11
Ka eggimuwen te matagseb
1 Inigusyu nu ka seleppi nu* Te Hibruwanen: Iantug nu ka paan nu diye te me weyig. diye te talipag te dahat
su eglihad ka timpu
ne egpakapallateng ka te ginansya.
2 Ba-baara nu ka nigusyu nu te pitu wey ke walu naa,
su ware ka nakanengneng ke nekey ne karereetan ka egkeyitabu kayi te kalibutan.
3 Ke makepal e ka gapun
eg-uran e seini.
Ne ke hendei egkapeled ka kayu
diye de seini egpakatetahu.
4 Ka talagbasuk ne egtetahad te kalamag ne eg-uyan te uran
kene egpakapamula.
Ka egbantey te gapun
kene egpakahaani.
5 Kene nu egkasabut ka inggimu te Manama
ne iyan miggimu te langun,
iling degma te ware nu nataheyi ke immenu te egbunsud te umul te bate
diye te getek te iney rin.
6 Pamula ka te maselem
wey kene ka peeneng-eneng taman te marusilem,
su ware ka nakanengneng ke hendei ka egkeuyag—
ka impamula nu te maselem wey ke ka impamula nu naa te marusilem
wey ke egkeuyag naan iya sika se daruwa.
7 Meupiya ka malayag wey tetelesi ne egpitawen ka iyam ne aldew ne egsile.
Meupiya iya ke egkeuyag ki pad.
8 Purisu ke egmalayat ka umul nu,
gale-gale ka tagse aldew taman te neuyag ke pad.
Piru sumsumana nu ne malayat ka timpu
diye te lebenganan.† Te Hibruwanen: karusileman.
Eglihad de iya ka langun.
Ka tambag te kanakan
9 Kanakan gale-gale ka te umul nu
taheed te bate ke pad.
Himuwa nu ka langun ne igkeupii nu,
piru tantanuri nu ne eggukuman ka te Manama
te langun ne eggimuwen nu.
10 Awaa nu ka kalaggew nu wey kene nu pasakiti ka lawa nu,
su ka pegkabate wey ka pegkamaagsik-agsik eglihad de iya.