1 Ne inlibulung ni Dabid ka me etew ne migduma kandin. Ne imbaad-baad din sikandan te tigsenge-libu (1,000) wey tigsenge-hatus (100). Ne mig-alam sikandin te egpangulu te tagse punduk. 2 Ne impeyipanew ni Dabid sikandan te tatelu ne punduk. Ne si Huwab ka migpangulu te sabeka ne punduk, si Abisay ne suled ni Huwab ka migpangulu te igkarangeb ne punduk, wey si Itay ne Hitihanen ka migpangulu te igkatelu ne punduk. Ne migkahi si Hari Dabid, “Egduma a iya kaniyu te egpakiggira.”

3 Piru ingkahiyan sikandin te me etew, “Keilangan ne kene ke re egduma kanami, su ke egpakapallahuy key, egbalaharen key re nikandan, minsan pad ke katenge kanami ka egpatey. Piru para kanami, egpekeiling ka mule te sapulu ne libu (10,000) ne sundalu, purisu meupiya pad ke egpalunggehaat ke re diye te siyudad wey peuyani key re te igkabulig nu kanami.”

4 Ne migtabak ka Hari, “Eggimuwen ku ka minsan nekey ne insuman-suman niyu ne meupiya.” Ne migsasindeg ka Hari diye te kakiliran te gumawan te siyudad taheed te migmanlihawang ka tigsenge-libu (1,000) wey tigsenge-hatus (100) ka langun ne sundalu. 5 Ne impanagtahaan te Hari si Huwab, si Abisay, wey si Itay te migkahi, “Kene niyu menuwa si Absalum tenged keddiey.” Ne nakarineg ka langun ne sundalu te impanaha-taha te Hari te me kumandir meyitenged ki Absalum.

6 Purisu migpeendiyad te giraanan ka me sundalu ni Dabid eyew te pegpakiggira te me matig-Israil. Ne diye sikandan migpahiggireey te Puwalas te Ipraim. 7 Ne natalu te me etew ni Dabid ka me matig-Israil diye. Ne susuluhi ka migpatey te seeye ne aldew—daruwa ne pulu ne libu (20,000) ne etew. 8 Ne nekeempet te intiru ne tane ka gira wey masulug ka migpatey ne migsahap diye te puwalas du te migpatey te gira.

9 Ne sahuhune ne nasinug-ung ni Absalum ka me etew ni Dabid. Te seeye ne timpu, mig-untud sikandin te mula.* Sabeka seini ne ayam ne anak te lukes ne asnu wey beyan ne kudde. Diye migbaye ka kudde te diralem te dakel ne uk ne kayu wey migsanggat ka ulu rin te me sugpang kayi. Ne migpabulus e migpallahuy ka kudde taheed te nahaat si Absalum ne nabitin. 10 Ne due nakakita ki Absalum wey ingkahiyan din e si Huwab, “Nakita ku si Absalum ne nabitin diye te kayu ne uk.”

11 Ne ingkahiyan ni Huwab seeye se etew ne migpanugtul kandin, “Nekey? Nakita nu sikandin? Mania te ware nu sikandin himatayi? Egbehayan ku perem sikeykew te sapulu ne seleppi ne pelata wey sabeka ne sinturun te bahani.”

12 Piru ingkahiyan si Huwab te seeye se etew, “Minsan ke egbehayan e pad nikeykew te senge-libu (1,000) ne timman ne seleppi ne pelata, kene ku eggimatayan ka anak te Hari. Nakarineg key te pegpanaha-taha te Hari keykew, ki Abisay, wey ki Itay ne keilangan ne kene egmenuwen si Absalum tenged kandin. 13 Piru ke eg-akalan ku ka Hari pinaahi te peggimatey te anak din wey ke egkanengnengan din seini, kena a iya nikeykew egpangabangan.”

14 Ne migkahi si Huwab, “Ware karuan ke egpakiglalag e pad keykew meyitenged due.” Ne migkuwa sikandin te tatelu ne kelaab wey impilak din e diye te pusung si Absalum taheed te manekal pad sikandin ne nabitin diye te uk ne kayu. 15 Ne inlingutan pad iya man‑e si Absalum te sapulu ne kanakan ne talag-uyan te me panganiban ni Huwab wey inggimatayan dan e sikandin.

16 Ne imparahing e ni Huwab ka trumpita eyew te pegpasanggel te me etew rin te pegtalukun te me sundalu te Israil. 17 Ne ingkuwa ran e ka lawa ni Absalum wey in-ulug dan e diye te maralem ne lungag diye te puwalas wey intambuan dan e te me batu. Taheed te egkalihet pad sikandan ka egtetambu, namallahuy e ka langun ne matig-Israil diye te me ugpaan dan.

