1 Seini ka lalag te Magbebaye ne Manama ne impanengneng din meyitenged te Hirusalim ne ingngaranan te Napu ne Impakita te Manama:

Nekey bes ka insuman-suman niyu te migmanlibulung kew diye te me atep te me baley niyu? 2 Newukag wey migmanguleyi ka me etew te intiru ne siyudad.

Ka me etew ne nenammatey, ware nenammatey te panganiban wey ke gira naa. 3 Ne namallahuy ka langun ne me pangulu niyu—namallahuy sikandan diye te mariyu. Ne naddakep sikandan langun—naddakep sikandan ne warad iya nakapane. 4 Purisu migkahi a, “Engkeri a nikaniyu! Balahara a ne egsinehew! Kena a nikaniyu pape-peenenga ka eglungku tenged te kamatayen te keet-etawan ne immanggeyinawaan ku.” 5 Tenged su intahahe e te Amana ne Maresen ne Magbebaye ka aldew te kahubut, pegkatalu, wey kasamuk diye te Napu ne due Impakita te Manama. Ne egmasuwen ka me batu ne alad te siyudad ne matikang wey makepal, wey due egpanguleyi ne egpangananey diye te me bubungan.

6 Ne miglusud ka me sundalu te Ilam ne due me piet, me tunud, wey migmanguntud te me karwahi. Ne andam e ka me kalasag te me sundalu diye te Kir. 7 Neneempet e te me karwahi ka langun ne memeupiya ne me kamet niyu; intamengan te migmangudde ka gumawan te siyudad niyu. 8 Ne inggimu te Magbebaye ne Manama ne ware karuan te langun-langun ne insalihan te keet-etawan te Huda ne egpakabulig kandan. Te sika ne aldew, impamitew niyu ka me panganiban diye te Baley diye te Katalunan. 9 Ne nakita niyu ka masulug ne lungag te matikang wey makepal ne batu ne alad te Hirusalim, wey miglilimud kew te weyig diye te diddiralem ne lanew. 10 Ne inleuy niyu ka me baley diye te Hirusalim, wey impangguhus niyu eyew eggamiten te peg-ayad-ayad te alad te siyudad. 11 Ne miggimu kew te maluag ne limuranan te weyig diye te elat-elat te daruwa ne alad eyew eglimuran niyu te weyig ne egpuun te tapey ne lanew. Piru ware kew migsalig wey miglinga-linga te Manama ne iyan migbuut te minsan nekey ne egkeyitabu, wey ka migplanu due dengan.

12 Te sika kangkuwa ne timpu, eg-umawen kew te Amana ne Maresen ne Magbebaye eyew eglungku wey egsinehew. Ingkahiyan kew nikandin ne egpeupew wey egsaluub te saku ne palinneu ne miglungku kew. 13  ✡ 1Kur 15:32.Piru nasi kew mule miggale-gale, wey miggilang te baka wey karniru. Ne migkeen kew te ngalap, mig-inum te binu, wey migkahi, “Egkeen ki wey eg-inum su egpatey kid ma kaaselem.”

14 Ne ingkahiyan a te Amana ne Maresen ne Magbebaye, “Kene ku iya egpasayluwen ka me sale dan taman te egpatey sikandan. Sikeddi se Amana ne Maresen ne Magbebaye ne Manama ka miglalag kayi.”

15 Ne ingkahiyan a te Amana ne Maresen ne Magbebaye ne Manama ne eggendiye ki Sibna ne impiyalan te palasyu wey egpakahiyan sikandin: 16 “Hentew ke bes ubag? Nekey bes ka katenged nu te peglulungag te dalama eyew eglebengan te pegkeetew nu kayi te matikang ne inged? 17 Taham-taham ka, su minsan migsuman-suman ka ne talahuren ka, piru igdegpak ka igpataman-taman te Magbebaye. Egtamtamanan ka nikandin te eggen-gen, 18 wey eg-ilingen ka te bula wey igdegpak ka nikandin igtaman-taman diye te maluag ne inged. Ne egkapatey ka diye wey egkagguhus degma diye ka impeggasal nu ne me karwahi. Purisu egkapeyilawan nu ka ahalen nu ne Hari. 19 Egpaaween ka te Magbebaye due te upisina nu wey igpepamaneug ka nikandin due te katungdanan nu.”

20 “Te sika ne aldew, igpeumew ku ka suluhuanen ku ne si Ilyakim ne anak ni Hilkiyas. 21 Igpasaluub ku kandin ka malayat ne kumbale nu wey ka sinturun nu, wey igbehey kud kandin ka katenged nu. Egkeyimu sikandin ne egpekeiling te amey te nangugpe te Hirusalim wey te nangugpe te Huda. 22  ✡ Imp 3:7.Igbehey ku kandin ka yabi te migharian ni Dabid. Ne emun ke nekey ka eglukatan din, ware egpakalekeb, wey emun ke nekey ka eglekeban din, ware egpakalukat. 23 Eglig‑enen ku ka pegpangulu rin iling te kawad ne nakaayad-ayad nakasanggat diye te matikang wey makepal ne batu ne alad. Ne tenged te pegpangulu rin, egtahuren te me etew ka pamilya rin.

24 “Ne egpakasalig kandin ka pamilya rin wey ka langun ne karumaan din, iling te malig‑en ne sanggatanan ne impananggatan te me ubab wey te me gelun. 25 Piru te katamanan, egkapekas ka sanggatanan wey egkengeulug e ka langun-langun de iya ne impananggat kayi wey egkengaddeetan e. Sikeddiey se Magbebaye ne Manama ka miglalag kayi.”