56
Ka kaluwasan te duma
1 Ne seini ka ingkahi te Magbebaye ne Manama,
“Ipabulus niyu ka eleg ne peggukum
wey ka pegkamatareng niyu su egluwasen kud sikaniyu te kene egkaluhey
wey igpakapanengneng kud kaniyu ka katareng ku.
2 Due keupianan te seeye se etew ne migtuman layun te Aldew te Peggimeley wey ware migbaley-baley kayi.
Duen iya keupianan te seeye se ware miggimu te minsan nekey ne mareet.”
3 Ne ka me lapu ne mig-ikul te Magbebaye ne Manama,
kene sikandan eleg ne egkahi te kene sikandan iglagkes te keet-etawan te Magbebaye.
Ne ka me kinepun, kene ne eleg ne egkahi te iling sikandan te nahangu ne kayu.
4 Su seini ka ingkahi te Magbebaye,
“Ka me kinepun ne etew ne migtuman te me suhu ku meyitenged te Aldew te Peggimeley,
wey miggimu te egpakapahale keddi wey migtuman te kasabutan ku,
5 egtahu a te limlimuan para kandan diye te timplu ne egsulatan ku te me ngaran dan.
Meupiya pad seini ne egkapanunud du te masulug ne me anak,
tenged su kene ma seini egkaawe te ware egtamanan.
6 Egpanalanginan ku degma ka me lapu ne eg-ikul keddi, eggeyinawa wey egpamakey,
egtuman te kasabutan ku wey me suhu ku meyitenged te Aldew te Peggimeley.
7 ✡ Mat 21:13; Mar 11:17; Luk 19:46.Ne egdumeen ku sikandan diye te matulus ne bubungan ku
wey egpahaleen ku sikandan diye te timplu ku ne eg-am-ampuan.
Ne egdawaten ku ka me halad dan ne egtutungen wey ka igmanubad dan diye te altar ku
su ka baley ku, egngaranan te ‘baley ne ampuanan’.”
8 Ne migkahi pad man‑e ka Magbebaye ne Manama, ka miglibulung te naddakep ne me matig-Israil,
“Eglibulungen ku pad man‑e ka duma, eyew igpalemung e te seeye se nalibulung kud e.”
Ka peggukum te me pangulu te Israil
9 Ne ingkahiyan te Magbebaye ne Manama ka me nasud,
“Parani kew se langun ne nasud ne egpekeiling te mabbulut ne me mananap,
wey dereeti niyu ka keet-etawan te Israil.
10 Me butud ka me talagtameng kandan wey ware me katuenan.
Iling sikandan te me asu ne kene eggebu.
Egkeupian sikandan ne eggibat-hibat, egliplipereng,
wey egpanaheinep.
11 Egpekeiling sikandan te me asu ne bel-is
ne kene egkeuralan ne egkeen.
Ware me katuenan dan ne me talagtameng te me karniru
wey iyan dan de inggimu ka igkeupii ran
wey iyan dan de impakannekalan ka egpakameupiya kandan.
12 Ne migkahi sikandan,
‘Hendini kew, egkuwa ki te binu, wey egpataman-taman ki eg-iinum.
Kaaselem, eggimu ki te iling kayi wey egpalabawan ta ka inggimu ta kuntee.’ ”