1 Te ware naluhey, migpakite e man‑e ka Magbebaye ne Manama ki Abraham diye te matulus ne me kayu ni Mamri. Te seeye ne timpu, nekeuntud e ka aldew wey diye migpinpinnuu si Abraham te gumawan te balungbalung din. 2  ✡ Hib 13:2.Pegpitew ni Abraham diye te kewun‑aan, iyan din en iya seini se tatelu ne etew ne migsasindeg. Sikan de iya ne migpallahuy e si Abraham ka migsinug-ung kandan. Ne miglangkeb sikandin diye te tane 3 wey migkahi, “Ahalen, ke egkaayun ne tulan kew pa ubag kayi te kanami. 4 Egpaangey a te weyig eyew egpakapanlu‑lu kew te me paa niyu, wey himeley kew pa kayi te egdalungan te kayu. 5 Eg-angey a man‑e te egkakeen eyew egmanekal kew ka egpabulus te peggipanew niyu, su igkahale ku ka pegsendad kaniyu taheed te kayi kew te ugpaan te suluhuanen niyu.”

Ne migtabak sikandan, “Ne uya, iyan kad e balahad.”

6 Sikan de iya ne migdagdahew si Abraham ne miglibed diye te balungbalung din wey migkahiyan din si Sara, “Apas ka kuwa te senge-saku ne subla ne meupiya ne harina wey hilutu ka te paan.” 7 Ne migdagdahew pad man‑e si Abraham migleus diye te me ayam din wey mig-alam sikandin te nati ne baka ne malambu. Ne imparagdahawan din seeye ipalape wey ipeyilutu te suluhuanen din. 8 Nataman, migkuwa degma si Abraham te malamismis ne gatas wey iyam ne gatas. Ne insendad din e seeye diye te tatelu ne etew duma te ngalap ne impeyilutu din. Ne diye de migsesasindeg si Abraham te lenged dan taheed te egmangekeen sikandan diye te egkaralungan te kayu.

9 Ne mig-insaan dan si Abraham, “Hendei ka asawa nu ne si Sara?”

Ne migtabak sikandin, “Duen ded te seled te balungbalung.”

10  ✡ Rum 9:9.Due sabeka kandan ne migkahi, “Eglibed a kayi te seup ne leg‑un te iling kayi ne timpu, wey ka asawa nu ne si Sara duen e anak ne lukes.”

Ne diye si Sara te gumawan te balungbalung ne egkeinniyuhan ni Abraham ka migpammineg. 11 Buyag e amana ka alunggun ne si Abraham wey si Sara, wey kenad egbulanen si Sara. 12  ✡ 1Pid 3:6.Sikan naa ka nakangisi si Sara ne migkahi diye te geyinawa rin, “Kuntee te buyag ad wey buyag e degma ka asawa ku, egkeupian e naan pad ne egpakiggulid kandin eyew egpakaanak key pad?”

13 Ne mig-insaan te Magbebaye ne Manama si Abraham, “Mania te nakangisi si Sara ne migkahi, ‘Egpakaanak e naan pad minsan buyag ad?’ 14  ✡ Luk 1:37.Duen naa kene egkeyimu te Magbebaye ne Manama? Te peglibed ku kayi te seup ne leg‑un te iling kayi ne timpu, ka asawa nu ne si Sara duen e anak ne lukes.”

15 Piru migpahunware si Sara su naaldek sikandin wey migkahi, “Ti! Wara a nakangisi ne.”

Piru migtabak ka Magbebaye ne Manama, “Ti! Nakangisi ka iya ne.”

16 Nataman, miggipanew e ka tatelu ne etew. Ne impanulud sikandan ni Abraham diye te egpakapantew te inged ne Suduma eyew te pegpaligkat kandan. 17 Ne migkahi ka Magbebaye ne Manama diye te geyinawa rin, “Kene ku igkeeles ki Abraham ka eggimuwen ku. 18 Egnenasud te dakel ka me kabuhalan din wey egkeyimu ne mabantug. Ne egpanalanginan ku ka langun ne nasud kayi te ampew te tane pinaahi kandin. 19 In-alam ku sikandin eyew igpatuman din te me anak din wey te me kabuhalan din keureme ka me suhu ku ne eggimu sikandan te matareng wey eleg ne peggukum. Ne puun due, egkatuman ka langun ne insaad ku kandin.”

