42
Ka suluhuanen te Manama
“Seini ka in-alam ku ne suluhuanen ku.
Inggeyinawaan ku sikandin wey ingkahale ku.
Igbehey ku kandin ka Panisingan ku,
wey eggimu sikandin te eleg ne peggukum diye te langun ne nasud.
2 Kene sikandin egbalbalukan wey ke eggemen-hemen naa eglalag
wey ke egparineg-dineg naa te laheng din diye te me kelesadda.
3 Kene din eggepuen ka nabegkul ne luwey,
wey kene din eg-ebukan ka sulu ne egpangalap-halap naan de se legleg.
Matinumanen sikandin ne egpatuman te eleg ne peggukum.
4 Kene sikandin eg-engked
wey ke egkaawaan naa te kabagget
taman te egkeyimu rin e ka eleg ne peggukum kayi te ampew te tane.
Ne egtetahad ka me etew diye te me ilis te dahat te pegpanulu din.”
5 Sika ka ingkahi te Magbebaye ne miggimu te langit wey ka migbelat kayi.
Sikandin ka miggimu te kalibutan wey te langun ne mig-ugpe kayi.
Imbehayan din te umul wey geyinawa ka langun ne keet-etawan te kalibutan.
Ne ingkahiyan te Magbebaye ne Manama ka suluhuanen din,
6 “Sikeddiey ka Magbebaye ka mig-umew keykew
eyew igpapitew nu ka pegkamatareng ku.
Eglig‑enen ku sikeykew* Te Hibruwanen: eggen-genan ku ka belad nu. wey egtamengan ku.
Ne eggimu a te kasabutan te langun ne etew pinaahi keykew,
wey eggimuwen ku sikeykew ne kalayag te me nasud.
7 Ne igpeyimelat nu ka mata te me butud
wey igpalihawang nu seeye se me pinirisu ne diye te marusilem.
8 “Sikeddiey ka Magbebaye
wey sika iya ka ngaran ku;
kene ku iya igbehey ka katelesan ku diye te minsan hentew.
Kene ku egtuhutan ne egkareyrey degma ka ingkulit ne me larawan.
9 Ka impanengneng ku dengan, neyitabu e kuntee,
wey igpanengneng kud man‑e kuntee ke nekey ka egkeyitabu
te kene pad seini egginguma.”
Ka ulahingen te pegdeyrey
10 Ulahingi niyu te iyam ne me ulahingen ka Magbebaye;
eg-ulahing ka intiru ne kalibutan!
Deyraya niyu sikandin, sikaniyu se diye te dahat;
langun ne hinimuwan diye te dahat!
Ulahing kew sikaniyu se diye te maddiyu ne me ilis te dahat.
11 Sikaniyu se keet-etawan te me bariyu due te disirtu
wey sikaniyu se due te Kidar, deyraya niyu degma ka Manama.
Ne sikaniyu se keet-etawan te Sila, ulahing kew te kahale,
wey panguleyi kew diye te me puntul te me bubungan.
12 Ne sikaniyu se due te me ilis te dahat,
dayana niyu ka Magbebaye ne Manama
wey deyraya niyu sikandin.
13 Ne eggipanew ka Magbebaye ne egpekeiling te mabulut ne etew,
wey iling te egkalelehet ne egpakiggira.
Egsagyawan sikandin wey egkuleyi.
Bubuluti sikandin ne egpakig-ehet te me kuntere din.
Ka saad te Manama ne egbulig te keet-etawan din
14 Ne migkahi ka Manama,
“Derengani e re ka migpeeneng-eneng
wey migpegnel te pegkeetew ku.
Piru kuntee, egsagman ad e, egpanguleyi a ne hendue te malitan ne eglesutan.
15 Egdereetan ku ka me bubungan wey ka me labuntud
wey egpahanguwen ku ka me hilamunen diye.
Eggimuwen ku ne mammara ne tane ka me weyig,
wey egpeetiyan ku ka me linew.
16 “Eg-inahaken ku ka me butud ne keet-etawan ku
peendiye te dalan ne ware dan pad nabayei.
Egmalayahen ku ka marusilem ne egbayaan dan
wey egpatahen ku ka migleb-eng-leb-eng ne egbayaan dan.
Eggimuwen ku iya seini wey kene ku iya sikandan eg-engkeran.
17 Piru egmakalibed wey egkeyilawan egkatamtamani seeye se migsalig te me diyus-diyus
wey migkahi diye te me larawan,
‘Sikaniyu ka manama ney.’ ”
Ware migtuman ka Israil
18 Ne migkahi ka Magbebaye ne Manama,
“Pammineg kew ka kene egdineg!
Pitew kew ka kene egkita eyew egpakakita kew!
19 Malehet ne butud wey kene egdineg
ka Israil ne suluhuanen ku ne insuhu ku ne egpahuhuren.
Sikeddiey se Magbebaye ne Manama, migpakigsabut a kandin
piru butud ma iya sikandin.
20 Masulug ka nakita niyu
piru ware niyu seini sahipaa.
Egpakarineg kew
piru kene kew egpammineg.”
21 Nahale ka Manama te pegpabantug din te balaud din
wey te pegkareyrey kayi
su matareng ma sikandin.
22 Piru impangahawan wey impanakawan ka keet-etawan din kuntee.
Neneulug sikandan langun diye te bitu ne ingkaliyan te me kuntere dan wey nenaprisu.
Impanakawan sikandan wey in-ahawan te me kasangkapan dan
wey warad iya nakapangabang kandan.
23 Hentew‑a kaniyu ka egpammineg kayi?
Eglinga-linga kew naan e eg-ayad-ayad kayi kuntee?
24 Hentew‑a ka migtuhut ne egpanakawan ka Israil
wey egpangahawan te kasangkapan?
Ka Manama iya ne nasupak ta.
Ware ta ikula ka igkeupii rin wey ware ta tumana ka me suhu din.
25 Purisu, impaneem-neem din kanta ka langet din
wey ka makaliyas-liyas ne gubut.
Iling te hapuy ka langet din ne migtutung kanta
piru ware ki red iya man e nakasabut.
Natutung kid piru ware ki miglinga-linga.