilunya, wey neumaan iya sikandan diye te napu te Hiriku. Ne in-engkeran e si Hari Sidikiyas te me sundalu rin ne nekegsuwey-suwey. 6 Ne indakep dan e si Hari Sidikiyas wey in-uyan dan e diye ki Hari Nibukadnisar ne diye te siyudad te Ribla ne sakup te nasud te Hamat. Ne diye, inggukuman e sikandin ni Hari Nibukadnisar. 7 Ne impeyimatayan e ni Nibukadnisar ka me lukes ne anak ni Sidikiyas diye te tangkaan din. Ne impakulewut e ni Nibukadnisar ka mata ni Sidikiyas. Ne impabaku e sikandin te keddina wey in-uyan e diye te Babilunya.

8 Te igkapitu ne aldew te igkalimma ne bulan te igkasapulu wey siyam (19) ne leg‑un te peghari ni Nibukadnisar te Babilunya, nakaseled e te Hirusalim si Nibusaradan ne pangulu te me talagbantey te Hari te Babilunya. 9 Ne insilaban din e ka timplu te Magbebaye ne Manama, ka palasyu te Hari, lagkes ka langun ne baley diye te Hirusalim, wey ka me baley te inila ne me etew te Hirusalim. 10 Ne impangguhus e te me sundalu rin ka me matikang wey makepal ne batu ne alad te siyudad. 11 Ne impandakep e ni Nibusaradan ka me etew ne nenasame diye te siyudad, ka nenasame ne mangngateu ne me trabahanti, lagkes ka me sundalu ne miggural e te me sundalu te Hari te Babilunya. 12 Piru immanggaat din de diye te Huda ka duma ne subla ne egkaayu-ayu, eyew sikandan ka egtanggu te me parasan wey te me kamet.

13 Ne ingguhus te me matig-Babilunya ka daruwa ne sungkaleg ne me burunsi diye te timplu, ka burunsi ne kerumata, wey ka pelenggana ne burunsi ne egngaranan te “Ka Dahat”. Ne impanguyan dan e seini langun diye te Babilunya. 14 Impanguyan dan ka me kuren ne inggimu puun te tane, me pala, ka igpanempug te pebilu te sulu, me yahung, me ubab, wey ka langun ne kasangkapan ne burunsi ne inggamit diye te timplu. 15 Impanguyan dan man‑e ka langun ne bulawan wey pelata ne me kasangkapan, lagkes e ka me yahung wey ka duma pad ne egkahamit ne egtahuan te baha. 16 Ne kenad egkatimbang tenged te kabehat ka daruwa ne burunsi ne sungkaleg diye te timplu, ka dakel ne pelenggana ne egngaranan te, “Ka Dahat”, wey ka kerumata ne inggamit te peglaglag te weyig. Ka sika langun, impeyimu dengan ni Hari Sulumun para te timplu te Magbebaye ne Manama. 17 Nekeg-iling ka daruwa ne sungkaleg, su ka tagse sabeka, walu ne mitrus se kalayat, wey ka ulu-ulu ne burunsi, sabeka wey liware ne mitrus se kalayat. Ne impalingutan seini te dayan-dayan ne neelin ne burunsi, ne impeiling te prutas ne egngaranan te granada.

18 Ne impandakep man‑e ni Nibusaradan ensi Sirayas ne Labew ne Talagpanubad, si Supuniyas ne sinalihan ni Sirayas, wey ka tatelu ne upisyal te timplu. 19 Ne indakep din degma ka upisyal te me sundalu, wey ka lalimma ne talagtambag te Hari ne diye pad te siyudad, wey ka sikritari te upisyal ne impiyalan te pegpanlista te me etew ne egsundaluwen, wey ka duma pad ne hen‑em ne pulu (60) ne me etew ne nakita diye te siyudad te Hirusalim. 20 Ne impanguyan sikandan langun ni Nibusaradan diye te Hari te Babilunya ne diye te Ribla. 21 Ne impahumian sikandan te Hari te Babilunya wey impeyimatayan e.

Purisu naddakep wey neuyan e ka keet-etawan te Huda peendiye te lein ne me nasud.

22 Ne inggimu ni Hari Nibukadnisar si Gidaliyas ne gubirnadur te me etew ne nahaat diye te Huda. Anak sikandin ni Ahikam wey apu ni Sapan. 23 Te pegkarineg te langun ne upisyal te me sundalu te seeye ne guhuren, miggendiyad e sikandan te Mispa ka egpakigkita ki Gidaliyas. Sikandan ensi Ismail ne anak ni Nitaniyas, si Diyuhanan ne anak ni Kariyas, si Sirayas ne anak ni Tanhumit ne matig-Nitupa, wey si Hasaniyas ne matig-Maaka duma te langun ne etew ran. 24 Ne migpahunlibet si Gidaliyas ne migkahi kandan, “Kene kew kaaldek te me upisyal te me matig-Babilunya. Telen kew e kayi wey paruma-ruma kew te Hari te Babilunya, wey ware mareet ne egkeyitabu kaniyu.” 25 Piru te igkapitu ne bulan te seeye ded ne leg‑un, si Ismail ne anak ni Nitaniyas wey apu ni Ilisama ne karumaan te pamilya te Hari, miggendiye te Mispa duma te sapulu (10) ne etew rin eyew te peggimatey ki Gidaliyas wey te me Hudiyu wey me matig-Babilunya ne duma rin diye. Ne neyimatayan dan iya sikandan. 26 Ne puun due, migpamallahuy e diye te Ihiptu ka langun ne me matig-Israil, me meyaman ma wey se egkengaayu-ayu duma te me upisyal te me sundalu su nenaaldek sikandan ne egsulian te me matig-Babilunya.

27 Te igkatatelu ne pulu wey pitu (37) ne leg‑un te pegkarakepi ki Huwakin ne Hari te Huda, neyimu e ne Hari te Babilunya si Ibil-Mirudak. Te an-anayan ne leg‑un te peghari din, impalihawang din e si Huwakin. Neyitabu seini te igkararuwa ne pulu wey pitu (27) ne aldew te igkasapulu wey daruwa (12) ne bulan. 28 In-upianan ni Ibil-Mirudak si Huwakin, wey imbehayan din te dakel ne katungdanan du te duma ne me Hari ne indakep degma wey in-uyan diye te Babilunya duma kandin. 29 Ne warad e migsaluub si Huwakin te kumbale din te pinirisu, wey eglagpu e sikandin te Hari ne egkeen tagse aldew. 30 Ne tagse aldew te manekal pad sikandin, egbehayan sikandin te Hari te Babilunya te langun ne ingkeilangan din.