1 Te seeye ne timpu, migmasumpit pad ka bitil diye te Kanaan, 2 wey naamin e ka egkakeen ne naangey ran diye te Ihiptu. Ne migkahiyan ni Hakub ka me anak din, “Libed kew diye te Ihiptu wey bebeli kew naa ubag te deisek ne egkakeen ta.”

3 Piru migtabak si Huda, “Impegpehetan key panpanayi te gubirnadur ne kene key egpakita kandin ke kene egpakaruma kanami ka hari ney. 4 Ke igparuma nu kanami ka hari ney, eglibed key red ka egbebeli te egkakeen. 5 Piru ke kene nu igparuma sikandin kanami, kene key eggendiye. Su migkahiyan key nikandin ne wey key re egpakita kandin ke egpakaruma kanami ka hari ney.”

6 Ne migkahi si Hakub, “Mania iya mule te egpeyirapan e red iya nikaniyu pinaahi te pegkahi niyu kandin te duen pad hari niyu?”

7 Ne migtabak sikandan, “Mig-inse-inse ma iya sikandin kanami meyitenged kanta. Mig-inse sikandin ke neuyag ke naan pad Ame. Mig-inse man‑e sikandin ke duen naan pad hari ney. Ne intabak ney re degma ka me inse din. Hentew naa iya ka egsuman-suman ne igparuma rin bes kanami ka hari ney?”

8 Ne migkahiyan ni Huda ka amey rin, “Iparuma nu keddi si Tatu su egtaggel key e eyew kene ki red egkaamin egpatey te gutas. 9 Sikeddi ka egpanabak keykew ke egkamenu sikandin. Sikeddi senditi nu te ware egtamanan ke kene ku egkeuyan sikandin te eg-uli kayi te keykew. 10 Su ke ware key perem natalehen, kararuwa key buwad perem nakalibed diye.”

11 Ne migkahi si Hakub, “Ke sikan de ka egkaayunan, seini himuwa niyu: Kuwa kew te me subla ne meupiya ne egkakeen te seini ne inged wey ipanahu niyu diye te me saku eyew igdasag niyu te seeye se etew. Seini uyana niyu: Me peemut, me peemis, deisek ne teneb, wey behas te me kayu ne pistasiyu wey almindras. 12 Kararuwaa niyu ka kentiddad te seleppi ne eg-uyanen niyu. Keilangan ne eg-uyanen niyu red te eggendiye ka seleppi ne inlibed itahu diye te me saku niyu, su kema ke naseyyup de sikandan ka egtahu. 13 Dumaa niyud e ka hari niyu wey dagdahew kew libed diye te seeye ne etew. 14 Igkeyid‑u kew perem te Manama ne Amana ne Maresen ke diye kew e te tangkaan te seeye se etew eyew egpalekaan din si Simyun wey egpeulien din ded degma si Binhamin. Piru ke egkaawaan ad iya te me anak ku, balahad e su nekey naan pad iya ka egkeyimu ku.”

15 Sikan naa ka migpanguyan e sikandan te igdasag dan wey indaruwa ran ne lupi ka kentiddad te seleppi dan, wey miggendiyad sikandan te Ihiptu duma ki Binhamin. Te nekeuma ran e diye, migpakigkita ran e ki Husi. 16 Te nakita ni Husi ne nakaruma red kandan si Binhamin, migkahiyan din ka suluhuanen ne impiyalan din te langun diye te baley rin, “Uyana nu sika ne me etew diye te baley ku. Lape ka te ayam wey hilutua nu su igpalagpu ku sikandan keddi te egpaniudtu.” 17 Ne intuman te suluhuanen ka innangen ni Husi wey in-uyan din ka taltalaari diye te baley ni Husi.

