5
Ka ulahingen meyitenged te parasan
1 ✡ Mat 21:33; Mar 12:1; Luk 20:9.Ne kuntee, eg-ulahingan ku ka alukuy ku te ulahingen meyitenged te parasan din:
Due dengan parasan te alukuy ku* Te seini ne sinulat, impeiling ni Isayas ka Israil te parasan wey ipeiling din ka Manama te kamuney te sika ne parasan. Purisu Manama ka ingkahi rin kayi ne alukuy rin.
diye te bubungan ne subla ne meupiya se tane.
2 Impiku rin seini wey impangawaan te me batu
wey impamulaan din te subla ne meupiya ne paras.
Ne migpasasindeg sikandin te matikang ne bakalag diye te elat-elat eyew eg-ugpaan te egtameng kayi,
wey miglulungag pad iya man‑e sikandin diye te batu eyew egdiekanan te behas te paras.
Migtetahad sikandin ne egpamehas seini te meemis piru nasi ne malamismis ka behas kayi.
3 Ne kuntee migkahi ka alukuy ku,
“He, nangugpe te Hirusalim wey keet-etawan te Huda,
eghangyu a ne hukumi a nikaniyu ke hendei ka naseyyup, sikeddi naa wey ke parasan ku?
4 Nekey naan pad ka ware ku neyimu te parasan ku?
Mig-iman-iman a ne egpamehas seini te meemis
piru mania te malamismis nasi ka behas kayi?
5 “Ne kuntee egnangenan ku sikaniyu ke nekey ka eggimuwen ku te parasan ku.
Eg-aween ku ka batu ne alad ne nakalingut ne nekeelet te me mananap ne egseled.
Ne egkeyimu e seini ne panabtaban, wey egdi-diekan e seini te me mananap.
6 Egbalaharen kud e seini ne egbenesan,
wey kene kud e egpanempuhan ka me sugpang wey ke egpatamunduwan naa te tane ka me lebut kayi.
Ne eglingut egpanubu kayi ka duhiyen ne me hilamunen;
ne egsuhuen ku ka gapun ne kenad e seini egpeuranan.”
7 Ka parasan te Amana ne Maresen ne Magbebaye ne Manama, iyan ka Israil,
ka pinamulaan ne inggeyinawaan din iyan ka Huda.
Migpamitew sikandin te eleg ne peggukum
piru iyan din nakita ka migpeyimmimatayey.
Migpamitew sikandin te katareng
piru iyan din narineg ka kuleyian te pegpabulig!
Ka mareet ne hinimuwan te me etew
8 Mekeyid‑u-hid‑u kew se migpamasulug te baley
wey migpamaluag te tane taman te warad tane te duma ne etew
wey sikaniyu naan de ka mig-ugpe te sika ne inged.
9 Narineg ku ne migkahi ka Amana ne Maresen ne Magbebaye,
“Warad e eg-ugpe te sika se langun ne derakel wey mateles ne me baley.
10 Ka maluag ne parasan,
me pila-pila naan de ne gelun ne binu ka egkaangey.
Ne ka sapulu ne gantang ne beni,
sabeka naan de ne gantang ka egkahaani.”
11 Mekeyid‑u-hid‑u kew se maselem-selem ne eg-enew eyew egpamitew te egpekewubug ne inumen,
wey egliwaraan kew te marusilem ka eg-iinum taman te egkengewubug kew e.
12 Te pegsahakeen niyu, due me lira niyu, me alpa, tamburin, plawta, wey binu;
piru ware niyu sumsumana seeye se impanekul te Magbebaye ne Manama
wey ware niyu pitawa seeye se immangimu rin.
13 Purisu egkarakep ka keet-etawan ku wey egkeuyan tenged su ware sikandan nakasabut te inggimu te Magbebaye ne Manama.
Ne egpatey te gutas ka keet-etawan wey ka me talahuren,
wey egkammaraan amana sikandan.
14 Inggutasan ka inged te me minatey wey migpataman-taman seini migginganga.
Eg-abelengen kayi ka me pangulu te Hirusalim,
lagkes ka susuluhi ne etew ne mahulub naan de iya ka egmanggale-gale te me pegsahakeen dan.
15 Ne egkeyilawan ka langun ne etew
wey igpariralem ka langun ne hambuhen.
16 Piru egbantuhen ka Amana ne Maresen ne Manama ta tenged te eleg ne peggukum din.
Ka matareng ne himu te Matulus ne Manama ta ka egpakita te pegkamatulus din.
