1 Nataman, mig-alam si Hari Daryu te 120 ne me gubirnadur ne iyan egmandu te migharian din. 2 Ne mig-alam ka Hari te tatelu ne me pangulu eyew iyan egpangulu te seeye ne me gubirnadur su eyew kene egkeyimu ne ware pulus te me planu rin. Ne sabeke en iya si Danyil te seeye se tatelu ne me pangulu. 3 Ne si Danyil iyan labew te langun ne pangulu tenged te katuenan din ne kene egkeilingan, purisu migsuman-suman ka Hari ne si Danyil ka egpeuyanen te intiru ne migharian din. 4 Tenged dutu, migpamitew ka duma rin ne me pangulu wey ka me gubirnadur te seyyup din te peg-uyan din diye te migharian eyew igpakasumbung dan sikandin diye te Hari. Piru ware nakita ran ne seyyup din su egkasalihan nahud sikandin wey ware igkarew‑ey te me himu rin. 5 Seeye naa, migkahi e sikandan, “Ware iya egkakita ta ne seyyup ni Danyil eyew igpakasumbung ta sikandin, angin e ke balaud te Manama rin ka eg-aliddananen ta.”

6 Purisu miggendiye sikandan te Hari wey migkahi, “Mahal ne Hari, egkeuyag ka te ware egtamanan! 7 Ka langun ne pangulu kayi te migharian nu, wey ka me gubirnadur, ka me mayur, ka me talagtambag, wey ka me sinalihan, nenekeg-uyun sikandan ne eghangyu keykew ne eggimu ka te suhu ne ware lein ne manama wey ke etew naa ne eg-ampuan te me etew seled te tatelu ne pulu (30) ne aldew, angin e keykew Hari. Ka egsupak, eg-uluhen diye te lungag ne impeugpaan te me liyun. 8 Sikan naa, mahal ne Hari, ipasulat nu seini wey pirmeyi nu eyew kene seini egkabalbalawan sumale te balaud te Midiyan wey te Pirsya ne kene egkabalbalawan.” 9 Purisu, impasulat e te Hari ka suhu wey impirmaan din e seini. 10 Te pegkanengnengi ni Danyil te impirmaan e te Hari ka suhu, mig-uli e sikandin diye te baley rin. Ne diye te sinabeng din diye te pantaas, due me bintana ne nallukatan ne diye egpakatangke te Hirusalim. Ne diye egpanimbuel sikandin ka eg-ampu wey egpasalamat te Manama rin katatelu te tagse aldew, sumale te nabatasan din ne eggimuwen.

11 Nataman, nakita si Danyil te seeye se me etew ne nenekeg-uyun ne eg-iipat kandin ne mig-ampu sikandin wey migpasalamat te Manama rin. 12 Purisu, miggendiyaan dan e ka Hari wey in-insaan dan e meyitenged te suhu din, “Mahal ne Hari, migpirmaan nu man en iya ka suhu ne ware lein ne manama wey ke etew naa ne eg-ampuan te me etew seled te tatelu ne pulu (30) ne aldew, angin e keykew Hari? Ne seeye se egsupak, eg-uluhen diye te lungag ne impeugpaan te me liyun, menu ma iya?”

Ne migtabak ka Hari, “Uya iya! Kenad sika egkabalbalawan sumale te balaud te Midiyan wey Pirsya ne kene egkabalbalawan.”

13 Ne migkahiyan dan ka Hari, “Mahal ne Hari, si Danyil ne narakep wey in-uyan puun te Huda, ware migtuman keykew wey te suhu nu naa, ke kene, nasi sikandin mig-ampu te Manama rin te katatelu te tagse aldew.”

14 Te pegkarineg dutu te Hari, amana rin nalaggew-laggew wey migsuman-suman sikandin te paahi ke egmenuwen din te egluwas si Danyil. Ne naapunan de due sikandin ka migpakannekal eyew egkapangabangan din si Danyil. 15 Ne miggendiyad man‑e te Hari seeye se me etew ne nenekegsabut, wey migkahi, “Mahal ne Hari, nakanengneng ka ne ka balaud te Midiyan wey te Pirsya, kene egkaayun ne egkabalbalawan ka suhu te Hari.”

16 Sikan naa ka impaangey te Hari si Danyil wey impeulug diye te lungag ne impeugpaan te me liyun. Ne migkahiyan din si Danyil, “Egluwasen ka perem te Manama ne impamakey nu layun!” 17 Ne dutu, insagpengan dan e te dakel ne batu ka be‑be te lungag wey intuusan e te sising te Hari wey te sising te me pangulu eyew ware egpakabalew-balew te egkeula-ula ni Danyil diye. 18 Nataman, mig-uli e si Hari Daryu diye te palasyu rin. Ne ware sikandin migkeen te seeye ne marusilem, ware miggale-gale wey ware nakalipereng.

19 Te sikan pad egkasi-si ka kaliwaswasan, mig-enew e ka Hari wey migdagdahew miggendiye te lungag ne impeugpaan te me liyun. 20 Te marani e ka Hari diye, migpanguleyi sikandin wey egkeila te laheng din ne nalaggew-laggew sikandin. Migkahi sikandin, “Danyil, suluhuanen te Manekal ne Manama, inluwas ke naan ded te Manama nu ne impamakey nu layun?”

21 Ne migtabak si Danyil, “Mahal ne Hari, egkeuyag ka te ware egtamanan! 22 Migpeuyanan a te Manama ku te panalihan eyew te pegpatiem te me be‑be te me liyun, sikan naa ka wara a nikandan menuwa, tenged su ware neyimu ku ne mareet diye te tangkaan din wey ware seyyup ne neyimu ku due te keykew.”

23 Amana nahale ka Hari wey migsuhu sikandin ne igpalihawang si Danyil diye te lungag. Purisu, impalihawang dan e si Danyil wey warad iya namenu tenged su migsalig sikandin te Manama. 24 Nataman, impeumew e te Hari ka me etew ne migsumbung ki Danyil, wey in-ulug e sikandan diye te lungag ne impeugpaan te me liyun lagkes ka me anak dan wey me asawa ran. Te ware pad mule sikandan nakalene, impanagmak e sikandan te me liyun wey impangebkeb e ka me tul‑an dan.

25 Pegkapenga dutu, insulatan e ni Hari Daryu ka langun ne keet-etawan te nalein-lein ne tribu wey namuun te minsan hendei ne nasud wey linalahan. Seini ka sulat din, “Egkanasnasian pad perem ka keupianan due te kaniyu. 26 Egsuhuen ku sikaniyu langun ne sakup te peghari ku, keilangan ne egtahud wey egkaaldek te Manama ni Danyil.

28 Purisu, neyimu ne dakel ka katungdanan ni Danyil te timpu ne si Daryu ka mighari wey minsan pad te si Siru e ne matig-Pirsya ka mighari.