1  ✡ 2Sam 9:9-10.Te nakalihad e te deisek si Hari Dabid diye te puntul te bubungan, insinug-ung e sikandin ni Siba, ka suluhuanen ni Mipibusit. Due in-uyan din ne daruwa ne asnu ne indulanan din te daruwa ne gatus (200) ne paan, sabeka ne gatus (100) ne kemkem ne behas te paras, sabeka ne gatus (100) ne punduk te inggihangu ne behas te iggira, wey binu ne intahu diye te puntil ne laplap te mananap. 2 Ne mig-insaan te Hari si Siba, “Mania te migpanguyan ka due?”

Ne migtabak si Siba, “Hari, egpeunturan sika se me asnu te pamilya nu, wey para te me kanakan ka sika se me paan wey me prutas, wey igpeinum ka binu te seeye se egkalepu diye te disirtu.”

3  ✡ 2Sam 19:25-27.Ne mig-inse ka Hari, “Hendei si Mipibusit, ka apu te ahalen nu ne si Saul?”

Ne migtabak si Siba, “Migpalunggehaat de sikandin diye te Hirusalim su migsuman-suman sikandin ne ig-uli e te me matig-Israil diye te kandin ka migharian te apu din te seini ne aldew.”

4 Ne ingkahiyan te Hari si Siba, “Ka langun ne ki Mipibusit dengan, keykew e kuntee.”

Ne migkahi si Siba, “Mahal ne Hari, andam a ne egpasuluhuanen keykew, wey meupiya perem ke igkahala a nikeykew.”

5 Te pegginguma ni Dabid diye te lungsud ne Bahurim, due etew ne miglihawang puun dutu. Sabeka sikandin te me karumaan ni Saul ne egngaranan ki Simii ne anak ni Gira. Ware din sanggeli te egdilus si Dabid taheed te egdugpuen din sikandin. 6 Ne impandegpak din e te batu si Dabid wey ka langun ne suluhuanen din. Ne miglingutan si Dabid te langun ne etew rin, wey te me bahani rin. 7 Ne migkahi si Simii, “Awe ka kayi, mangngimatey. Ware karuan nu ne etew! 8 Insulian kad e te Magbebaye ne Manama tenged te pegpangimatey nu te pamilya ni Saul. In-ahew nu ka migharian din piru imbehey e kuntee te Magbebaye diye te anak nu ne si Absalum. Miggingume e keykew ka karereetan nu su mangngimatey ke ma ne etew!”

9 Ne mig-insaan te anak ni Siruya ne si Abisay ka Hari, “Mahal ne Hari, mania te egbalaharen nu re ka sika ne etew ne iling te namatey ne asu ne egdilus keykew? Tuhuti a nikeykew ne egtamped te ulu rin!”

10 Piru migtabak ka Hari, “Sikaniyu se me anak ni Siruya, nekey bes ka labet niyu? Ke insuhu sikandin te Magbebaye ne Manama ne egdilusen a, hentew e naa degma ka egbalabag kandin?” 11 Ne ingkahiyan ni Dabid si Abisay wey ka langun ne suluhuanen din, “Ke migpakannekal ma ka anak ku mismu te peggimatey keddi, iyan naan pa iya ka seini se etew ne kabuhalan ni Binhamin? Balahara niyu re due sikandin ka egpandilus su insuhu sikandin te Magbebaye ne Manama. 12 Kema ke egkakita te Magbebaye ne Manama ka kalasayan ku wey egsulian din te meupiya ka pegdilus din keddi kuntee ne aldew.” 13 Purisu migpabulus e si Dabid wey ka langun ne etew rin te peggipanew taheed te diye migbaye si Simii te bubungan ne egkatalipag dan. Ne migpabulus sikandin ka egdilus ki Dabid te sasangan sikandin ne eggipanew. Ne impandegpak din sikandin te batu wey insabulakan te alinepung. 14 Ne migginguma si Dabid wey ka langun ne etew ne migduma kandin diye te Weyig ne Hurdan* Ka lalag ne “Hurdan” ware diye te Hibruwanen piru egkakita seini diye te sabeka ne sinulat ne Grigu. ne nabeley-beley. Ne nangimeley e sikandan diye.

15 Te seeye ne timpu, miggendiye si Absalum te Hirusalim ne indumaan ni Ahitupil wey te langun ne matig-Israil. 16 Te nekeume e si Husay ne Arkihanen ne alukuy ni Dabid, sahuhune ne miggendiye sikandin ki Absalum wey migkahi, “Egkeuyag ka Hari! Egkeuyag ka Hari!”

17 Ne mig-insaan ni Absalum si Husay, “Seini naa ka pegpapitew nu te geyinawa te alukuy nu ne si Dabid? Mania te ware ka migduma kandin?”

18 Migtabak si Husay, “Kene ku sika egkeyimu. Diya a eglapig te etew ne in-alam te Magbebaye ne Manama, te me etew ne kayi kuntee, wey te langun ne etew te Israil. Ne egpalunggehaat a duma kandin. 19 Timul pad due, hentew bes iya ka egpamakayen ku, ke kene sikeykew man de iya se anak te ahalen ku ne si Dabid? Egpamakey a degma keykew, iling te pegpamakey ku te amey nu.”

20 Ne ingkahiyan ni Absalum si Ahitupil, “Ne la, tambag ka ke nekey ka eleg ne eggimuwen ta.”

21 Ne migtabak si Ahitupil, “Panguliri nu ka me duwey te amey nu ne inggaat din eyew te pegtanggu te palasyu. Ne egkarineg te langun ne matig-Israil ne impeyibelu nu amana ka amey nu. Ne puun due, egkanasnasian pad ne egkabagget ka me etew ne eglapig keykew.” 22  ✡ 2Sam 12:11-12.Purisu inggimuwan dan si Absalum te balungbalung diye te atep,† Mapatag ka atep te me baley diye te Israil. wey diye din hilabeti ka me duwey te amey rin ne egkakita-kita re due te me etew.

23 Te seeye ne timpu, in-ikul iya ni Absalum ka me tambag ni Ahitupil, iling te inggimu ni Dabid su in-isip dan ne egpuun te Manama ka tambag ni Ahitupil.