1 Te pile e ne leg‑un ka miglihad, due talag-itis te binu wey talaggilutu te paan te Hari te Ihiptu ne nakasale diye te kandin. 2 Ne nabelu sikandin te sika se daruwa ne upisyal, 3 wey impaprisu rin sikandan diye te prisuwan te ahalen te me talagtameng ne diye degma prisuwa si Husi. 4 Naluhey sikandan ka naprisu, wey si Husi ka impatanggu kandan te ahalen te talagtameng.

5 Sabeka ne karusileman, nakataheinep diye te prisuwan ka talag-itis te binu wey ka talaggilutu te paan, wey tagse taheinep dan due kaluwasan. 6 Pegleuy ni Husi kandan te maselem, nakita rin ne nalaggew sikandan. 7 Sikan naa ka mig-insaan din sikandan, “Mania te mabehat-behat ka ulaula niyu kuntee?”

8 Migtabak sikandan, “Due me taheinep ney, piru ware egpakanangen kanami te kaluwasan.”

Ne migtabak si Husi, “Ka Manama re ka egpakaluwas te me taheinep. Ne kun la, nangeni a te taheinep niyu.”

9 Migpangguhud ka talag-itis te binu te taheinep din. Migkahi sikandin, “Diye te taheinep ku, due nakita ku ne sabeka ne pinamula ne paras diye te tangkaan ku. 10 Due tatelu ne sugpang te seeye ne paras ne migpangabukad wey migpamehas, wey sahuhune ne neyinuhan seeye. 11 Inggen-genan ku kun ka ubab te Hari te Ihiptu. Sikan naa ka migpupu a te me behas wey ingkeles ku seini diye te ubab din. Nataman, imbehey ku ka ubab diye te Hari.”

12 Ne migkahi si Husi, “Seini ka kaluwasan te taheinep nu: Ka tatelu ne sugpang iyan igpasabut se tatelu ne aldew. 13 Te ikatelu ne aldew, egpalekaan kad te Hari te Ihiptu wey egpasayluwen kad nikandin. Igpalibed ka nikandin diye te katungdanan nu dengan ne talag-itis te kandin ne binu. 14 Piru kena a kalingawi nikeykew ke meupiye e ka peg-ugpe nu. Ikeyid‑u a nikeykew wey kahii nu ka Hari te Ihiptu meyitenged keddi eyew egpalekaan ad e nikandin. 15 Su impepehes e re uyana kayi puun diye te inged ney te me Hibruwanen, wey kene eleg ne egprisuwen a nikandan kayi su wara a nakasale.”

16 Ne nakarineg ka talaggilutu te paan ne meupiya ka kaluwasan te taheinep te duma rin. Purisu, migkahiyan din si Husi, “Due degma taheinep ku. Diye te taheinep ku, duen kun tatelu ne nihu ne paan ne in-utuk ku. 17 Ka kinaribabawan kun, due nakalkalasi ne me paan ne para te Hari te Ihiptu, piru ingkeen seeye te me manuk-manuk.” 18 Migtabak si Husi, “Seini ka kaluwasan te taheinep nu: Ka tatelu ne nihu iyan igpasabut se tatelu ne aldew. 19 Te ikatelu ne aldew, egpatamperan ka te Hari te lieg nu wey egbitinen e ka lawa nu diye te kayu wey egkeenen te me manuk-manuk ka sapu nu.”

20 Te igkatelu e ne aldew, migpasahakeen ka Hari te Ihiptu para te me upisyal din su sika ka aldew te pegkeetew rin. Impalekaan din ka talag-itis te kandin ne binu wey ka talaggilutu te paan, wey impeuyan din sikandan diye te tangkaan din. 21 Impalibed din ka talag-itis te binu te katungdanan din dengan, 22 piru migpeyimatayan din ka talaggilutu te paan sumale te innangen ni Husi kandan. 23 Piru nalingawan te talag-itis te binu si Husi.