1 Ne migkahiyan te Magbebaye ne Manama si Muwisis, “Duen pad sabeka ne igpasalerep ku te Paraun ne Hari te Ihiptu wey te keet-etawan din. Pegkapenga rue, egpeyipanawen kew e nikandin, wey egdeldelen kew pad iya nikandin su igkeupii rin ne eg-awe kew en iya. 2 Kahii nu naa ka langun ne Hibruwanen ne egpepamuyuen te me kasangkapan ne pelata wey bulawan diye te me sumbaley ran.” 3 Impangabangan te Magbebaye ne Manama ka me kabuhalan ni Israil ne eg-ay-ayaran te me Ihiptuhanen. Ne si Muwisis degma, intahud amana sikandin te me upisyal te Paraun wey te me mahinged te Ihiptu.

4 Ne migkahiyan ni Muwisis ka Paraun, “Seini ka ingkahi te Magbebaye ne Manama: ‘Kuntee te liware te marusilem, eglihad a te Ihiptu 5 wey egpamatey ka langun ne panganey ne anak ne me lukes kayi te Ihiptu, puun te panganey ne anak te Paraun ne iyan egsubal te trunu te amey rin, peendiye te anak te uripen ne malitan ne talaggaling. Ne egpatey degma ka langun ne lukesan ne kinakakayan ne anak te me ayam. 6 Ne due masumpit ne pegpandalawit te me etew te intiru ne inged te Ihiptu ne ware pad neyitabu dengan wey kenad egkeyitabu pad man‑e. 7 Piru ware mule igkasamuk te me kabuhalan ni Israil wey te me ayam dan, wey ware minsan asu naan de ne eggebu. Puun due, egkanengnengan niyu ne kene ku egpeg-ilingen ka me Ihiptuhanen wey ka me kabuhalan ni Israil.’ 8 Ne egparani keddi ka langun ne upisyal nu wey egpanimbuel sikandan te tangkaan ku wey egkahi, ‘Awe kew kayi Muwisis wey ka me keet-etawan nu ne eg-ikul keykew!’ Pegkapenga due, eg-awa ad kayi.” Ne mig-awe e si Muwisis diye te Paraun ne nangebel-ebel se langet.

9 Nataman, migkahiyan te Magbebaye ne Manama si Muwisis, “Kene egpammineg ka Paraun keykew su eyew masulug pad ka egkeyimu ku ne me kein-inuwan diye te inged te Ihiptu.” 10 Inggimu ni Muwisis wey ni Aarun seeye se langun ne kein-inuwan diye te tangkaan te Paraun, piru impakehal te Manama ka ulu* Te Hibruwanen: pusung. te Paraun wey ware din paawaa ka me kabuhalan ni Israil diye te inged din.