1 Nataman, migpatey e ka Hari te me Amunihanen ne si Nahas. Ne iyan migsubal kandin mighari ka anak din ne si Hanun. 2 Ne migkahi si Dabid, “Eg-upianan ku si Hanun ne anak ni Nahas, iling te peg-upiya te amey rin keddi.” Purisu migsuhu si Dabid te me etew rin eyew pegpanengneng ki Hanun ne miglungku sikandin te pegpatey te amey rin.

Piru te pegginguma te me etew ni Dabid diye te tane te me Amunihanen, 3 ingkahiyan e te me upisyal te me Amunihanen si Hanun ne ahalen dan, “Kahiyen nu buwa ne intahud ni Dabid ka amey nu pinaahi te pegsuhu te me suluhuanen din te pegliwang keykew? Kema ke impeendini sikandan ni Dabid eyew te pegnengneng wey peg-iipat meyitenged te seini ne siyudad, ne egkataman, egdereetan dan e seini.”

4 Purisu imparakep ni Hanun ka me etew ni Dabid wey impakahisan din ka katenge te sumpe te tagse sabeka wey impatempuhan din ka mallayat ne me kumbale dan taman te liwaraan. Ne impeuli din e sikandan. 5 Ne neyilew amana sikandan ne nanguli. Te nahuhuran e si Dabid meyitenged kayi, impasinug-ung din e sikandan wey impakahiyan te diye pad egpeuugpaa te Hiriku taman te egtubu e ka me sumpe dan.

6 Te pegkanengnengi te me Amunihanen ne amana nabelu si Dabid kandan tenged te inggimu ran, migsuul e sikandan te daruwa ne pulu ne libu (20,000) ne sundalu ne matig-Sirya ne diye mig-ugpe te Bit-Rihub wey diye te Suba, wey sabeka ne libu (1,000) ne lukes ne egpuun diye te Hari te Maaka, wey sapulu wey daruwa ne libu (12,000) ne sundalu ne egpuun te Tub. 7 Te pegkarineg dutu ni Dabid, insuhu din e si Huwab duma te langun ne mabbulut ne me bahani eyew te pegpakiggira. 8 Ne miglihawang e ka me Amunihanen wey migpangandam e diye te gumawan te siyudad eyew te pegpakiggira. Ne diye mule migpangandam te napu ka me matig-Sirya ne diye mig-ugpe te Suba wey Rihub, wey ka me lukes ne egpuun te Maaka.

9 Te pegpitew ni Huwab te due me kuntere diye te katangkaan din wey diye te peka rin, mig-alam e sikandin te amana egkateu ne me bahani te Israil wey impaandam din sikandan eyew te pegpakiggira te me matig-Sirya. 10 Ne impepanguluwan din ka duma ne me etew rin ki Abisay ne suled din, wey impaandam din e sikandan eyew te pegpakiggira te me Amunihanen. 11 Ne ingkahiyan ni Huwab si Abisay, “Bulihi key naa ke egkakita nu ne egkatalu key e te me matig-Sirya. Ne egbulihan ku re degma sikeykew ke egkatalu kew e te me Amunihanen. 12 Egnekal-nekal ki. Egbulut-bulut ki ne egpakig-ehet para te keet-etawan ta wey te siyudad te Manama ta. Ne iyan e balahad ka Magbebaye ne Manama ne eggimu ke nekey ka meupiya ne insuman-suman din.”

13 Ne miglusud e si Huwab duma te me etew rin wey nenakapallahuy ka me matig-Sirya. 14 Te pegkakita te me kabuhalan ni Amun te namallahuy e ka me matig-Sirya, namallahuy e degma sikandan ka migpariyu ki Abisay wey migseled e sikandan te siyudad dan. Purisu mig-uli e si Huwab puun te pegpakiggira te me Amunihanen wey miggendiyad te Hirusalim.

15 Te nakamaan-maan e ka me matig-Sirya te natalu sikandan te me matig-Israil, miglibulung e man‑e sikandan. 16 Ne impaangey ni Hadadisir ka duma pad ne me matig-Sirya ne diye nangugpe te kewun‑aan te Weyig ne Iyupratis. Ne nangendiyad sikandan te Hilam duma ki Subak, ka pangulu te me sundalu ni Hadadisir. 17 Te nahuhuran e si Dabid kayi, inlibulung din e ka langun ne matig-Israil wey miglapas e sikandan te Hurdan, wey miggendiyad te Hilam. Ne migpangandam e degma diye ka me matig-Sirya ne egpakiggira engki Dabid. Ne migpahiggireey e sikandan. 18 Piru nakapallahuy ka me matig-Sirya wey nakapatey ensi Dabid te pitu ne gatus (700) ne etew ne migmanguntud te me karwahi wey hep‑at ne pulu ne libu (40,000) ne sundalu ne migmangudde. Ne napalian si Subak, ka pangulu te me sundalu wey migpatey sikandin diye. 19 Te nakamaan-maan e ka langun ne Hari ne sakup ni Hadadisir te natalu e sikandan te me matig-Israil, migpakiggusey e sikandan te me matig-Israil wey migpasakup e kandan. Purisu puun dutu, naaldek e ka me matig-Sirya ne egbulig te me Amunihanen.