18 Te neuyag pad si Absalum, due immeg-untud-untud din ne me batu diye te Napu te Hari para te pegkeetew rin tenged su ware anak din ne lukes ne eg-uyan te ngaran din. Purisu ingngaranan din seeye se limlimuan din ne batu te ngaran din wey sikan ded ka ngaran kayi taman kuntee.

19 Ne migkahi ka anak ni Saduk ne si Ahimaas, “Tuhuti a nikeykew ne egpallahuy diye te Hari eyew te pegguhud kandin te inluwas sikandin te Magbebaye ne Manama puun te me kuntere din.”

20 Piru migkahi si Huwab, “Seup nud e ne aldew pangguhuri ka Hari. Kene egkaayun ne kuntee su namatey ka anak te Hari.” 21 Ne ingkahiyan ni Huwab ka sabeka ne etew ne matig-Kus, “Hipanew ka wey pangguhuri nu ka Hari ke nekey ka nakita nu.” Te nekeimpus e ka etew ne migpanimbuel diye tangkaan ni Huwab, migpallahuy e sikandin.

22 Ne ingkahiyan e man‑e ni Ahimaas si Huwab, “Minsan nekey ka egkeyitabu, pasinundula a iya nikeykew te seeye se etew ne matig-Kus.”

Piru mig-inse si Huwab, “Tatu, mania te egkeupian ka ne eggendiye te nakanengneng ke ma te ware dasag ne egkarawat nu te pegpangguhud nu kayi?”

23 Ne migtabak sikandin, “Minsan nekey ka egkeyitabu, eggendiya a iya.”

Ne migkahi si Huwab, “Ne hendiye kad iya.” Purisu migpallahuy e si Ahimaas wey diye migbaye te napu te Hurdan, wey newun‑aan din pad ka etew ne matig-Kus.

24 Taheed te migpinpinnuu si Dabid diye te elat-elat te daruwa ne gumawan te siyudad, migpamaneyik e mule ka talagbantey diye te atep te gumawan te siyudad wey migsesasindeg diye. Te pegpantew rin, due nakita rin ne sabeka ne etew ne migpallahuy peendiye te kandan. 25 Ne migpanguleyi e sikandin ka migpanugtul te Hari. Ne migkahi ka Hari, “Ke migsabsabeka sikandin, due meupiya ne guhuren din.”

Te egpalundaniyan e ka etew, 26 duen e man‑e lein ne etew ne migpallahuy ne nakita te talagbantey. Ne impanguleyian din e seeye se migbantey te gumawan te migkahi, “Pitew ka! Duen pad lein ne etew seeye ne migpallahuy peendini!”

Ne migkahi ka Hari, “Due degma meupiya ne guhuren din.”

27 Ne migkahi ka talagbantey, “Hendue te pegpallahuy ni Ahimaas ne anak ni Saduk ka miggun‑a.”

Ne migkahi ka Hari, “Meupiya sikandin ne etew wey mig-uyan sikandin te meupiya ne guhuren.”

28 Ne in-elit-elit ni Ahimaas ka Hari te migpanguleyi ne miggenendue, “Meupiya ka langun!” Ne mig-usengul e sikandin diye te tane diye te tangkaan te Hari wey migkahi, “Mahal ne Hari, egdeyrayen ka Magbebaye ne Manama nu ne migpepanalu keykew te me etew ne migribildi keykew.”

29 Ne mig-inse ka Hari, “Ware ded namenu si angget Absalum?”

Ne migtabak si Ahimaas, “Te pegsuhu te suluhuanen nu ne si Huwab keddi, nakita ku ne newukag amana ka me etew, piru wara a nakanengneng ke nekey ka ingkewukag dan.”

30 Ne migkahiyan sikandin te Hari, “Dapig ke pa wey sesasindeg ke pa due.” Purisu migdapig e sikandin wey migsesasindeg.

31 Ne miggingume e ka matig-Kus wey migkahi, “Due meupiya ne guhuren ku para keykew ahalen ne Hari! Su inluwas ka te Magbebaye ne Manama te langun ne migribildi keykew.”

32 Ne mig-insaan te Hari ka matig-Kus, “Ware ded namenu si angget Absalum?”

Ne migtabak ka matig-Kus, “Mahal ne Hari, egpekeiling perem te neyitabu ki Absalum ka egkeyitabu te langun ne kuntere nu wey te langun ne migribildi keykew.”

33 Ne subla ne miglungku wey nalaggew ka Hari. Migpamaneyik sikandin diye te sinabeng diye te ampew te gumawan ne migsinehew. Te pegsinehew rin, migkahi sikandin, “Absalum ne anak ku! Anak ku, anak ku, Absalum! Meupiya perem ke sikeddi ka namatey wey kene ne sikeykew, Absalum ne anak ku! Anak ku!”