1 Seini ka me tahu te kasabutan ne impeyimu te Magbebaye ne Manama ki Muwisis duma te me kabuhalan ni Israil diye te inged te Muwab; timul seini te kasabutan ne inggimu te Manama duma te me kabuhalan ni Israil diye te Bubungan ne Sinay.

2 Ne impalibulung ni Muwisis ka langun ne me kabuhalan ni Israil wey ingkahiyan din sikandan, “Sikaniyu mismu ka nakakita te inggimu te Magbebaye ne Manama diye te Hari te Ihiptu, te langun ne upisyal rin, wey te intiru ne nasud din. 3 Nakita niyu ka makaalat-halat ne me karereetan, me palinneu wey me kein-inuwan ne inggimu te Manama. 4 Piru taman kuntee, ware din ipasabut kaniyu ka igpasabut te langun ne nakita niyu wey narineg niyu. 5 Ne te hep‑at ne pulu (40) ne leg‑un ne peggipanew niyu diye te disirtu, indumaan kew te Magbebaye ne Manama. Ne ware naggisi ka me kumbale niyu, wey ware nalleke ka me sandal niyu. 6 Ne ware paan diye ne egkakeen niyu wey ware binu ne egkeinum niyu, piru imbehayan kew te Magbebaye ne Manama te ingkeilangan niyu, eyew egkanengnengan niyu ne Magbebaye ne Manama niyu iya sikandin. 7  ✡ Num 21:21-30; Num 21:31-35.Te pegginguma ta te seini ne inged, migpakig-ehet kanta si Sihun ne Hari te Hisbun wey si Ug ne Hari te Basan, piru natalu ta sikandan. 8  ✡ Num 32:33.Ne in-ahew ta ka tane dan wey imbehey tad diye te me kabuhalan enni Rubin, Gad, wey te katenge te kabuhalan ni Manasis, isip egkapanunud dan. 9 Purisu tumana niyu te mapahetpet ka langun ne lalag te seini ne kasabutan eyew eglampus kew te langun ne eggimuwen niyu.

10 “Ne migmanasindeg kew langun kuntee kayi te tangkaan te Magbebaye ne Manama niyu; lagkes ka me pangulu te me kabuhalan niyu, ka me igdatu niyu, ka me upisyal niyu, ka langun ne lukes, 11 ka me asawa wey ka me anak niyu, ka me lapu ne mig-ugpe duma kaniyu, ka talagpangayu wey ka talagpanakeru kaniyu. 12 Seini kew langun kuntee migmanasindeg eyew te pegdawat te kasabutan ne impahunlibetan te Magbebaye ne Manama niyu. 13 Egkeupian sikandin ne egpamalehetan kaniyu kuntee ne keet-etawan kew iya nikandin, wey Manama niyu sikandin sumale te insaad din te me kaap-apuan niyu ne ensi Abraham, Isaak, wey si Hakub. 14 Ne ka seini ne kasabutan, kene ne para re kaniyu te migmanasindeg kuntee kayi te tangkaan te Magbebaye ne Manama, 15 ke kene, para degma te seeye se egsinundul ne kabuhalan niyu.

16 “Nakanengneng kew te egkeula-ula diye te Ihiptu, wey te peggendini ta, nakanengneng kew ke nekey ka egkeilingan te peggipanew ta diye te me inged te duma ne nasud; 17 nakita niyu ka me diyus-diyus dan ne kayu, batu, pelata, wey bulawan. 18  ✡ Hib 12:15.Taham-taham kew ne ware sabeka kaniyu ne eg-engked te pegpamakey te Magbebaye ne Manama, wey iyan e egpamakayen ka me manama te duma ne nasud; kema ke due sabeka kaniyu ne egsimba te me diyus-diyus te duma ne me nasud! Ka me etew ne eggimu due, egpekeiling te pinamula ne egbebehas te mapeit wey eggilu. 19 Ka minsan hentew ne nakarineg te seini ne me paney-paney te dilus, keilangan ne kene egsuman-suman ne kene sikandin egkamenu minsan egpabulus-bulus sikandin ne eggimu te minsan nekey ne igkeupii rin, su ka malehet, sikandin ka egpekeuyan kaniyu langun diye te karereetan. 20 Ne kene iya sikandin egpasayluwen te Magbebaye ne Manama; egkanlabkanlab de iya ka langet din iling te hapuy. Ne egkeyitabu iya te sika ne etew ka langun ne dilus ne nasulat te seini ne baseen. Ne eg-aween e te Magbebaye ne Manama ka ngaran te sika ne etew kayi te ampew te tane. 21 Ne igpalunsud-lunsud e sikandin te Magbebaye ne Manama puun te langun ne tribu te Israil, wey egpaantusen sikandin pinaahi te langun ne dilus ne nasulat te seini ne baseen te Balaud.

22 “Ne ka me kabuhalan niyu wey ka me lapu ne egpuun pad te maddiyu ne inged, egpakakita te me karereetan wey me dalu ne igpasalerep te Magbebaye ne Manama diye te tane niyu. 23  ✡ Hin 19:24-25.Ne egpekeiling e te mammara ne inged ne kene egkeugpaan ka tane niyu ne nabunbunan te asupri wey asin; kenad egkapamulaan wey warad egtubu ne minsan nekey ne sagbet. Iyan e egkeilingan ka neyitabu te Suduma, Gumura, Adma, wey Sibuwim ne indereetan te Magbebaye ne Manama tenged te mangune-kune ne langet din. 24 Ne egpekeinse ka keet-etawan te langun ne nasud, ‘Mania te inggimu seini te Magbebaye ne Manama te tane dan? Mania te nalanglangetan sikandin?’ 25 Ne egtabak ka keet-etawan, ‘Tenged te insupak dan ka kasabutan ne inggimu te Magbebaye ne Manama duma kandan, ka Manama te me kabuybuyahan dan. Inggimu seini te Manama ne kasabutan te timpu ne impalihawang din sikandan puun te Ihiptu. 26 Ne migsimba wey migpamakey e sikandan te lein ne me manama ne ware dan neileyi wey kene igpasimba kandan te Magbebaye ne Manama. 27 Purisu nabelu ka Magbebaye ne Manama te nasud dan, wey impasalerep din sikandan te langun ne dilus ne nasulat te baseen te balaud din. 28 Ne tenged te mangune-kune ne langet te Magbebaye ne Manama, impandeldel rin sikandan puun te nasud dan, wey impeendiye din te lein ne me nasud ne neugpaan dan pad iya kuntee.’

29 “Due minsan nekey ne nekeeles de, wey iyan de nakanengneng ka Magbebaye ne Manama ta. Piru impanengneng din kanta ka seini ne Balaud din, wey keilangan ne egtumanen ta seini wey te me kabuhalan ta, te ware egtamanan.”