1 Ne ingkahiyan e man‑e ni Muwisis ka me kabuhalan ni Israil, “Panunggilingan ke diye te tane ne igbehey kaniyu te Magbebaye ne Manama niyu, due nakita niyu ne etew ne inggimatayan ne nekeyibat diye te tane, wey ware niyu nanengnengi ke hentew ka miggimatey kandin, 2 keilangan ne egsekeren te me igdatu wey me talewukum niyu, ke hendei ne me lungsud ka madmarani te natahuan te etew ne inggimatayan. 3 Ne ka me igdatu te siyudad ne madmarani te natahuan te etew ne inggimatayan, egkuwa te beyan ne nati ne baka ne ware pad anak wey ware pad idaru.* Te Hibruwanen: ware de due nakahanuy te yuggu. 4 Ne eg-uyanen dan seini diye te mapatag ne tane ne ware de due ken‑u nadaru wey napamulei, wey due me weyig ne kene egkeet-etiyan. Ne eggepuen dan ka lieg te nati ne baka. 5 Ne keilangan degma ne eggendiye ka talagpanubad ne me Libita, su in-alam ma sikandan te Magbebaye ne Manama niyu eyew egpamakey wey egpanalangin pinaahi te ngaran te Magbebaye ne Manama. Ne pinaahi te eglalahen dan, egkewusey ka me apulan wey pegpanlusud. 6 Ne ka langun ne igdatu te siyudad ne madmarani te natahuan te etew ne inggimatayan, egpanlu‑lu te me belad dan diye te dibabew te nati ne baka ne inggepu se lieg. 7 Ne egkahi sikandan, ‘Kene ne sikanami ka miggimatey te seini ne etew, wey ware key degma nakakita ke hentew ka miggimatey kandin. 8 He Magbebaye ne Manama, pasayluwa nu ka me kabuhalan ni Israil ne impalihawang nu puun te Ihiptu wey kene key re ubag nikeykew pakasalaa te kamatayen te seini se etew ne ware sale.’ Ne warad egpatabaken dan te kamatayen te sika ne etew. 9 Pinaahi te pegtuman niyu te seini ne suhu, kene kew eg-isipen ne nakasale te kamatayen te etew ne ware sale su inggimu niyu ma ke nekey ka matareng diye te Magbebaye ne Manama.”

10 Ne ingkahiyan e man‑e ni Muwisis ka me kabuhalan ni Israil, “Ke egpakiggira kew te me kuntere niyu, wey igbehey sikandan te Magbebaye ne Manama kaniyu, wey egpandakepen niyu sikandan, 11 ke due nakita niyu ne mateles ne malitan ne duma te impandakep niyu, wey neupian kew kandin, wey ingkeupii niyu te egpangasawa, 12 egkaayun ne egdumeen niyu sikandin diye te baley niyu, wey tabuluhi niyu sikandin, wey panempuhi niyu ka me sulu rin. 13 Ne liwani niyu ka ingkukumbale din te pegkarakep kandin. Ne keilangan ne eg-uugpe ka malitan diye te baley niyu te sabeka ne bulan taheed te eglungku sikandin para te amey wey iney rin. Pegkeimpus due, egkaayun e ne eg-asaween niyu sikandin. 14 Piru te katamanan, ke warad eyam niyu te malitan, keilangan ne egtuhutan niyu sikandin ne eggipanew minsan hendei eggendiye. Kene niyu sikandin ibelegye wey ke eg-uripenen naa, su nabaley-baley niyud ma sikandin.”

15 Ne ingkahiyan e man‑e ni Muwisis ka me kabuhalan ni Israil, “Ke due sabeka ne etew ne daruwa se asawa—inggeyinawaan din ka sabeka, wey ka sabeka ware, wey neelin ne due me anak din ne me lukes te daruwa ne asawa rin. Ke iyan nakaanak te kinakakayan ka asawa rin ne ware din geyinawei, 16 ke egba-baaren din e ka karatuan din diye te me anak din, keilangan ne ka baad ne para te kinakakayan ne anak, kene din igbehey diye te anak te inggeyinawaan din ne asawa rin. Ke kene, diye din seini igbehey te kinakakayan ne anak te dangeb ne asawa rin ne ware din geyinawei. 17 Keilangan ne eg-ileen din isip kinakakayan ne anak din ka anak ne lukes te asawa rin ne ware din geyinawei, wey keilangan ne eglupien din te kararuwa ka baad ne igbehey rin puun te karatuan din, su anak din ma sikandin, wey due katenged din ne egdawat te baad din isip kinakakayan ne anak ne lukes.”

18 Ne ingkahiyan e man‑e ni Muwisis ka me kabuhalan ni Israil, “Emun ke due anak ne makehal se ulu, kene egtuman te amey wey iney minsan pad egparusaan sikandin piru kene iya egpammineg, 19 eg-uyanen sikandin te amey wey iney rin diye te tangkaan te me igdatu ne diye te gumawan te siyudad ne in-ugpaan din, 20 wey egguhuran dan ka me igdatu te egkahi, ‘Makehal se ulu te seini se anak ney, wey masinupaken, eg-usal-usal te seleppi, wey talewubug.’ 21 Ne egkataman, egbebatuwen e sikandin te langun ne mahinged te siyudad taman te egpatey sikandin. Te sika ne paahi, egkalinisan niyu ka siyudad niyu te langun ne mareet ne hinimuwan. Ne emun ke egpakanengneng ka duma ne me kabuhalan ni Israil meyitenged te neyitabu, egkaaldek e sikandan ne eggimu te iling due ne himu.

22 “Ke egparusaan te kamatayen ka sabeka ne etew tenged te sale ne neyimu rin, wey egbitinen sikandin diye te kayu, 23  ✡ Gal 3:13.keilangan ne kene egkapawaan ka lawa rin diye te imbitinan kandin. Keilangan ne iglebeng sikandin te sikan ded ne aldew, su ka egbitinen, indilus te Manama. Kene niyu linditi ka tane ne igbehey kaniyu te Magbebaye ne Manama niyu isip karatuan ne inggaat ne egkapanunud niyu.”