1 Ne intabak ni Muwisis ka Manama, “Egmemenu e naan e ke kene sikandan egpalintutuu keddi wey kene egpammineg keddi? Kema ke egkahi sikandan te ware ka migpakita keddiey.” 2 Ne mig-insaan sikandin te Magbebaye ne Manama, “Nekey sika se miggen-genan nu?”

Ne migtabak si Muwisis, “Tuked.” 3 Ne ingkahiyan sikandin te Manama, “Iantug nu sika due te tane.” Seeye naa, in-antug ni Muwisis ka tuked din diye te tane wey migbaluy e ne uled. Te sikan de iya, naaldek sikandin wey migpallahuy e. 4 Piru migkahiyan sikandin te Manama, “Sinagkawa nu ka ikug te uled.” Purisu, insinagkew ni Muwisis ka ikug te uled wey nahen-genan din e, wey migbaluy e man‑e ne tuked. 5 Migkahi ka Manama, “Himuwa nu sika ne kein-inuwan eyew egpalintutuu sikandan ne migpakita a keykew se Magbebaye, ka Manama te me kabuybuyahan dan ne si Abraham, si Isaak, wey si Hakub.”

6 Ne migkahiyan pad man‑e sikandin te Manama, “Isaluksuk nu ka belad nu due te akeb te kumbale nu.” Ne insaluksuk en iya ni Muwisis ka belad din wey te inggeun din e, migmaangkag-angkag e ka belad din iling te migpepahis.* Te Hibruwanen: iling te migkehal ne weyig. 7 Migkahiyan e man‑e sikandin te Manama, “Iabey nu isaluksuk ka belad nu te akeb te kumbale nu.” Insaluksuk din e man‑e ka belad din wey te inggeun din e, ne neulian e ka belad din. 8 Migkahi ka Manama, “Ke kene sikandan egpalintutuu te hun‑a ne kein-inuwan, egpalintutuu e sikandan te ikarangeb. 9 Ke kene pad iya man‑e sikandan egpalintutuu keykew wey kene eglinga-linga te iglalag nu minsan egpakakite e sikandan te daruwa ne kein-inuwan, sakug ke naa te weyig puun te Weyig ne Nilu wey iitis nu seini diye te tane, wey egbaluy e seini ne langesa.”

10 Ne migkahiyan ni Muwisis ka Magbebaye ne Manama, “Etuwey Magbebaye, kena a ne meupiya ne eglalag puun pad dengan wey minsan iya kuntee te migpakiglalag kad keddiey te suluhuanen nu. Mananey a ne eglalag, wey kena a ne meupiya ne eglalag.”

11 Ne migkahiyan sikandin te Magbebaye ne Manama, “Hentew bes ka miggimu te be‑be te etew? Hentew‑a ka miggimu te etew ne kene egdineg wey ke ummew naa? Hentew‑a ka miggimu te etew ne egpakakita wey ke butud naa? Kene naa ne sikeddi se Magbebaye ne Manama? 12 Purisu hendiye ka su egbulihan ku sikeykew te eglalag wey egpanuluen ku sikeykew ke nekey ka iglalag nu.”

13 Piru migkahi si Muwisis, “I-i, suhu kad e ubag te duma Magbebaye.”

14 Ne dutu, nabelu e ka Manama ki Muwisis wey migkahi, “Nekey naa iya mule si Aarun ne suled nu ne Libita!† Si Muwisis wey si Aarun me kabuhalan ni Libi. Nakanengneng a ne meupiya sikandin ne eglalag. Egpeendinid en iya sikandin kuntee eyew egpakigkita keykew, wey amana sikandin egkahale-gale ke egkakita ka nikandin. 15 Lalahi nu sikandin wey panulua nu ke nekey ka iglalag din. Egbulihan ku sikaniyu se daruwa te peglalag, wey egpanuluen ku sikaniyu ke nekey ka eggimuwen niyu. 16 Si Aarun ka talagpangasak nu diye te me etew, wey sikeykew ka egpekeiling te Manama rin ne talagpanulu kandin. 17 Uyana nu ka tuked nu wey sika ka egpuunan ne egpekeyimu ka te me kein-inuwan.”