20 Ne migkahiyan te Magbebaye ne Manama si Abraham, “Nasublaan e ka sumbung meyitenged te Suduma wey Gumura, wey dakel e amana ka sale dan. 21 Sikan naa ka egtupang a eyew egleuyen ku ke malehet ka sumbung ne narineg ku.”

22 Ne mig-awe e mule ka daruwa ne etew wey miggendiyad te Suduma, piru migpalunggehaat ka Magbebaye ne Manama duma ki Abraham. 23 Migdani-rani si Abraham te Magbebaye ne Manama wey mig-inse, “Egguleen nu naa te egpangimatey ka matareng duma te makasesale? 24 Ke due lalimma ne pulu (50) ne etew ne matareng diye te siyudad, egdereetan nu naa ka intiru ne siyudad? Kene nu naa igkeyid‑u ka siyudad tenged kandan? 25 Kene nu iya egkeyimu ka peggule te matareng duma te makasesale. Kene egkaayun ne egpekeg-iling ka eggimuwen nu te me matareng wey te me makasesale. Su ka talaggukum te langun kayi te ampew te tane, keilangan ne eggimu ke nekey ka eleg.”

26 Ne migkahi ka Magbebaye ne Manama, “Ke egpakakita a te lalimma ne pulu (50) ne etew ne matareng diye te Suduma, kene kud egdereetan ka intiru ne siyudad tenged kandan.”

27 Ne migkahi e man‑e si Abraham, “Magbebaye ne Manama, kene ke re keenendueni te egpabulus a ka eg-inse keykew, minsan etew e re ne ware katenged ne eg-inse keykew kayi. 28 Ke duen naan de hep‑at ne pulu wey lalimma (45) ne etew ne matareng diye, egdereetan nu naan ded ka intiru ne siyudad minsan nasalinan de te lalimma ne etew ne matareng?”

Ne migtabak ka Magbebaye ne Manama, “Kene ku egdereetan ka siyudad ke egpakakita a te hep‑at ne pulu wey lalimma (45) ne etew ne matareng.”

29 Ne mig-inse e man‑e si Abraham, “Ke duen naan de hep‑at ne pulu (40) ne etew ne matareng?”

Ne migtabak ka Magbebaye ne Manama, “Ke due hep‑at ne pulu (40), kene ku egdereetan ka intiru ne siyudad tenged kandan.”

30 Ne migkahi e man‑e si Abraham, “Magbebaye ne Manama, kene ke re kabelu te egpabulus a ne eg-inse. Ke duen naan de tatelu ne pulu (30) ne matareng?”

Ne migtabak sikandin, “Kene ku egdereetan ka intiru ne siyudad ke due egkakita ku ne tatelu ne pulu (30) ne etew ne matareng.”

31 Ne migkahi e man‑e si Abraham, “Magbebaye ne Manama, kene ke re keenendueni te egpabulus-bulus a ne eg-inse keykew. Ke duen naan de daruwa ne pulu (20) ne etew ne matareng ne egkakita nu?”

Ne migtabak ka Magbebaye ne Manama, “Kene ku red man‑e egdereetan ka intiru ne siyudad tenged kandan te daruwa ne pulu (20).”

32 Ne migkahi e man‑e si Abraham, “Magbebaye ne Manama, kene ke re iya kabelu su duen pad katamanan ne inse ku keykew. Ke sapulu naan de ka egkakita nu ne etew ne matareng?”

Ne migtabak ka Magbebaye ne Manama, “Kene ku red iya man‑e egdereetan ka intiru ne siyudad tenged kandan te sapulu.” 33 Te nekeimpus e sikandan ka migpeglalahey, mig-awe e ka Magbebaye ne Manama wey mig-uli e degma si Abraham.