1 Ne due mateles ne malitan ne anak ni Dabid ne egngaranan ki Tamar ne atebey ni Absalum. Ne due man‑e lukes ne anak ni Dabid te duwey rin ne egngaranan ki Amnun ne naalihan ki Tamar. 2 Piru kene din egkeyimu ka igkeupii rin diye ki Tamar tenged su mengebay mem pad sikandin. Ne tenged kayi, nabaybayaran e sikandin su ware egkeyimu rin taman te migderalu rin e. 3 Ne due alukuy ni Amnun ne egngaranan ki Hunadab ne anak ni Simiyas ne suled ni Dabid ne lukes. Ne subla ne utekan si Hunadab. 4 Ne mig-insaan din si Amnun, “Mania te egkitkiteen ku sikeykew se anak te Hari ne eglungku te tagse maselem? Ne kun pangguhuri a te prublima nu?”

Ne migtabak si Amnun, “Naalihan a ki Tamar ne atebey te suled ku ne si Absalum.”

5 Ne ingkahiyan sikandin ni Hunadab, “Hibat-hibat ka wey pareralu ka. Ne emun ke egleuy ka amey nu keykew, kahii nu sikandin, ‘Peendiniya nu ubag ka atebey ku ne si Tamar wey peuyana nu te egkakeen ne eg-andamen din kayi te tangkaan ku eyew egkakita ku, wey egpasungit a kandin.’ ” 6 Purisu miggibat si Amnun wey migpareralu sikandin.

Te pegleuy te Hari kandin, ingkahiyan din sikandin, “Eghangyu a keykew ne peendiniya nu si Tamar ne atebey ku wey peyimuwa nu sikandin te pila-pila ne paan kayi te tangkaan ku su eyew egpasungit a kandin.”

7 Purisu impakahiyan e ni Dabid si Tamar diye te palasyu, “Hendiye ka te baley te maama nu ne si Amnun wey andami nu sikandin te egkakeen.” 8 Sikan naa ka miggendiyad si Tamar te baley te maama rin ne si Amnun wey neumaan din sikandin ne miggibat-hibat. Ne migkuwa si Tamar te harina wey inluyang din e seini wey inggimu rin e ne paan taheed te egpipitew si Amnun. Ne inggilutu din e seini. 9 Te nalutu e ka paan, inggeun din e seini puun te kale wey insendad din e ki Amnun piru ware sikandin migkeen. Ne impepalihawang e ni Amnun ka langun ne etew ne diye te tangkaan din. Purisu nanlihawang e ka me etew. 10 Ne ingkahiyan ni Amnun si Tamar, “Uyana nu kayi te sinabeng ka paan wey sungita a nikeykew.” Ne in-uyan e ni Tamar ka paan diye ki Amnun diye te sinabeng. 11 Piru te igparani rin e diye ki Amnun ka paan eyew egsungiten sikandin, inleheng e sikandin ni Amnun wey ingkahiyan, “Hendini ka atebey ku, hulid ka keddi.”

12 Ne migtabak si Tamar, “Kena a nikeykew lehenga su kene seini ne eleg ne egkeyitabu kayi te Israil. Kene ka himu te sika ne dereeti ne himu. 13 Ke eglehengen a nikeykew, kene ku egkaantus ka hilew ku. Ne sikeykew, egkeyimu kad ne sabeka te me lalung ne etew kayi te Israil. Purisu, eghangyuen ku sikeykew ne inangen nu seini te Hari su migpalintutuu a ne kene ka nikandin egbalibaran te peg-asawa keddi.” 14 Piru ware sikandin pammineha ni Amnun wey neyimu rin iya ka igkeupii rin su manmanekal ma sikandin ki Tamar.

15 Piru te neimpusan e seeye, sahuhune ne igkeepes e amana ni Amnun si Tamar wey migsubla pad ka pegkeepes din du te alig din kandin. Ne ingkahiyan ni Amnun si Tamar, “Awe ka kayi.”

16 Piru migtabak si Tamar, “Kena a nikeykew paawaa kayi su subla pad sika ne mareet du te pegleheng nu keddi.”

Piru ware sikandin pammineha ni Amnun. 17 Ne in-umew rin ka suluhuanen din wey ingkahiyan, “Ipalihawang nu seini se malitan wey pagguli nu ka gumawan ke egpakalihawang e sikandin.” 18 Purisu impalihawang e si Tamar te seeye ne suluhuanen wey impaggulan din e ka gumawan.