18 Ne miglibed e si Muwisis diye te anuhang din ne si Hitru wey migkahi, “Kaayun ded ubag ne egpakalibed a diye te me karumaan ku diye te Ihiptu? Egnengnengan ku re ke neneuyag naan pad sikandan.” Ne migkahiyan sikandin ni Hitru, “Uya. Ne up-upiya ka te hipanew nu.”

19 Te diye pad si Muwisis te Midiyan, ingkahiyan sikandin te Magbebaye ne Manama, “Libed kad diye te Ihiptu su nammatey e ka langun ne egkeupian ne eggimatey keykew.” 20 Purisu ingkuwa ni Muwisis ka asawa rin wey ka me anak din ne me lukes wey impeuntud din te asnu wey miglibed e diye te Ihiptu. In-uyan din degma ka tuked te Manama.

21 Ne migkahiyan te Magbebaye ne Manama si Muwisis, “Emun ke egpakalibed kad diye te Ihiptu, himuwa nu diye te tangkaan te Paraun ka langun ne me kein-inuwan ne impakita ku keykew. Su imbehayan ku sikeykew te geem te peggimu te kein-inuwan, piru egpakehalen ku ka ulu te Paraun eyew kene din egpeyipanawen ka me etew. 22 Ne kahii nu ka Paraun, ‘Seini ka ingkahi te Magbebaye ne Manama: Si Israil ka kinakakayan ne anak ku ne lukes. 23  ✡ Iks 12:29.Ne egbanasalan ku sikeykew ne egpeyipanawen nu ka anak ku eyew egpakasimba keddi, piru eg-apul ka. Kuntee, eggimatayan ku ka kinakakayan ne anak nu ne lukes.’ ”

24 Nakaaran ensi Muwisis diye te deralanen, wey imbayaan sikandin te Magbebaye ne Manama eyew eggimatayan e perem. 25 Piru migkuwa si Sipura te mahalang ne batu wey intulian din ka anak din, wey ka laplap ne napeta, inlakulas din diye te paa‡ Te Hibruwanen ne linalahan, kaayun degma ne lebut te lukes ka igpasabut. ni Muwisis. Ne migkahi si Sipura, “Nakalangesa ki tenged keykew, asawa ku!”§ Te Hibruwanen: asawa ku sikeykew te langesa. 26 Purisu warad himatayi te Manama si Muwisis. Su nakakahi e si Sipura, “Nakalangesa ki tenged keykew, asawa ku,”* Te Hibruwanen: asawa te intulian te langesa. tenged te pegtuli din.† Malehen ne egsabuten ka birsikulu 24 peendiye te 26, piru ka igpasabut buwa kayi ne impalangesaan si Muwisis eyew kene egkapatey, wey iyan nekeuyag kandin ka langesa te anak din ne intulian wey inlakulas te paa rin. Su keilangan ne egtumanen pad ni Muwisis ka balaud te Manama meyitenged te pegtuli te me anak din eyew egkeyimu sikandin ne pangulu wey talagluwas te me kabuhalan ni Israil.

27 Nataman, migkahiyan te Magbebaye ne Manama si Aarun, “Hendiye ka te katalunan wey sinug-unga nu si Muwisis.” Purisu miggipanew si Aarun ka egsinug-ung ki Muwisis diye te bubungan te Manama. Te nekeglambag e sikandan, inggarekan din sikandin eyew te peg-alumama kandin. 28 Ne dutu, impanugtulan e ni Muwisis si Aarun te langun ne igpepangguhud te Manama kandin, wey te langun ne kein-inuwan ne igpeyimu kandin te Manama.

29 Ne nangendiyad te Ihiptu si Muwisis wey si Aarun wey inlibulung dan ka langun ne igbuyag te me kabuhalan ni Israil. 30 Impangguhuran ni Aarun sikandan te langun ne ingkahi te Magbebaye ne Manama diye te ki Muwisis. Ne inggimu ni Muwisis ka langun ne kein-inuwan diye te tangkaan te me etew 31 wey migpalintutuu sikandan dutu. Te nakanengneng e sikandan ne nalulunu kandan ka Manama wey nakita rin ka kalasayan dan, nangunduk e sikandan wey migsimba te Manama.