Habakuk
Igpewun‑a
Te seini ne baseen, egkabasa ta ka pegpalalahey ni Prupita Habakuk te Magbebaye ne Manama. Diye mig-ugpe si Habakuk te Huda wey nasulat buwa seini ne baseen te me subla te hen‑em ne hatus ne leg‑un (600) te ware pad neetew si Kristu. Ne mig-inse si Habakuk te Manama ke mania te ware din legpari seeye se me karumaan din ne me matig-Israil ne migpandeeg-deeg te me meupiya ne me etew. Migtabak ka Manama ne egpeuyan sikandin te me sundalu ne me matig-Babilunya eyew te peglegpad kandan. Te sika ne timpu, amana ikaaldek ka me sundalu te nasud ne Babilunya tenged su amana sikandan ne mabbulut wey natalu ran ka nasud te Asirya wey Ihiptu. Ware nakasabut si Habakuk ke mania te iling due ka inggimu te Magbebaye ne Manama. Ne mig-inse sikandin te Manama ne miggenendue, “Mania te imparuyun-duyunan nu ka me etew ne kene ne matinumanen? Ne mania te egpeeneng-eneng ka ke egdereetan dan ka me etew ne matareng pad kandan?” (1:13). Ne migtabak ka Manama ne egbulig sikandin te eleg ne timpu, ne sasangan pad: “…ka me matareng, egkeuyag mule tenged te pegpalintutuu ran.” (2:4)
Ka duma ne baad te seini ne baseen iyan ka pegtagne te egginguma ne karereetan te seeye se maddeet ne etew. Ne minsan egkaaldek si Habakuk ne egdusaan e te Manama ka Huda, piru migpalintutuu red sikandin ne egluwasen din ded ka keet-etawan din wey egbehayan te kanekal ne egpakaantus te keyirapan ne egkeula-ula ran. Mig-impusan ka seini ne baseen te ulahingen te pegdayan te Magbebaye ne maresen.
Ka nenasulat te seini ne baseen
Ka me pegsagsahukul ni prupita Habakuk wey ka tabak te Magbebaye ne Manama 1:1–2:4
Ka karereetan te maddeet ne me etew 2:5-20
Ka peg-ampu ni Habakuk 3:1-19
1
1 Seini ka guhuren meyitenged te lalag te Magbebaye ne Manama ne hendue te impataheinep ki prupita Habakuk.
Ka pegsagsahukul ni Habakuk
2 “He Magbebaye, ken‑u ke bes pad eglinga-linga
te impangananey ku keykew?
Migpabulig ad keykew, piru wara a pangabangi nikeykew puun te karereetan!
3 Ne mania te iyan nu re impapitew keddi ka maddeet? Mania te egpipitawen nu re seeye se layun egmangimu te mareet wey kene nu egsaparan?
Layun naan de karereetan, kasamuk, pegpeehetey, wey pegpeusihey ka egkakita ku.
4 Ne nekeiling te warad e balaud wey naawe e ka eleg ne peggukum.
Layun de egkareeg te maddeet se hinimuwan ka me etew ne matareng,
sikan naa ka nareetan e ka matareng ne peggukum.”
Ka tabak te Manama
5 ✡ Him 13:41.Ne migtabak ka Magbebaye,
“Pitawa niyu ka me nasud ne nakalingut kaniyu
wey amana kew egkeinu-inu wey egkabenga-benga.
Su due eggimuwen ku te timpu niyu
ne kene kew egpakapalintutuu minsan ke egkapangguhuran kew e.
6 ✡ 2Har 24:2.Kema pitew kew, egbehayan ku te karesen ka me matig-Babilunya,* Te Hibruwanen: matig-Kaldiya.
ka amana ne mabbulut ne me etew wey me bahani.
Eg-empeten dan te egleug-leug ka katantanaan,
wey egpangahawan dan ka me etew te me ugpaan dan.
7 Egkaaldek wey egkaliyasan kandan ka me etew;
minsan nekey ka igkeupii ran te eggimu ne insuman-suman dan ne eleg, eggimuwen dan.† Te Hibruwanen: Ka peggukum wey kabantug dan migpuun te pegkeetew ran.
8 “Ne meiyal pad ka me kudde dan du te me liyupardu,
wey mabbulut pad te me singgalung ne egmanleug-leug te marusilem.
Ne egwaheswes de ka egmangudde ne egpepallahuy puun te mariyu ne me inged;
egpekeiling sikandan te me banug ne egpasalanap ka egdawi te egdawiyen dan.
9 “Egpanlusud sikandan langun eyew te pegdereet,
wey egkaalatan ka egmanlusuran dan.
Inlibulung dan ka indakep dan ne iling kasulug te pantad.
10 Minsan ka me Hari, egbalbalayen dan de,
wey eggimuwen dan de ne egkangisiyan ka me pangulu.
Egngingisiyan dan de mule ka malig‑en, makepal, wey matikang ne alad te me siyudad,
su egtetamundu re sikandan te tane ne egbayaan dan wey eg-ahawen dan e ka siyudad.
11 Egkataman, egpabulus sikandan eggipanew ne egpekeiling te manekal ne kalamag.
Makasesale sikandan wey iyan dan inggimu ne manama ka kanekal ran.”
Ka pegsagsahukul e man‑e ni Habakuk
12 He Magbebaye ne ware egtamanan,
sikeykew ka Manama ku.
Matulus ka wey ware egpatayan.
He Magbebaye ne Sumalem ne batu ne talagpangabang ku,
in-alam nu ka me matig-Babilunya eyew iyan eglegpad kanami.
Intunde nu sikandan eyew egdisiplina kanami.
13 Tenged su matulus ka,
kene ka egkeupian ne egpitew te seeye se eggimu te sale.
Na, mania te imparuyun-duyunan nu ka me etew ne kene ne matinumanen?
Ne mania te egpeeneng-eneng ka ke egdereetan dan ka me etew ne matareng pad kandan?
14 Ne impeiling nu re ka me etew te ngalap diye te dahat,
wey iling te me mananap ne egdul‑ug ne ware egpangulu.
15 Ne egpekeiling ka me etew te me ngalap ne egmamunuwiten te me matig-Babilunya
wey egbiyaleen de.
Ke egkalimud e ka egsahad te biyale dan, egmanguleyi e sikandan te kahale.
16 Purisu, egpanubaran dan ka biyale dan wey egtutungan te insinsu.
Su nakabehey seini te keupianan‡ Te Hibruwanen: Tenged kandan malambeg ka baad dan. wey katubung kandan.
17 Ne egpabulus-bulus naa sikandan ka egdereet te me nasud§ Te Hibruwanen: Egheunen din ka nakatahu te biyale din. wey kene egkeyid‑u ne egpangimatey te keet-etawan te ware egtamanan?* Te Hibruwanen: Egpabulus naa sikandan eggeun te nakasahad diye te biyale dan?
*1:6 Te Hibruwanen: matig-Kaldiya.
†1:7 Te Hibruwanen: Ka peggukum wey kabantug dan migpuun te pegkeetew ran.
‡1:16 Te Hibruwanen: Tenged kandan malambeg ka baad dan.
§1:17 Te Hibruwanen: Egheunen din ka nakatahu te biyale din.
*1:17 Te Hibruwanen: Egpabulus naa sikandan eggeun te nakasahad diye te biyale dan?