17 Te sika kangkuwa ne aldew, egkeyimu e ne panabtaban te nati te karniru wey me kambing ka siyudad,
wey egmallambeg e ka me hilamunen ne migmanubu diye te nagguhus ne me baley.
18 Mekeyid‑u-hid‑u kew se egkengeupian ne eggimu te me ware karuan.
Egkengeupian kew ne egkeyiketan te sale wey kene kew iya egpakaalihu.
19 Ne migkahi sikandan, “Peiyala niyu ka Manama wey paragdahawi niyud kandin ka eggimuwen din su eyew egkakita ney e seini.
Egkeyitabu e perem ka planu te Matulus ne Manama te Israil su eyew egkanengnengan ney e seini.”
20 Mekeyid‑u-hid‑u kew se me etew ne iyan ingngaran te mareet se meupiya wey iyan ingngaran te meupiya se mareet.
Inggimu niyu ne marusilem ka malayag, wey inggimu niyu ne malayag ka marusilem.
Inggimu niyu ne mapeit ka meemis, wey inggimu niyu ne meemis ka mapeit.
21 Mekeyid‑u-hid‑u kew se me etew ne migsuman-suman ne me matagseb
wey me utekan.
22 Mekeyid‑u-hid‑u kew se iyan de kabuluti se peg-iinum te dakel ne binu
wey iyan de egkatuenan se egpeg-amut te nalein-lein ne inumen ne egpekewubug.
23 Ne migdawat kew te seleppi ne bayad eyew egbehayan te kaligwangan ka me makasesale
wey ware niyu behayi te eleg ne peggukum ka me ware sale.
24 Purisu, iling te hapuy ne sahuhune ne egpakasilab te lahami wey te nahangu ne hilamunen,
egkareetan kew degma iling te pinamula ne namewu se me dalid
wey egmanlayap se me bulak iling te alinepung.
Tenged su insamsamilian niyu ka balaud te Amana ne Maresen ne Magbebaye
wey inlemetan niyu ka lalag te Matulus ne Manama te Israil.
25 Purisu nalangetan ka Magbebaye ne Manama te keet-etawan din,
wey ingkayew rin ka belad din eyew te peglegpad kandan.
Ne egkawelwel ka me bubungan,
wey egkengeengkeran ka me minatey
diye te deralanen iling te me lapek.
Piru minsan pad due,
kene pad iya egkaawe ka langet te Magbebaye,
wey egkayawen din ded iya ka belad din eyew te peglegpad.
26 Ne egbehey te palinneu ka Magbebaye ne Manama
eyew te peg-umew te maddiyu ne me nasud.
Egbunsuwitan din seeye se diye te kinaledleran te kalibutan
wey meiyal amana sikandan ne egginguma.
27 Ware sabeka kandan ne egkabeley wey ke egkasaligkat naa.
Ware egtuyungen kandan wey ke egpakalipereng naa.
Ne kene eglugke ka me sinturun dan,
wey ware egkabugtus ne hiket te sandal ran.
28 Malliddus ka me tunud dan wey imbengat dan e ka me piet dan.
Ne iling te batu ne sumalem ka sulu te me kudde dan,
wey iling te balisusu ka me liggid te me karwahi ran.
29 Ne egginihel sikandan iling te me liyun ne egdawi te mananap.
Ne eg-uyanen dan ka indawi ran diye te mariyu
ne ware egpakaluwas kayi puun kandan.
30 Te sika kangkuwa ne aldew, egginihelan dan ka Israil
wey iling kahulub te lehes te dakel ne bunlud te dahat ka pegginihel ran.
Ne emun ke egpanlangu-langu ka sabeka ne etew diye te tane,
iyan din egkakita ka karusileman† Ka igpasabut te “karusileman” iyan se me etew ne mig-ikul te me pamaahi ran wey ware mig-ikul te me pegpanulu te Magbebaye ne Manama. Kene sikandan egpakakita te Magbebaye ne Manama wey mig-antus sikandan, wey ware migmatubung. wey kalaggew.
Ne egmarusilem ka malayag tenged te me gapun.
✡5:1 Mat 21:33; Mar 12:1; Luk 20:9.
*5:1 Te seini ne sinulat, impeiling ni Isayas ka Israil te parasan wey ipeiling din ka Manama te kamuney te sika ne parasan. Purisu Manama ka ingkahi rin kayi ne alukuy rin.
†5:30 Ka igpasabut te “karusileman” iyan se me etew ne mig-ikul te me pamaahi ran wey ware mig-ikul te me pegpanulu te Magbebaye ne Manama. Kene sikandan egpakakita te Magbebaye ne Manama wey mig-antus sikandan, wey ware migmatubung.