Te seini ne timpu, migsaluub si Tamar te malayat wey mateles ne kumbale. Sika ka igsaluub te ware pad neyilabeti ne mengebay ne me anak te Hari dengan. 19 Piru inggisi mule ni Tamar ka malayat wey mateles ne kumbale ne insaluub din wey intahuan din te abu ka ulu rin. Ne in-utuk din ka belad din wey miggipanew ne migpanaman migsinehew. 20 Ne mig-insaan si Tamar te maama rin ne si Absalum, “Inggilabetan ka te maama nu ne si Amnun? Kene nu re seini diralema atebey. Maama nu sikandin, purisu kene nu seini iwangal-wangal.” Ne diyad e mig-ugpe si Tamar te baley ni Absalum ne miglungku wey migmulmulengew.

21 Te pegkanengnengi ni Dabid te neyitabu, nabelu amana sikandin. 22 Ne ware inlalag ni Absalum ki Amnun ne meupiya wey ke mareet piru indumutan din si Amnun tenged te pegpeyilew rin te atebey rin ne si Tamar.

23 Te peglihad te daruwa ne leg‑un, impaalutan ni Absalum ka me karniru rin diye te Baal-Hasur ne marani te Ipraim. Ingginggat din ka langun ne lukes ne anak te Hari. 24 Ne miggendiye si Absalum te Hari wey migkahi, “Egpaalutan ku ka me karniru ku wey eghangyuen ku sikeykew wey ka me suluhuanen nu te pegtambung.”

25 Piru migtabak si Dabid, “Kena a egpekeendiye, anak. Kene egkaayun ne egmangendiye ki langun su egkahastuwan ka te dakel.” Piru migpamehes iya perem si Absalum kandin, piru ware iya miggendiye si Dabid. Impanalanginan din de si Absalum.

26 Ne migkahi si Absalum, “Ke kene egkaayun, eghangyuen ku sikeykew ne iparuma nu keddi ka suled ku ne si Amnun.”

Ne mig-insaan sikandin te Hari, “Mania te egparumeen nu sikandin?” 27 Ne migpamehes iya si Absalum, sikan naa ka imparume e te Hari si Amnun wey ka langun ne anak din ne me lukes. 28 Ne impanpanayan ni Absalum ka me suluhuanen din, “Iipata niyu naa si Amnun ke egkewubug e wey ke egsuhu a kaniyu ne eggimatayan sikandin, himatayi niyud iya sikandin. Kene kew kaaldek su sikeddi ka migsuhu kaniyu. Pakannekal wey pakabbulut kew.” 29 Sikan naa ka inggimu e te me suluhuanen ni Absalum diye ki Amnun ka insuhu kandan. Ne migdagdahew nanguntud te me mula* Sabeka seini ne ayam ne anak te lukes ne asnu wey beyan ne kudde. ran ka langun ne me anak te Hari, wey migmalungkesu e.

30 Taheed te diye pad sikandan te dalan peendiye te Hirusalim, due nakahuhud ki Dabid ne in-amin pangimatayi ni Absalum ka me anak din, wey warad iya sabeka kandan ne nasame. 31 Ne migsasindeg ka Hari wey inggisi din ka kumbale din wey miggibat diye te tane. Inggisi degma te me suluhuanen ne nanasindeg palingut kandin ka me kumbale dan. 32 Piru migkahi si Hunadab ne anak ni Simyas ne suled ni Dabid ne lukes, “Mahal ne Hari, kene ka suman-suman te impangimatayan ka langun ne me anak nu. Si Amnun de ka inggimatayan su tapey e seini planuwa ni Absalum puun pad te pegleheng ni Amnun ki Tamar. 33 Purisu kene ka palintutuu te guhuren ne impangimatayan ka langun ne me anak nu. Si Amnun de ka inggimatayan.”

34 Ne migpallahuy e si Absalum.

Te pegpantew te talagtameng te palasyu, nakakita sikandin te masulug ne me etew ne egginguma ne egpuun te iglineb, wey diye namaye te kakiliran te bubungan. Ne miggendiyad ka talagbantey te Hari wey migkahi, “Due me etew ne nakita ku seeye te dalan te Hurunaim,† Te Hibruwanen: seeye te dalan ne egkeinniyuhan din. seeye te kakiliran te bubungan.” 35 Ne ingkahiyan ni Hunadab ka Hari, “Pitawa nu. Duen e ka me anak nu sumale te ingkahi ku ganna.” 36 Te nekeimpus e sikandin ka eglalag, nangingume e ka me anak te Hari wey migmanaman-taman sikandan naninehew. Ne migpanaman degma migsinehew ka Hari wey ka langun ne suluhuanen din.

37  ✡ 2Sam 3:3.Ne migpallahuy si Absalum wey miggendiye ki Talmai ne Hari te Gisur wey anak ni Amihud. Ne miglungku si Dabid te tagse aldew tenged te anak din ne si Amnun. 38 Ne diye pad mig-uugpe si Absalum te Gisur te tatelu ne leg‑un. 39 Piru naalimengawan si Dabid ki Absalum te nataman e ka peglungku din tenged te pegpatey ni Amnun.