18 Naaldek ka taltalaari te in-uyan sikandan diye te baley ni Husi. Migpalalahey sikandan, “In-uyan ki kayi tenged te seleppi ne in-uli diye te me saku ta dengan. Egbayungan ki nikandin ne impanakew ta seeye wey egdakepen kid nikandin. Eg-uripenen kid nikandin wey eg-ahawen e ka me asnu ta.” 19 Te pegginguma ran diye te gumawan te baley ni Husi, migkahiyan dan ka suluhuanen ne impiyalan ni Husi te langun diye te baley rin, 20 “Ahalen, nekeendini key e dengan eyew egbeli te egkakeen. 21 Diye te in-aranan ney te peg-uli ney e, imbukalasan ney ka me saku ney. Mania mule te nakaampew man ded te me saku ney ka seleppi ne imbayad ney perem te egkakeen. Ware nasalini minsan deisek. Sikan naa ka in-uyan ney red man‑e kayi. 22 Ware key nakataha ke hentew ka migtahu te seleppi ney diye te me saku ney. Ne mig-uyan key e man‑e te seleppi ne igbeli ney te egkakeen.” 23 Ne migtabak ka suluhuanen, “Kene kew kapanseb wey kene kew kaaldek. Ka Manama niyu buwa ne Manama degma te amey niyu ka migtahu te seeye ne seleppi diye te me saku niyu. Nakuwa kud en iya ka imbayad niyu dengan.” Nataman in-uyan din e si Simyun diye te kandan.

24 Ne impaseled e te suluhuanen ka taltalaari diye te baley ni Husi. Imbehayan din sikandan te weyig eyew egpakapanlu‑lu te paa ran wey insungguran din degma ka me asnu ran. 25 Ne in-ayun‑ayun dan e ka me dasag dan ki Husi ke eg-uli te meudtu, su narineg dan ne eglagpu dan kandin te egpaniudtu diye. 26 Te peg-uli e ni Husi, impaseled dan e diye te baley ka igdasag dan wey imbehey ran e kandin, wey nangunduk sikandan diye te tangkaan din. 27 Mig-inse si Husi kandan meyitenged te peg-ugpe dan. Ne mig-inse e man‑e sikandin, “Menua ka amey niyu, ka buyag ne innangen niyu keddi? Ware pad sikandin migpatey?”

28 Ne migtabak sikandan, “Manekal pad ka amey ney ne suluhuanen nu, wey meupiya red ka peglelawa rin.” Ne miglangkeb e man‑e sikandan diye te tangkaan din ka egtahud kandin.

29 Te pegkakita ni Husi te hari rin ne si Binhamin, mig-inse sikandin, “Seini ka hari niyu ne innangen niyu keddi?” Ne migkahiyan din si Binhamin, “Tatu, egpanalanginan ka te Manama.” 30 Ne migdagdahew mig-awe si Husi su egpakasinehew e sikandin tenged te amana ne alimengew rin te hari rin. Migseled sikandin diye te sinabeng din wey diyad e migsinehew. 31 Nataman, migpandep‑ug e sikandin ne henduen pad ne miglihawang. Ne migtigkel naan de sikandin ka migsuhu te me suluhuanen din, “Ipangenat niyud e ka egkakeen.” 32 Innenatan si Husi diye te sabeka ne lamisa wey diye degma te lein ne lamisa ka taltalaari. Due degma me matig-Ihiptu ne migsuwey ka migkeen, su kene ne meupiya ne batasan diye te kandan ka eglemung egkeen te me Hibruwanen. 33 Ne diye te egkatangkaan ni Husi ka lamisa te taltalaari, wey immegsinsinundul sikandan papinnuuwa ligkat te panganey peendiye te igkalitan. Sikan naa ka migmasilsil-apey ka taltalaari ne neinu-inu. 34 Innenatan sikandan te keenen ligkat te lamisa ni Husi piru ka innenat ki Binhamin, egkalalimmeen mule ka karakel du te innenat diye te me kakey rin. Ne miglagpu sikandan ki Husi te migkeen wey mig-inum te ware pegkehe.